Sranan Tongo Bible 2016 (STB16)
1

Den afo fu Yesus Kristus

Luk 3:23-38

11Disi na den afo fu Yesus Kristus. Yesus ben de wan bakapikin fu David, nanga fu Abraham.

2Abraham ben de a p'pa fu Isak, Isak ben de a p'pa fu Yakob èn Yakob ben de a p'pa fu Yuda nanga den brada fu en. 3Nanga Tamar Yuda kisi Peres nanga Serak. Peres ben de a p'pa fu Hesron èn Hesron ben de a p'pa fu Aram. 4Aram ben de a p'pa fu Aminadab, Aminadab ben de a p'pa fu Nakson èn Nakson ben de a p'pa fu Salmon. 5Nanga Rakab Salmon kisi Boas. Nanga Ruth Boas kisi Obed èn Obed ben de a p'pa fu Isai. 6Isai ben de a p'pa fu kownu David.

David kisi Salomo nanga a frow fu Uria. 7Salomo ben de a p'pa fu Rekabeam, Rekabeam ben de a p'pa fu Abia èn Abia ben de a p'pa fu Asa. 8Asa ben de a p'pa fu Yosafat, Yosafat ben de a p'pa fu Yoram èn Yoram ben de a p'pa fu Usia. 9Usia ben de a p'pa fu Yotam, Yotam ben de a p'pa fu Akas èn Akas ben de a p'pa fu Hiskia. 10Hiskia ben de a p'pa fu Manase, Manase ben de a p'pa fu Amon èn Amon ben de a p'pa fu Yosia. 11Yosia ben de a p'pa fu Yekonya nanga den brada fu en.

1:11
2Kow 24:14-15
2His 36:10
Yer 27:20

Ini a ten dati srudati fu Babiloniakondre ben teki a kondre fu den Dyusma abra, dan den tyari den Dyusma nanga tranga gwe na Babiloniakondre.

12Baka di den tyari den gwe, Yekonya kisi Sealtiyel èn Sealtiyel ben kisi Serubabel. 13Serubabel ben de a p'pa fu Abihud, Abihud ben de a p'pa fu Elyakim èn Elyakim ben de a p'pa fu Asor. 14Asor ben de a p'pa fu Sadok, Sadok ben de a p'pa fu Akim èn Akim ben de a p'pa fu Elihud. 15Elihud ben de a p'pa fu Eleasar, Eleasar ben de a p'pa fu Matan èn Matan ben de a p'pa fu Yakob. 16Yakob ben de a p'pa fu Yosef èn Yosef ben de a masra fu Maria. Maria ben de a m'ma fu Yesus, di den sma e kari Kristus.

17So wi e teri tin-na-fo afo fu Abraham kon miti David, nanga tin-na-fo afo fu David kon miti a ten di den feyanti fu den Dyusma ben tyari den gwe na Babiloniakondre. Dan fu a ten di den Dyusma ben de ini Babiloniakondre, kon miti a ten di a Mesias gebore, wi e teri tin-na-fo afo tu.

Fa Yesus kon gebore

Luk 2:1-7

18Na so Yesus Kristus kon gebore. Maria, a m'ma fu Yesus, ben de fu trow nanga Yosef. Ma fosi den go libi makandra, Maria ben hori bere. Ma na a Santa Yeye ben meki dati psa.

1:18
Luk 1:27
19Dan fu di Yosef ben de wan bun sma, a ben wani kibri Maria fu a syen di a ben o kisi te sma ben o yere a sani disi. Fu dat'ede a ben wani prati nanga en na wan safri fasi. 20Ma di Yosef prakseri a sani dati, ne wan engel fu Masra sori ensrefi na en ini wan dren. A engel taigi en taki: “Yosef, bakapikin fu David, yu no abi fu frede fu teki Maria leki yu wefi. Bika na a Santa Yeye meki taki a de nanga bere. 21A sa kisi wan manpikin, di yu mus kari Yesus. Bika na En sa ferlusu En pipel fu den sondu.”
1:21
Luk 1:31
22Ala den sani disi psa, fu meki a sani san Masra ben meki a profeiti taki kon tru. A ben taki: 23“Luku, a yongu uma di noiti no sribi nanga wan man ete, sa kisi bere. A sa kisi wan manpikin, di den sa kari Emanuel.” Emanuel wani taki: Gado de nanga wi.
1:23
Yes 7:14
24Di Yosef wiki, a du san a engel fu Masra taigi en, a trow nanga Maria. 25Ma a no sribi nanga en leki man nanga uma te leki Maria kisi a boi. Di A gebore Yosef kari En Yesus.
1:25
Luk 2:21

2

Den koniman di kon luku Yesus

21Yesus gebore ini a foto Betlehem na ini Yudea. Ini a ten dati kownu Herodes ben de na makti ini Israel. Ini a srefi pisten dati koniman2:1 Den koniman dati ben e ondrosuku stari. di ben libi na a sei pe son e opo, kon na Yerusalem. 2Dan den aksi den sma taki: “Pe a Kownu fu den Dyusma de di gebore? Bika wi si wan spesrutu stari na a sei pe son e opo di e sori taki A gebore. Dat' meki wi kon fu anbegi En.” 3Kownu Herodes skreki di a yere a sani dati. Ala den sma fu Yerusalem skreki tu. 4Dan Herodes meki ala den prenspari priester nanga den sabiman fu Gado wèt kon makandra. Dan a aksi den pe a Mesias ben o gebore. 5Den man taigi en taki: “Ini Betlehem na ini Yudea. Bika a profeiti ben skrifi taki: 6Betlehem ini Yudea, yu na wan fu den moro prenspari foto mindri den foto fu Yuda, bika na ini yu a fesiman sa kmoto di sa tiri Mi pipel Israel.”

2:6
Mika 5:1
7Dan Herodes seni kari den koniman tapu wan kibri fasi, fu aksi den fin'fini oten den si a stari fu a fosi leisi. 8Baka dati a taigi den taki: “Un go suku a pikin alasei fu Betlehem. Te un feni en, un mus kon taigi mi wantron, bika mi wani go fu anbegi En tu.” 9-10Di den koniman arki san Herodes taki, den gwe. Ne den si a stari baka di den ben si na a sei pe son e opo. Den man ben prisiri srefsrefi di den si a stari. Ne a stari go na den fesi te kon miti a presi pe a pikin ben de. 11Di den go ini a oso, den si a pikin nanga en m'ma Maria. Ne den fadon tapu den kindi èn den anbegi a pikin. Dan den puru den diri sani di den ben tyari gi a pikin kon na doro: gowtu, wierook, nanga mirre. 12Ma Gado warskow den man ini wan dren fu no drai go moro na Herodes. So den teki wan tra pasi drai go baka na den kondre.

Yosef nanga Maria lowe go na Egipte

13Di den koniman gwe, ne wan engel fu Masra sori ensrefi na Yosef ini wan dren. A engel taki: “Opo, teki a pikin nanga en m'ma, dan un lowe go na Egipte. Un mus tan drape te leki mi sa taigi unu taki un kan drai kon baka. Bika Herodes sa meki den suku a pikin fu kiri en.” 14So Yosef opo, a teki a pikin nanga en m'ma, dan a srefi neti dati den teki pasi go na Egipte. 15Den tan drape te leki Herodes dede. Dan na so a sani san Masra ben meki a profeiti taki kon tru. A ben taki: “Fu Egipte Mi kari Mi Manpikin.”

2:15
Hos 11:1

Herodes kiri den pikin

16Ma di Herodes kon ferstan taki den koniman hori en na spotu, en ati teki faya. Dat' meki a seni srudati fu kiri ala pikin boi te nanga tu yari na ini Betlehem nanga a heri kontren drape. Bika di a aksi den, den koniman ben taigi en taki na sowan pisten kba di den ben si a stari. 17Di Herodes kiri den pikin, a sani san a profeiti Yeremia ben taki kon tru. A ben taki: 18“Furu krei nanga dyeme de fu yere ini Rama. Na Rachel e krei fu en pikin ede. A no wani fu sma trowstu en, bika den pikin no de moro.”

2:18
Yer 31:15

Den drai go baka na Israel

19Baka di Herodes dede, ne wan engel fu Masra kon sori ensrefi na Yosef na ini wan dren di a ben de ini Egipte ete. 20A engel taki: “Opo, teki a pikin nanga en m'ma, dan un drai go baka na Israel. Bika den sma dede di ben wani kiri a pikin.” 21So Yosef opo, a teki a pikin nanga en m'ma, dan den go na Israel. 22Ma di Yosef yere taki Arkelaus ben tron kownu fu Yudea na a presi fu en p'pa Herodes, a kon frede fu go drape. Dan fu di Gado warskow en na ini wan dren, a go na Galilea. 23Di den doro drape, den go libi ini wan foto di den e kari Nasaret. Na so a sani san den profeiti ben taki kon tru. Den ben taki: “Den o kari En wan Nasaretsma.”

2:23
Mrk 1:24
Luk 2:39
Yoh 1:45

3

Yohanes a Dopuman

Mrk 1:2-8; Luk 3:1-17; Yoh 1:6,19-34

31Someni yari na baka, Yohanes a Dopuman bigin preiki ini a dreisabana fu Yudea. 2A taigi den sma taki: “Un drai un libi, bika her'esi Gado o bigin tiri libisma.”

3:2
Mat 4:17
Mrk 1:15
3A profeiti Yesaya ben taki fu Yohanes di a taki: “Wan sma e bari wroko ini a dreisabana taki: ‘Meki pasi klari gi Masra, puru ala boktuboktu gi En.’ ”
3:3
Yes 40:3
4Yohanes ben e weri krosi di meki fu kameel-wiwiri, èn a ben e tai wan leribuba na en bere. A ben e nyan sprenka nanga bus'oni.
3:4
2Kow 1:8
5Dan den sma fu Yerusalem, nanga den sma fu heri Yudea, sosrefi den sma fu a heri kontren na a Yordanliba, hari go na Yohanes. 6Dan a dopu den ini a Yordanliba te den ben taki sortu sondu den du.

7Furu fu den Fariseiman nanga Saduseiman kon na Yohanes fu teki dopu tu. Ma di a si den, a taigi den taki: “Un sneki unu! Suma gi un wan pingi fu lon gi a strafu fu Gado di de fu kon?

3:7
Mat 12:34
23:33
8Efu trutru un drai un libi, meki a de fu si dan. 9Un no mus prakseri taki un kan taigi unsrefi taki: ‘Wi na bakapikin fu Abraham.’ Bika mi e taigi un taki: Gado kan meki den ston disi tron bakapikin fu Abraham.
3:9
Yoh 8:33
10A aksi de klar'klari kba na den rutu fu den bon. Ibri bon di no e gi bun froktu den o kapu puru èn fringi go ini a faya.
3:10
Mat 7:19
11Mi e dopu unu nanga watra leki wan marki taki un drai un libi. Ma a Wan di e kon na mi baka abi makti moro mi. Mi no warti srefi fu tyari En susu gi En fu A weri. Na En o dopu unu nanga a Santa Yeye èn nanga faya. 12A hori En wrokosani na ini En anu fu wai a buba puru ini a graan. A graan A o poti na ini maksin, ma den buba A o bron na ini faya di no man dede.”

A dopu fu Yesus

Mrk 1:9-11; Luk 3:21-22; Yoh 1:32-34

13Yesus kmoto fu Galilea go na Yohanes na a Yordanliba, fu Yohanes dopu En. 14Ma Yohanes no ben wani dopu En. A taigi En taki: “Fa Yu kan kon na mi fu mi dopu Yu? Na Yu mus dopu mi!” 15Ma Yesus piki en taki: “Yu kan dopu Mi, bika a fiti fu un du ala sani soleki fa Gado wani.” Dan Yohanes dopu Yesus. 16Fa Yesus dopu, A kmoto wantron na ini a watra. Ne heimel opo, èn Yohanes si fa a Yeye fu Gado saka leki wan doifi kon tapu Yesus. 17Dan wan sten kmoto fu heimel taki: “Disi na Mi Manpikin di Mi lobi. Mi abi prisiri nanga En.”

3:17
Gen 22:2
Psa 2:7
Yes 42:1
Mat 12:18
17:5
Mrk 1:11
Luk 9:35