Sranan Tongo Bible 2016 (STB16)
2

21“Dat' meki na disi Mi e taigi unu, priester: 2Efu unu no wani arki, efu un no prakseri bun san Mi e taki, fu un lespeki Mi, dan Mi sa fluku unu èn Mi sa fluku ala sani nanga san Mi ben blesi unu, MASRA fu ala sani taki. Mi sa fluku un trutru bika un no teki den sani na ati. 3Luku, Mi sa strafu den bakapikin fu unu. Mi sa teki a doti fu den meti di den tyari leki ofrandi, dan Mi fringi en gi unu na ini un fesi. Iya, den o teki un makandra nanga a doti go trowe tapu a dot'ipi. 4Dan un sa ferstan taki na Mi meki disi psa, fu a ferbontu fu Mi nanga Lefi no broko. Na disi MASRA fu ala sani taki. 5A ferbontu di Mi ben meki nanga en ben o tyari libi nanga freide gi en. Mi gi en disi fu a ben kan lespeki Mi èn nanga wan dipi lespeki a dini Mi. 6Yu ben man fertrow den sani fu a wèt di a ben e leri den sma. No wan sani di no bun ben e kmoto ini en mofo. A ben e libi wan bun fasi nanga Mi èn nanga trawan. A meki furu sma drai den baka gi ogridu. 7Bika furu sabi de ini a mofo fu a priester. Fu en mofo den sma wan leri a wèt, bika en na wan boskopuman fu MASRA fu ala sani. 8Ma unu dati kmoto fu a pasi di Mi sori unu. Den sani fu a wèt di un leri den sma meki furu sma du sani di den no ben mus du. Un broko a ferbontu fu Mi nanga Lefi, MASRA fu ala sani taki. 9Fu dat'ede Mi o meki taki a heri folku no e lespeki unu èn taki den e si unu fu noti. Bika un no e libi leki fa Mi wani èn un e si a wèt leki noti.”

10Wi alamala abi a srefi P'pa. Na a srefi Gado meki wi alamala. Fu sanede meki wi e bedrigi makandra èn broko a ferbontu di Gado meki nanga den afo fu wi. 11Yuda no ben dini Gado wawan. Ini Israel nanga Yerusalem den sma du wan bigi ogri. Bika Yuda pori a santa sani fu MASRA, a sani di A lobi, fu go trow nanga wan uma di e dini wan tra gado. 12Mi e winsi tak' MASRA sa yagi a man di du a sani disi puru na mindri den Israelitisma, awinsi a e tyari ofrandi gi MASRA fu ala sani. 13Moro fara un e nati a altari fu MASRA nanga watra-ai. Un e krei èn un e dyeme fu di A no e luku den ofrandi fu un moro. A no e teki den fu un anu tu fu di a no e prisiri nanga den. 14Dan un e aksi unsrefi taki: Fu sanede dan? Disi e psa fu di MASRA ben de ketoigi fu a ferbontu di yu ben meki nanga yu uma di yu ben yongu. Ma yu broko a ferbontu dati aladi en na yu uma, a uma nanga san yu ben meki a ferbontu. 15No wan sma di abi pikinso ferstan nomo e du sowan sani. Bika ala sma wani abi pikin nanga bakapikin di Gado lobi. Dat' meki yu mus luku yusrefi bun èn yu mus sorgu taki yu no broko a ferbontu di yu ben meki nanga yu uma di yu ben yongu. 16Bika Mi no lobi en srefsrefi te sma e broko trow, MASRA, a Gado fu Israel, e taki. Efu yu du dati, yu e tyari ogri kon na yu tapu. Na dati MASRA fu ala sani taki. Fu dat'ede un mus luku bun taki un no broko trow.

17Un e weri MASRA nanga den sani di un e taki. Dan un e aksi taki: “Nanga san wi e weri En?” Un e weri En ede fu di un e taki tak' ala sma di e du ogri e du san bun ini MASRA ai èn A lobi den sma disi. Ma efu dati de so dan pe a Gado de di e krutu nanga leti?

3

31Luku, Mi e seni Mi boskopuman di sa meki a pasi klari gi Mi. A Masra di un e suku, a Engel fu a ferbontu, di un e angri fu si, sa kon na en tempel sondro fu piki na fesi. Luku, A e kon, MASRA fu ala sani taki. 2Suma o tan na libi a dei di A e kon? Suma o man tan tnapu te A de fu si? Bika A o de leki faya nanga san den e bron solfru nanga gowtu. A o de leki a watra nanga san den e breki katun fu a kon weti. 3A o sidon leki wan sma di e bron a solfru fu a kon safu, fu puru ala doti na ini. A sa krin den leki fa den e krin gowtu nanga solfru, fu den kan tyari ofrandi tapu a yoisti fasi gi MASRA. 4Dan MASRA sa abi prisiri baka nanga den ofrandi fu Yuda nanga Yerusalem, leki na ini den dei fu bifo, leki na ini den yari di psa gwe. 5Mi sa kon na unu fu krutu unu. Mi no sa draidrai fu krutu den tofruman, den sma di e huru, den sma di e lei gi trawan fesi krutubakra, den sma di e hori moni fu den wrokoman na baka, den sma di e pina den uma di masra dede kba nanga den pikin di no abi p'pa nanga m'ma moro nanga den sma di no wan gi doroseisma no wan leti. Bika den no e lespeki Mi, MASRA fu ala sani taki.

6Fu tru, Mi, MASRA, no kenki. Ma unu, bakapikin fu Yakob, no kenki tu. 7Sensi a ten di den afo fu unu ben de na libi ete den no ben hori densrefi na den sani fu Mi, di den ben mus tan du. Un drai kon baka na Mi, dan Mi sa drai kon baka na unu. Na dati MASRA fu ala sani taki. Ma dan un e aksi taki: “San wi du so taki wi mus drai kon baka?” 8Wan sma no kan fufuru sani fu Gado. Ma un e fufuru sani fu Mi. Dan un e aksi taki: “San wi e fufuru fu Yu?” Un e du dati fu di un e hori den tin prosenti na baka nanga den spesrutu ofrandi di den sma e tyari gi Mi. 9Wan fluku de trutru na un tapu, bika na Mi un e fufuru. Unu, a heri folku. 10Un tyari ala den tin prosenti go poti ini den maksin, fu nyanyan kan de ini Mi oso. Un du dati, MASRA fu ala sani taki, dan un sa si efu Mi no sa opo den fensre fu heimel dan Mi blesi un bogobogo. 11Dan Mi sa bari den sprenka fu den no nyan a nyanyan fu un gron moro, fu den droifibon kan abi froktu, MASRA fu ala sani taki. 12Ala folku sa taki fa Mi blesi unu, fu di a kondre fu unu na wan bun kondre, MASRA fu ala sani taki.

13Un gi Mi bigitaki, MASRA taki. Dan un aksi taki: “San na den bigi taki di wi taki?” 14Un taki tak': “A no abi no wan wini fu dini MASRA. Sortu bun a e tyari gi wi efu wi hori wisrefi na den komanderi fu En? Fu sanede wi mus sari fesi MASRA fu ala sani? 15Fu dat'ede wi mus fu taki tak' a e go bun nanga den sma di abi heimemre. Bika a gersi leki ala sani e go bun nanga den sma di no e dini Gado. Efu den tesi Gado srefi noti no e psa nanga den.”

16Na so den sma di e lespeki MASRA e taki nanga makandra. Ma MASRA yere. A arki bun. Leti na En fesi den skrifi den nen fu den sma di e lespeki MASRA èn di no e meki spotu nanga En nen. 17Den sa de fu Mi tapu a dei di Mi poti, MASRA fu ala sani taki. Mi sa abi sari-ati nanga den leki fa wan p'pa e abi sari-ati nanga en manpikin di e du san a p'pa e taki. 18Dan un sa si baka suma bun ini Gado ai nanga suma na den sma di no e dini Gado, suma e anbegi Gado nanga suma no e anbegi Gado.

4

41Bika arki, a dei e kon, a e kon leki wan faya onfu. A dei dati ala den sma nanga heimemre nanga den wan di no wan dini Gado sa de leki drei grasi. Dan tapu a dei di e kon, den o bron gwe. No wan taki noso rutu fu den sa de fu si moro, MASRA fu ala sani taki.4:1 Son vertaling abi a pisi disi leki 3:19. 2Ma a son sa opo gi unu di e lespeki Mi, a son di o meki sma si taki un abi leti. A faya fu en sa dresi sma dan un sa kon na dorosei èn dyompo leki pikin skapu. 3Un sa trapu den sma di no e dini Gado. Den sa de leki doti na ondro un futu tapu a dei di Mi poti, MASRA fu ala sani taki.

4Un memre a wèt di Mi gi Mi knekti Moses tapu a Horeb-bergi gi heri Israel, den sani di un mus tan du nanga den sani na san un mus tan hori unsrefi. 5Luku, Mi o seni a profeiti Elia kon, fosi a bigi dei fu MASRA doro, a dei di de fu frede. 6A sa meki p'pa nanga m'ma kon bun baka nanga den pikin fu den èn a sa meki pikin kon bun baka nanga den p'pa nanga m'ma. Dan Mi no abi fu kon fu figi a kondre puru.