Sranan Tongo Bible 2016 (STB16)
6

Yesus na a basi fu a sabatdei

Mat 12:1-8; Mrk 2:23-28

61Tapu wan sabatdei Yesus ben e waka psa ini den gron pe graan ben prani. Dan den man di ben e teki leri fu En broko wantu taki graan, den griti den na ini den anu fu puru a buba, dan den nyan.

6:1
Deu 23:25
2Ma wantu fu den Fariseiman taki: “Fu sanede un e du wan sani san a wèt no wani fu un du tapu a sabatdei?” 3Yesus piki den taki: “Un no leisi san David du, di angri ben e kiri en nanga den man di ben de nanga en?
6:3-4
1Sam 21:1-6
4A go ini a oso fu Gado, a teki den brede san den ben poti aparti gi Gado, dan a nyan den, èn a gi den man di ben e teki leri fu En meki den nyan tu. Ma no wan sma kan nyan den brede dati, boiti den priester.”
6:4
Lev 24:9
5Dan Yesus taki moro fara: “A Manpikin fu Libisma na a basi fu a sabatdei.”

Yesus dresi wan man tapu a sabatdei

Mat 12:9-14; Mrk 3:1-6

6Tapu wan tra sabatdei Yesus go na a kerki, dan A gi den sma leri. Wan man di let'anu ben malengri ben drape tu. 7Den sabiman fu Gado wèt nanga den Fariseiman ben luru Yesus fu si efu A ben o dresi wan sma tapu a sabatdei. Nanga dati den ben o feni wan sani fu tyari En go na krutu. 8Ma Yesus ben sabi san den e prakseri. Dan A taigi a man nanga a malengri anu taki: “Opo, kon tnapu dya pe ala sma kan si yu.” Dan a man opo go tnapu. 9Yesus taigi den taki: “Mi wani aksi unu wan sani. San a wèt e taki un kan du tapu a sabatdei? Bun noso ogri? Fu hori wan sma na libi, noso fu libi en meki a dede?” 10Dan Yesus luku ala den sma di ben de lontu En, dan A taigi a man taki: “Langa yu anu!” A man langa en anu, dan a kon betre. 11Den sabiman fu Gado wèt nanga den Fariseiman ben kuku fu atibron. So den bigin aksi makandra san den mus du nanga Yesus.

Den twarfu boskopuman fu Yesus

Mat 10:1-4; Mrk 3:13-19

12A pisten dati Yesus ben go na tapu wan bergi fu go begi. Heri neti A tan drape e begi Gado. 13Di dei broko A kari den man kon di ben e teki leri fu En. Dan Yesus puru twarfu na den mindri, èn A kari den En boskopuman. 14A teki Simon, di A ben kari Petrus, nanga en brada Andreas. Moro fara A teki Yakobus, Yohanes, Filipus, Bartolomeus, 15Mateus nanga Tomas. Dan A teki Yakobus a manpikin fu Alfeus, nanga Simon wan fu den Seloten, 16Yudas a manpikin fu Yakobus, nanga Yudas Iskariot, a man di seri Yesus bakaten.

Yesus e gi den sma leri

Mat 4:23-25

17Yesus saka kmopo fu a bergi nanga den man, dan A tan tnapu na a futu fu a bergi. Bun furu sma di ben e teki leri fu En ben drape. Wan heri ipi sma di ben kmopo fu Yerusalem nanga ala sei fu Yudea ben drape tu. Moro fara yu ben abi sma fu den foto Tirus nanga Sidon, di de na sei a Bigi Se. 18Den ben kon fu arki san Yesus e taki, èn fu A dresi den siki fu den. Sma di takruyeye ben e pina, ben kon betre. 19Ala sma ben suku fu fasi En, bika krakti ben kmopo fu En, èn A ben meki ala sma kon betre.

Den sma di Gado e blesi

Mat 5:1-12

20Yesus luku den sma di e teki leri fu En, dan A taki: “Unu leki pôtiwan na blesi sma, bika unu na sma di Gado e tiri. 21Unu di e psa angriten now na blesi sma, bika Gado o gi unu san un abi fanowdu. Unu di e krei now na blesi sma, bika Gado o meki un lafu. 22Unu na blesi sma te sma no man si un na ai, èn te den no wani sabi not'noti fu unu, èn te den e taki takru fu unu, e gi un pori nen fu a Manpikin fu Libisma ede.

6:22
1Pe 4:14
23Un mus breiti èn dyompo fu prisiri na a ten dati, bika a pai san un abi na heimel bigi. Bika na so den afo fu den ben du nanga den profeiti.
6:23
2His 36:16
Bosk 7:52

24Ma un guduman, un mus luku bun! Bika un dati abi ala sani san un wani kba. 25Un di abi nofo nownow, un mus luku bun! Bika un o psa angriten. Un di e lafu nownow, un mus luku bun! Bika wan ten o kon tak' un o abi dipi sari, èn un o krei. 26Un di sma e taki soso bun fu unu, un mus luku bun! Bika na so den afo fu den ben taki bun fu den man di ben du leki den na profeiti.”

Lobi yu feyanti

Mat 5:38-48; 7:12

27“Ma Mi e taigi unu di e arki Mi taki: Yu mus lobi yu feyanti. Du bun gi den sma di no man si un na ai. 28Blesi den sma di e fluku yu. Begi gi den sma di e du yu ogri. 29Efu wan sma naki yu na yu wan seifesi, drai a trawan gi en. Efu wan sma teki yu empi, gi en yu ondrobosroko tu. 30Efu wan sma aksi yu wan sani, gi en. Efu wan sma teki wan sani fu yu, no aksi en baka. 31Yu mus libi nanga trawan soleki fa yu wani taki den mus libi nanga yu.

6:31
Mat 7:12
32Efu yu lobi soso den sma di lobi yu, sortu blesi yu abi? Bika den sondusma srefi lobi den sma di lobi den. 33Efu yu e du bun soso gi den sma di e du bun gi yu, sortu blesi yu abi? Den sondusma e du a srefi sani. 34Èn efu yu e leni soso den sma di yu sabi taki kan leni yu baka, sortu blesi yu abi? Den sondusma srefi e leni trawan fu kan kisi a srefi baka. 35Nono, yu mus lobi yu feyanti èn du bun gi den. Leni sma sondro fu prakseri taki den mus yepi yu baka. Tapu sowan fasi yu pai na Gado o bigi, èn yu sa de trutru pikin fu a Moro Hei Gado. Bika Gado bun gi den sma di no sabi san na tangi nanga den takru-ati sma.

36Yu mus abi sari-ati soleki fa yu P'pa na heimel abi sari-ati.”

No krutu trawan

Mat 7:1-5

37“No suku fowtu na trawan, dan trawan no o suku fowtu na yu. No krutu sma, dan sma no o krutu yu. Gi pardon, dan yu o kisi pardon tu. 38Gi na sma, dan yu o kisi baka, bun furu, iya bogobogo psa marki. Bika na a fasi fa yu e gi, na so yu o kisi baka.”

39Dan Yesus gi den wantu agersitori. A taki: “Wan breniman no kan tyari wan tra breniman waka, noso den ala tu o fadon ini wan olo.

6:39
Mat 15:14
40Wan sma di e teki leri no sabi moro a sma di e gi en leri. Ma te a sma leri ala sani kba, dan a o kon de leki a sma di gi en leri.
6:40
Mat 10:24-25
Yoh 13:16
15:20

41Fa yu kan si a fini pisi udu ini a ai fu yu brada, ma yu no e si taki wan postu de ini yu eigi ai? 42Fa yu kan taigi yu brada taki: ‘Brada, kon meki mi puru a fini pisi udu ini yu ai,’ ma yu no e si a postu ini yu eigi ai? Yu hoigriman! Puru a postu ini yu eigi ai fosi, dan yu o man si krin fu kan puru a fini pisi udu ini a ai fu yu brada.”

A bon nanga en froktu

Mat 7:16-20; 12:33-35

43“Wan gesontu bon no e gi kruwa froktu, èn wan bon san siki no e gi bun froktu. 44Yu e sabi a bon te yu si den froktu fu en. Yu no man piki figa na wan prasarabon, èn yu no man piki droifi na brantimaka. 45Wan bun sma e du bun sani fu di en ati bun. Ma wan takru sma e du ogri sani fu di en ati takru. San furu wan sma ati, na dati a e puru kon na doro.”

Tu sortu fundamenti

Mat 7:24-27

46“Sanede un e kari Mi: ‘Masra, Masra,’ ma un no e du san Mi e taki? 47Mi o sori unu fa a sma de di e kon na Mi, èn di e arki èn du san Mi e taki. 48A de leki wan sma di e diki go bun dipi fu meki wan steifi ston fundamenti di a bow wan oso. Di wan bigi frudu kon, a watra fu a liba naki a oso. Ma a oso no seki, fu di a ben bow bun. 49Ma wan sma di e yere, ma no e du san Mi e taki, de leki wan sma di bow wan oso tapu a gron sondro fu diki wan fundamenti. Di a watra fu a liba naki a oso, dan wantron so a heri oso broko fadon te na gron.”

7

A bribi fu wan Romeini ofisiri

Mat 8:5-13

71Baka di Yesus kba taigi a folku ala den sani disi, A go ini a foto Kafarnaum. 2Now wan Romeini ofisiri ben abi wan knekti di a ben lobi furu. A man disi ben siki tranga, te fu dede. 3Di a ofisiri yere fu Yesus, a seni wantu fesiman fu den Dyu go na En, fu aksi En fu kon dresi a knekti. 4Den man go na Yesus, dan den aksi En tangitangi fu kon yepi a ofisiri. Den taki: “A man disi fiti fu Yu yepi en, 5bika a lobi a Dyu pipel, èn na en bow a kerki gi unu.” 6Dan so Yesus go nanga den. Di A doro krosbei fu a oso, a ofisiri seni den mati fu en go na Yesus nanga a boskopu taki: “Masra, no weri Yusrefi bika mi no warti fu Yu kon ini mi oso. 7Dat' meki mi no ben firi misrefi warti fu kon na Yu. Ma efu Yu taki wan wortu nomo, dan a knekti fu mi o kon betre. 8Bika mi srefi e wroko ondro trawan, èn mi abi srudati di de ondro mi. Efu mi taigi wan fu den taki: ‘Go drape,’ a e go. Efu mi taigi wan trawan taki: ‘Kon dya,’ a e kon. Efu mi taigi mi srafu taki: ‘Du disi,’ a e du en.” 9Di Yesus yere a sani disi, A ferwondru. Dan A drai taigi a bigi grupu sma di ben waka na En baka taki: “Mi e taigi un taki: Na ini heri Israel Mi no feni no wan sma nanga sowan bigi bribi.” 10Di den mati di a ofisiri ben seni, drai go baka na ini a oso, den si taki a knekti kon betre.

Yesus wiki wan dede ini a foto Nain

11Wan syatu pisten baka dati Yesus go na a foto Nain. Den man di ben e teki leri fu En, nanga wan bigi grupu tra sma, ben go nanga En. 12Di Yesus doro krosbei fu a bigi doro fu a foto, A si den sma e tyari wan dede kmopo ini a foto fu go beri. A dedeman ben de a wan enkri manpikin fu wan uma di masra dede kba. Furu sma fu a foto ben waka baka a dede. 13Di Masra si a uma, A kisi wan dipi sari gi en, dan A taigi en taki: “No krei.” 14Yesus waka go na a dede, A fasi a dragi, dan den dragiman tan tnapu. Dan Yesus taki: “Yonkuman, Mi e taigi yu taki: Opo!” 15A dedeman opo sidon, èn a bigin taki. Dan Yesus langa en gi en m'ma. 16Ala den sma ben kisi bigi lespeki gi Gado, èn den gi En grani taki: “Wan bigi profeiti opo na un mindri.” Den taki moro fara: “Gado kon fu yepi En folku.” 17A nyunsu fu san Yesus du ben panya na heri Yudea nanga den kondre san de lontu en.

Yesus nanga Yohanes a Dopuman

Mat 11:2-19

18Den man di ben e teki leri fu Yohanes ben go ferteri en ala den sani disi. 19Dan Yohanes seni kari tu fu den kon na en, èn a seni den fu go aksi Masra taki: “Na Yu na a Man di ben o kon, noso wi mus ferwakti wan tra sma?” 20Di den man go na Yesus den taki: “Na Yohanes a Dopuman seni un kon na Yu, fu aksi efu Yu na a Man di ben o kon, noso efu wi mus ferwakti wan tra sma.” 21A pisten dati Yesus ben e dresi furu sma fu ala sortu siki èn A ben puru takruyeye na den tapu. Furu sma di ben breni A ben meki kon si baka. 22Dan Yesus piki den man fu Yohanes taki: “Un go taigi Yohanes san un si nanga san un yere: Breniman e si baka, lanman e waka, gwasiman skin e kon bun baka èn dofuman e yere. Owktu dedesma e wiki baka èn pôtisma e yere a bun nyunsu fu Gado.

7:22
Yes 29:18-19
35:5-6
61:1
23A sma di no lasi bribi ini Mi na wan blesi sma.”

24Di den boskopuman fu Yohanes drai go baka, Yesus bigin ferteri a bigi grupu sma drape fu Yohanes. A taki: “Di un ben go na ini a dreisabana, san un ben go luku? Un no ben go luku fa a winti e wai a grasi! 25Ma san un ben go luku dan? Wan man di weri diri krosi? Nono. Sma di e weri bun diri krosi èn di e libi bigi e tan ini kownu-oso. 26Ma dan san un ben go luku dan? Wan profeiti? Iya, Mi e taigi unu: A de wan profeiti, ma a no dati wawan. 27Bika fu Yohanes a skrifi taki: ‘Yere, Mi e seni Mi boskopuman go na Yu fesi, di sa meki a pasi klari gi Yu.’

7:27
Mal 3:1
28Mi e taigi un taki: Fu ala sma di gebore, Yohanes na a moro prenspari wan. Ma toku a moro pikinwan na mindri den sma di Gado e tiri, prenspari moro en.”

29Ala den sma di yere san Yesus taki, sosrefi den man di e piki lantimoni, ben taki tak' Gado e du sani nanga leti. Bika den ben meki Yohanes dopu den.

7:29-30
Mat 21:32
Luk 3:12
30Ma den Fariseiman nanga den sabiman fu Gado wèt poti a sani san Gado ben wani du gi den na wan sei. Bika den no ben meki Yohanes dopu den.

31Dan Yesus taki: “Leki san Mi kan si den sma fu a ten disi? Leki san den de? 32Den e du leki pikin di e prei tapu wan pren, dan den e bari gi den trawan taki:

Wi prei poku gi unu,

ma un no dansi.

Wi singi dede-oso singi gi unu,

ma un no krei.

33Bika di Yohanes a Dopuman kon, a ben tan furu leisi sondro fu nyan èn a no ben e dringi win. Dan un taki: ‘Wan takruyeye de na en tapu.’ 34A Manpikin fu Libisma kon, A e nyan èn A e dringi. Ma fu En un e taki: ‘Luku, a man disi na wan akanswari nanga wan sopiman. Na wan mati fu den man di e piki lantimoni nanga fu den sondusma.’ 35Ma den sma di koni e sori taki a koni fu Gado bun.”

A uma di kisi pardon fu en sondu

36Wan fu den Fariseiman ben kari Yesus fu kon nyan na en oso. Yesus go, dan A teki presi sei a tafra. 37Wan uma ben libi ini a foto, èn ala sma ben sabi en leki wan sondusma. Di a uma kon sabi taki Yesus de ini a oso fu a Fariseiman e nyan, a teki wan albast batra nanga mirre-oli na ini, dan a go drape.

7:37-38
Mat 26:7
Mrk 14:3
Yoh 12:3
38A go tnapu baka Yesus na En futusei. A ben e krei. A nati Yesus futu nanga en watra-ai, dan a drei den nanga en edewiwiri. A bosi Yesus futu, dan a lobi a oli gi den. 39Di a Fariseiman di ben kari Yesus kon, si a sani disi, a prakseri na ini en ati taki: “Efu a man disi ben de wan profeiti, A ben o sabi suma na a uma disi di e fasi En. A ben o sabi taki a uma disi na wan sondusma.” 40Dan Yesus taigi en taki: “Simon, Mi wani taigi yu wan sani.” Simon taki: “Meister, taki. Mi e arki.” 41Yesus taki: “Tu man ben de di ben mus pai wan man di e leni sma moni. A wan ben mus pai feifi hondro solfrumoni èn a trawan ben mus pai feifitenti solfrumoni. 42Ma di den no ben man pai, a man taigi den taki den no abi fu pai moro.” Dan A aksi Simon taki: “Sortu wan fu den tu man disi o lobi a man moro furu?” 43Simon piki taki: “Mi denki taki na a man di ben abi a moro bigi paiman.” Yesus taki: “Yu piki bun.” 44Yesus drai luku a uma, dan a taigi Simon taki: “Yu e si a uma disi? Di Mi kon ini yu oso, yu no gi Mi watra fu Mi wasi Mi futu. Ma nanga en watra-ai a nati Mi futu, èn a drei den nanga en edewiwiri. 45Yu no gi Mi wan bosi. Ma sensi Mi kon inisei, a no tapu fu bosi Mi futu. 46Yu no lobi oli na Mi ede, ma a uma disi lobi mirre-oli gi Mi futu. 47Dat' meki Mi e taigi yu taki: A furu lobi di a sori, e sori taki a kisi pardon fu en sondu, awinsi den ben furu. Ma wan sma di kisi pardon fu pikinso sondu, e sori pikinso lobi.” 48Dan Yesus taigi a uma taki: “Uma, yu kisi pardon fu yu sondu.” 49Den sma di ben de makandra nanga Yesus sei a tafra bigin taki ini densrefi taki: “San a man disi e prakseri fu Ensrefi, taki A e gi sma pardon fu sondu?” 50Ma Yesus taigi a uma taki: “Uma, a bribi fu yu yepi yu. Go nanga freide.”

8

Den uma di ben sorgu gi Yesus

81Baka dati, Yesus waka foto fu foto èn dorpu fu dorpu e tyari a bun nyunsu taki Gado o tiri libisma. Den twarfu man ben de nanga En, 2makandra nanga wantu uma di Yesus ben dresi, èn di A ben ferlusu fu takruyeye. Yu ben abi Maria, di sma ben sabi leki Maria fu Magdala. Seibi takruyeye ben kmopo na en tapu.

8:2-3
Mat 27:55-56
Mrk 15:40-41
Luk 23:49
3Moro fara yu ben abi Yohana, a uma fu Kusas. Kusas ben hori ai tapu den tra wrokoman fu Herodes. Dan yu ben abi Susana tu nanga wan lo trawan moro. Den uma disi ben yepi Yesus nanga den man di ben e teki leri fu En, nanga san den ben abi.

A tori fu a siri

Mat 13:1-9; Mrk 4:1-9

4Sma ben kmopo fu ala den foto kon na Yesus. Di wan bun bigi grupu sma ben kon makandra, Yesus ferteri den wan agersitori. 5A taki: “Wan man ben go sai siri na ini en gron. Di a e fringi den siri, wantu fadon tapu a pasi. Den sma di waka psa trapu den, èn den pikinfowru kon nyan den. 6Tra siri fadon tapu gron di lai ston na ini. Den sproiti, ma den dede gwe baka, fu di a gron no ben abi nofo watra. 7Trawan fu den siri fadon pe makamaka grasi e gro. A makamaka grasi ben sproiti makandra nanga den tra siri. Di den bigin gro, a makamaka grasi no gi den siri okasi fu gro doro. 8Ma tra siri fadon tapu bun doti. Di a gro kon, a gi hondro tron so furu nyanyan.” Dan Yesus bari taki: “Suma abi yesi fu yere, meki a yere!”

San a tori fu a siri wani taki

Mat 13:10-23; Mrk 4:10-20

9Den man di ben e teki leri fu Yesus, aksi En san a agersitori disi wani taki. 10Dan Yesus taki: “A fasi fa Gado o tiri libisma na wan kibritori. Gado meki un kon ferstan a kibritori disi. Ma Mi e ferteri den tra sma den sani disi na ini agersitori. Dat' meki den e luku, ma den no e si, èn den e arki, ma den no e ferstan.

8:10
Yes 6:9
11Meki Mi brokobroko a agersitori gi unu. A siri na a wortu fu Gado. 12Den siri di fadon tapu a pasi na den sma di e yere a boskopu. Ma didibri e kon puru san den yere na ini den ati, fu den no bribi meki Gado ferlusu den. 13Den siri di fadon tapu gron di lai ston na ini, na den sma di e teki a boskopu san den yere nanga prisiri. Ma a boskopu no e beri rutu. Den e bribi fu wan syatu pisten, dan te tesi kon na den pasi, den e drai baka. 14Den siri di fadon pe makamaka grasi e gro, na den sma di e yere a boskopu. Ma a heri pisten di den de tapu a pasi, den e broko den ede nanga den problema fu a libi, nanga grontapu gudu, èn nanga den tra grontapu sani. Den sani disi e tapu den fu den no kan gro, èn den no man gi nyanyan. 15Den siri di fadon tapu bun doti, na den sma di e arki a boskopu nanga wan bun ati èn nanga wan ati di wani. Den sma disi e hori san den yere, èn den e gi nyanyan fu di den e hori doro.”

A tori fu a lampu

Mrk 4:21-25

16Dan Yesus taki moro fara: “No wan sma e leti wan kokolampu fu poti ondro wan bari, noso ondro wan bedi. Ma yu e poti en na tapu wan tafra fu ala sma di e kon inisei kan si a faya.

8:16
Mat 5:15
Luk 11:33
17Bika noti san de na dungru o tan na dungru. Èn ala sani san kibri o kon na krin, èn a o de fu si.
8:17
Mat 10:26
Luk 12:2
18So yu mus luku bun nanga sortu ati yu e arki. Bika a sma di e arki Mi nanga wan ati di wani, Gado o gi en moro sabi. Ma a sma di no e arki Mi, awinsi san a denki taki a sabi, Gado o puru en.”
8:18
Mat 25:29
Luk 19:26

A famiri fu Yesus

Mat 12:46-50; Mrk 3:31-35

19Den brada fu Yesus nanga En m'ma ben kon na En, ma den no ben man go inisei fu di den sma ben furu tumsi. 20Dan den sma taigi En taki: “Yu m'ma nanga den brada fu Yu de na dorosei. Den wani si Yu.” 21Ma Yesus piki den taki: “Mi m'ma nanga Mi brada na den sma di e arki a wortu fu Gado, èn di e du san den yere.”

Yesus tapu wan bigi sek'watra

Mat 8:23-27; Mrk 4:35-41

22Wan dei Yesus go ini wan boto nanga den man di ben e teki leri fu En. A taigi den taki: “Kon meki un go na abrasei fu a meer.” Dan den kmopo na syoro. 23Di den e koti abra, Yesus fadon na sribi. Dan wan bun tranga winti bigin wai tapu a meer èn den ben de na nowtu, bika watra ben e kon ini a boto. 24Dan den man go wiki Yesus taki: “Meister, Meister, wi e dede!” Yesus opo dan A bari a winti nanga den skwala. So a winti tapu fu wai, èn a watra tapu fu seki. Ala sani kon tiri. 25Dan Yesus aksi den taki: “Pe a bribi fu unu de?” Den man kon frede èn den ferwondru. A wan taigi a trawan taki: “Suma na a Man disi taki A e komanderi a winti nanga a watra èn den e du san A e taki!”

Yesus puru takruyeye tapu wan man

Mat 8:28-34; Mrk 5:1-20

26Na so den doro ini a kontren fu den sma fu Gerasa, di de abrasei fu Galilea. 27Di Yesus go na syoro, wan man fu a foto dati waka miti En. Takruyeye ben de tapu a man disi, èn na wan heri pisten kba a no ben weri krosi. A no ben e libi na ini wan oso, ma a ben e libi na ini den berpe. 28Di a si Yesus, a bari èn a fadon tapu en kindi na En fesi. A bari nanga tranga sten taki: “Yesus, Manpikin fu a Moro Hei Gado, san Yu wani nanga mi? Mi e begi Yu: No pina mi!” 29A taki so, bika Yesus ben komanderi a takruyeye fu kmopo tapu a man. A ben de so tak' furu leisi a takruyeye ben tyari en gwe sondro fu a wani. Den sma ben tai en nanga keti èn den ben bui en na en futu fu a no gwe, ma a ben koti den keti èn a takruyeye ben meki a go na presi pe furu sma no ben de 30Dan Yesus aksi en taki: “Fa yu nen?” A piki taki: “Mi nen na Hilahila,” bika bun furu takruyeye ben de tapu a man. 31Dan den takruyeye begi Yesus fu A no seni den go ini a olo san no abi gron. 32Now yu ben abi bun furu agu drape di ben e nyan na a bergiskin. Dan den takruyeye begi Yesus fu A meki den go ini den agu. So A meki den go. 33Ne den takruyeye kmopo tapu a man, go na ini den agu. Dan den agu lon saka fu a bergi go ini a meer, dan den dede. 34Di den man di ben luku den agu si san psa, den lon gwe. Den go ini a foto nanga den presi ini a kontren fu a foto, go ferteri san ben psa. 35So ala den sma kon fu si san psa. Den go na Yesus, dan den si a man di ben abi den takruyeye fosi na en tapu, sidon na Yesus futusei. A ben weri krosi èn a ben de ensrefi. Ne ala den sma kon frede. 36Den sma di si fa ala sani waka, ferteri den tra sma fa a man di ben abi den takruyeye na en tapu, ben kon fri. 37Ala sma fu a kontren fu Gerasa ben frede sote taki den aksi Yesus tangitangi fu A gwe. So Yesus go baka ini a boto, dan A gwe. 38Ma fosi Yesus gwe, a man aksi En efu a kan go nanga En. Ma Yesus seni en gwe. A taigi en taki: 39“Go baka na yu oso, èn ferteri den sma ala sani san Gado du gi yu.” So a man waka ini a heri foto, e ferteri san Yesus du gi en.

A umapikin fu Yairus nanga a uma di fasi Yesus krosi

Mat 9:18-26; Mrk 5:21-43

40Di Yesus drai go baka na abrasei fu a meer, wan heri ipi sma ben tnapu e wakti En. 41Ne wan man Yairus kon na Yesus. Yairus ben de wan edeman fu a kerki. A fadon tapu en kindi na Yesus futu, dan a begi En tangitangi fu kon na en oso, 42bika en wan enkri umapikin ben de fu dede. A pikin ben abi twarfu yari. Di Yesus ben de na pasi, wan heri ipi sma ben waka nanga En, e kwinsi En fu ala sei. 43Na mindri den sma wan uma ben de, di ben abi wan siki san ben meki taki a e lasi brudu twarfu yari kba. No wan sma no ben man dresi en.8:43 Wantu manuscript skrifi taki: Ala sani san a ben abi, a ben gi na datra, ma no wan sma ben man dresi en. 44A uma waka mindri den sma kon baka Yesus, dan a fasi a ondrosei pisi fu En krosi. Wantron a kon betre. 45Dan Yesus aksi taki: “Suma na a sma di fasi Mi?” Ala den sma piki tak' a no den. Dan Petrus taki: “Ma Meister, someni sma e pusu e kwinsi Yu fu ala sei.” 46Ma Yesus piki taki: “Wan sma fasi Mi. Bika Mi firi taki krakti kmopo fu Mi.” 47Dan a uma kon ferstan taki Yesus firi taki a fasi En. Nanga beifi ati a kon na fes'sei, dan a fadon tapu en kindi fesi Yesus. Let' fesi ala sma a ferteri En fu sanede a ben fasi En, èn taki wantewante a kon betre. 48Dan Yesus taigi en taki: “Mi pikin, a bribi fu yu meki yu kon betre. Yu kan go ini freide.”

49Yesus ben e taki ete nanga a uma, di wan sma fu Yairus kon na en nanga a boskopu taki: “A umapikin fu yu dede. Yu no mus ferferi a Meister moro.” 50Ma di Yesus yere san a taki, A taigi Yairus taki: “No lasi ati. Bribi nomo, dan a sa kon betre.” 51Di Yesus doro na Yairus oso, A no meki no wan sma kon na inisei nanga En, boiti Petrus, Yohanes, Yakobus, nanga a m'ma nanga a p'pa fu a pikin. 52Ala sma ben e bari e krei fu di a pikin dede. Ma Yesus taki: “Un no krei. A pikin no dede. Na sribi a e sribi.” 53Ma den sma bigin lafu En, bika den ben sabi taki a pikin dede. 54Dan Yesus hori a pikin na en anu. A taki nanga tranga sten taki: “Pikin, opo!” 55A pikin kisi libi baka, èn a opo wantron. Dan Yesus taigi den fu gi en wan sani fu nyan. 56A m'ma nanga a p'pa fu a pikin no ben sabi san fu prakseri. Ma Yesus taigi den krin tak' den no mus taigi no wan sma san psa.