Sranan Tongo Bible 2016 (STB16)
14

A dede fu Yohanes a Dopuman

Mrk 6:14-29

141Ini a srefi pisten dati Herodes, a tiriman fu Galilea,14:1 Den Romeinisma di ben tiri Israel a ten dati, ben prati a kondre fu Israel ini fo bigi pisi. Herodes ben tiri wan fu den fo pisi dati. ben kisi fu yere san den sma e ferteri fu Yesus. 2Dan a taigi den knekti fu en taki: “A mus de Yohanes a Dopuman, di kon na libi baka. Na dat' meki A abi makti fu du den bigi sani.” 3-4Herodes taki so bika a ben trow nanga Herodias, a uma fu en brada Filipus. Ma Yohanes ben taigi en taki: “Yu no kan trow nanga en.” Dan Herodes meki den grabu Yohanes, bui en poti na ini straf'oso.

14:3-4
Luk 3:19-20
Lev 18:16
20:21
5A ben wani kiri en, ma a ben frede a folku, bika den ben e si Yohanes leki wan profeiti.

6Ma tapu a friyari dei fu Herodes, a umapikin fu Herodias ben dansi gi Herodes nanga den sma di a ben kari. Herodes ben abi sowan prisiri nanga a pikin, 7taki a meki wan sweri. A taki: “Awinsi san a pikin sa aksi, mi sa gi en.” 8Dan a m'ma fu a pikin meki a aksi Herodes fu a gi en a ede fu Yohanes a Dopuman na ini wan preti. 9Kownu ben sari fu a sani disi. Ma fu di a ben meki a sweri na fesi ala den sma di ben de na tafra nanga en, a komanderi den srudati fu gi a pikin san a ben aksi. 10So a meki den kapu Yohanes ede puru ini a straf'oso. 11Dan den tyari a ede ini wan preti kon gi a pikin, èn a pikin tyari en go gi en m'ma. 12Baka dati den man di ben teki leri fu Yohanes kon teki a dedeskin tyari go beri. Dan den go taigi Yesus san psa.

Moro leki feifi dusun sma e kisi nyanyan

Mrk 6:30-44; Luk 9:10-17; Yoh 6:1-14

13Di Yesus yere taki den kiri Yohanes, A kmoto fu pe A ben de, dan A teki wan boto go na wan presi pe En wawan ben kan de. Ma bun furu sma yere dati. So den libi den foto, dan den waka nanga futu go na En baka. 14Di Yesus kmoto ini a boto, A si wan bigi grupu sma. Ne A kisi wan dipi sari gi den, èn A dresi ala den sikisma di ben de na den mindri.

15Di a son bigin saka, den man di ben e teki leri fu Yesus kon na En, dan den taigi En taki: “Sma no e libi dya pe un de, èn a lati kba. Seni ala den sma gwe, fu den kan go bai nyanyan ini den dorpu.” 16Ma Yesus piki den taki: “Den sma no abi fu gwe. Na unu mus gi den wan sani fu nyan.” 17Den man piki En taki: “Ala san un abi dya na feifi brede nomo, nanga tu fisi.” 18Yesus taki: “Tyari den kon gi Mi.” 19Dan A taigi ala den sma fu go sidon ini a grasi. A teki den feifi brede nanga den tu fisi, A luku go na heimel dan A blesi den. Baka dati A broko den brede, dan A gi den man di ben e teki leri fu En fu den prati gi den sma. 20Ala den sma nyan te den bere furu. Baka dati den man di ben e teki leri fu Yesus furu twarfu baskita nanga den pis'pisi di ben tan abra. 21Wan feifi dusun mansma so ben nyan. Umasma nanga pikin no ben teri ete.

Yesus waka tapu a watra

Mrk 6:45-52; Yoh 6:16-21

22Yesus taigi den man di ben e teki leri fu En fu den bigin go nanga a boto na a tra sei fu a meer. Dan En ben o kon te A seni a bigi grupu sma gwe. 23Baka di Yesus seni den gwe, A kren go tapu a bergi pe En wawan ben kan de fu begi. Di neti tapu na En wawan ben drape. 24A ten dati a boto ben de fara fu a syoro kba, èn wan tranga winti ben e tyari bigi skwala kon na en tapu. 25Ma musudei mamanten Yesus waka tapu a watra go na den. 26Di den man di ben e teki leri fu En si taki A e waka tapu a watra, den skreki. Den bari fu frede taki: “Na wan takrusani!” 27Ma Yesus taigi den wantron taki: “No lasi ati! Na Mi! Un no abi fu frede!” 28Dan Petrus taigi En taki: “Masra, efu na Yu, dan taigi mi meki mi waka tapu a watra kon na Yu.” 29Ne Yesus taigi en taki: “Kon!” So Petrus kmoto ini a boto, èn a bigin waka tapu a watra go na Yesus. 30Ma di Petrus si den skwala, a kon frede dan a bigin sungu. Ne a bari: “Masra, yepi mi!” 31Wantron Yesus langa En anu grabu en. Dan A taigi en taki: “A bribi fu yu pikin! Fu sanede yu no tan bribi Mi?” 32Di den go ini a boto, a winti tapu fu wai. 33Den wan di ben de ini a boto fadon tapu den kindi gi En. Den taki: “Fu tru, Yu na a Manpikin fu Gado.”

Yesus dresi den sikisma fu Genesaret

Mrk 6:53-56

34Di den doro na a tra sei fu a meer, den go na syoro na a kontren di den e kari Genesaret. 35Fa den sma drape si taki na Yesus, wantron den panya a boskopu ini a heri birti. Dan den sma tyari ala den sikisma kon na En. 36Den begi En efu den sikisma ben kan fasi a lantyi fu En krosi nomo. Èn ala sma di fasi En ben kon betre.