Sranan Tongo Bible 2016 (STB16)
4

Didibri tesi Yesus

Mrk 1:12-13; Luk 4:1-13

41Baka dati a Santa Yeye tyari Yesus go na ini a dreisabana fu didibri tesi En.

4:1
Heb 2:18
4:15
2Yesus tan drape fotenti dei nanga fotenti neti sondro fu nyan. Baka dati angri bigin kiri En. 3Dan didibri go tesi Yesus. A taigi En taki: “Efu Yu na a Manpikin fu Gado, taigi den ston disi fu den tron brede.” 4Ma Yesus piki en taki: “A skrifi taki: ‘Wan sma no sa libi fu brede wawan, ma fu ala wortu di Gado e taki.’ ”
4:4
Deu 8:3
5Baka dati didibri tyari Yesus go na a santa foto Yerusalem, dan a poti En tnapu na a lantyi fu a daki fu a tempel. 6A taigi En taki: “Efu Yu na a Manpikin fu Gado, trowe Yusrefi go na gron. Bika a skrifi taki: ‘Gado sa seni den engel fu En fu tyari Yu na tapu den anu, fu Yu no stotu Yu futu na wan ston.’ ”
4:6
Psa 91:11-12
7Ma Yesus piki en taki: “A skrifi tu taki: ‘Yu no mus tesi Masra yu Gado.’ ”
4:7
Deu 6:16
8Te fu kba didibri tyari Yesus go tapu wan bun hei bergi. A sori En ala den kondre fu grontapu, nanga a gudu fu den. 9Dan a taigi En taki: “Mi sa gi Yu ala den sani dati, efu Yu fadon tapu Yu kindi fu anbegi mi.” 10Ne Yesus piki en taki: “Kmoto na Mi tapu, Satan! Bika a skrifi taki: ‘Yu mus anbegi Masra yu Gado èn na En wawan yu mus dini.’ ”
4:10
Deu 6:13
11So didibri gwe libi Yesus. Ne engel kon sorgu gi En.

Yesus bigin nanga En wroko

12Di Yesus yere taki den poti Yohanes a Dopuman na ini straf'oso, A go na Galilea.

4:12
Mat 14:3
Mrk 6:17
Luk 3:19-20
13A no tan ini Nasaret, ma A go libi ini Kafarnaum di ben de sei a Meer fu Galilea, ini a kontren fu den bakapikin fu Sebulon nanga Naftali.
4:13
Yoh 2:12
14Na so a sani san a profeiti Yesaya ben taki kon tru. 15A ben taki: “Un arki, sma fu Sebulon nanga Naftali, di e libi na a pasi di e go na se, ini a kontren di de na a tra sei fu a Yordanliba, un sma fu Galilea, pe furu sma e tan di no de Dyu:
4:15-16
Yes 8:23—9:1
16Unu di e libi na ini dungru si wan bigi faya. Unu di e libi ini a kondre pe un de fu dede, wan faya opo kon gi unu.” 17Bigin fu a ten dati Yesus bigin taigi den sma taki: “Un drai un libi, bika her'esi Gado o bigin tiri libisma.”
4:17
Mat 3:2

Den fosi man di bigin teki leri fu Yesus

Mrk 1:16-20

18Di Yesus ben e waka na a syoro fu a Meer fu Galilea, A si tu fis'man di ben e fisi nanga den tyasneti. Den tu man disi ben de brada. A wan ben nen Simon, di den sma ben e kari Petrus, èn a trawan ben nen Andreas. 19Yesus taigi den taki: “Un kon waka nanga Mi, dan Mi o meki un tron fis'man fu libisma.” 20Wantron den man poti den tyasneti na wan sei, dan den bigin waka na Yesus baka. 21Di den waka pikinso moro fara, Yesus si tu tra brada, Yakobus nanga Yohanes. Den ben de ini wan boto nanga den p'pa Sebedeus e lapu den tyasneti. Dan Yesus kari den. 22Wantron den libi a boto nanga den p'pa, dan den bigin waka na Yesus baka.

Yesus bigin leri den sma

23Yesus waka ini heri Galilea, èn A gi den sma leri ini den kerki. A ferteri den sma a bun nyunsu taki Gado o bigin tiri libisma, èn A dresi ala sortu siki di den sma ben abi.

4:23
Mat 9:35
Mrk 1:39
24Dan a nyunsu fu Yesus panya go te na ini heri Siria. So den tyari ala sma di ben siki tranga kon na Yesus: sma nanga ala sortu siki nanga hebi skin-ati, sma nanga takruyeye na den tapu, nanga sma di ben e kisi stoipi. Srefi sma di ben lan den ben tyari kon na Yesus. Dan Yesus meki ala den sma dati kon betre. 25Bun furu sma ben e waka na Yesus baka: sma fu Galilea, sma fu Dekapolis, sma fu Yerusalem, sma fu Yudea, nanga sma fu a tra sei fu a Yordanliba.

5

Yesus gi leri tapu wan bergi

Luk 6:20-23

51Di Yesus si ala den sma di ben e waka na En baka, A kren go sidon tapu wan bergi. Dan den sma di ben e teki leri fu En teki presi lontu En. 2Dan Yesus bigin leri den taki:

3“Den sma di kon si taki den abi Gado fanowdu na blesi sma,

bika A e tiri den leki Kownu.

4Den sma di e sari na blesi sma,

bika Gado sa trowstu den.

5:4
Yes 61:2-3

5Den sma di abi sakafasi na blesi sma,

bika heri grontapu sa de fu den.

5:5
Psa 37:11

6Den sma di abi wan tranga angri fu de bun ini Gado ai na blesi sma,

bika A sa gi den san den wani.

5:6
Yes 55:1-2

7Den sma di abi sari-ati nanga trawan na blesi sma,

bika Gado sa abi sari-ati nanga den.

8Den sma di e dini Gado wawan na blesi sma,

bika den sa si En.

5:8
Psa 24:3-4

9Den sma di e tyari freide kon mindri trawan na blesi sma,

bika Gado sa kari den En pikin.

10Den sma di trawan de na den baka fu du den ogri,

fu di den bun ini Gado ai,

na blesi sma,

bika Gado e tiri den leki Kownu.

5:10
1Pe 3:14

11Yu na wan blesi sma te sma e broko yu saka, te den de na yu baka fu du yu ogri, èn te den e lei èn taki ala sortu takru fu yu, fu di yu e waka na Mi baka.
5:11
1Pe 4:14
12Yu mus prisiri, yu mus breiti, bika wan bigi pai e wakti yu na heimel. Bika na so den ben du nanga den fosten profeiti tu.”
5:12
2His 36:16
Bosk 7:52

Sowtu nanga faya fu grontapu

13“Yu de leki sowtu gi den sma na grontapu. Ma efu sowtu lasi en tesi, fa a o kon sowtu baka? Yu no man du noti moro nanga en, dan fu trowe en gwe meki sma waka na en tapu.

5:13
Mrk 9:50
Luk 14:34-35

14Yu de leki wan faya gi den sma na grontapu. Wan foto di de na tapu wan bergi no kan tan kibri.

5:14
Yoh 8:12
9:5
15Yu no e leti wan kokolampu, dan yu e poti en ondro wan embre. Ma yu e poti en tapu wan tafra fu a gi faya na ala sma ini a oso.
5:15
Mrk 4:21
Luk 8:16
11:33
16Na so a faya fu yu mus de fu si gi trawan, fu den kan si den bun wroko fu yu. Dan den o gi yu P'pa na heimel bigi nen.”
5:16
1Pe 2:12

Yesus nanga a wèt fu Moses

17“Yu no mus prakseri taki Mi kon fu poti a wèt nanga den sani di den profeiti skrifi na wan sei. Mi no kon fu poti den na wan sei, ma Mi kon fu du san den e taki. 18Bika fu tru Mi e taigi un taki: Solanga heimel nanga grontapu sa de, no wan pikin pisi fu san skrifi ini a wèt sa kmopo. Ala san skrifi sa psa.

5:18
Luk 16:17
19Dat' meki a sma di e poti a moro pikin pisi srefi fu den wèt na wan sei, dan a e leri trawan fu du a srefi sani, a sma dati sa kisi a moro lagi presi na mindri den sma di Gado e tiri. Ma a sma di e du san den wèt e taki, èn a e leri trawan fu du a srefi sani, sa kisi wan hei presi na mindri den sma di Gado e tiri. 20Bika Mi e taigi un taki: Efu yu no e libi moro bun ini Gado ai moro den sabiman fu Gado wèt nanga den Fariseiman, dan noiti yu o man tron wan sma di Gado e tiri.”

No hori trawan na ati

21“Un yere taki a wèt fu Moses leri den bigisma fu unu taki: ‘Un no mus kiri wan tra sma,’ èn owktu taki: ‘Krutubakra sa leisi strafu gi a sma di du a sani dati.’

5:21
Eks 20:13
Deu 5:17
22Ma Mi e taigi un taki: Suma ati e bron nanga en brada sa fadon ini anu fu krutubakra. A sma di sa kari en brada ‘don kaw,’ o fadon ini anu fu a grankrutu, èn a sma di sa kari en brada ‘lawman,’ o feni ensrefi te ini a faya fu hel. 23Dat' meki efu yu e tnapu fesi a altari fu tyari wan ofrandi gi Gado, ma yu memre taki yu brada abi wan sani nanga yu, 24libi a ofrandi let' drape dan yu go meki en bun nanga yu brada. Baka dati yu kan drai kon baka fu tyari a ofrandi gi Gado. 25Efu wan sma di abi wan sani nanga yu, e tyari yu go na krutu, dan yu mus meki muiti fu meki en es'esi bun nanga en fosi un doro drape. Bika te un doro drape a sa gi yu abra na a krutubakra. Dan a dati sa gi yu abra na skowtu, di sa poti yu na ini straf'oso. 26Fu tru Mi e taigi yu taki: Yu no o kmoto drape solanga yu no pai te nanga a laste koprosensi.”

No huru

27“Un yere taki a skrifi taki: ‘Yu no mus huru.’

5:27
Eks 20:14
Deu 5:18
28Ma Mi e taigi un taki: A sma di luku wan uma nanga a prakseri taki a wani en, huru na ini en ati nanga a uma dati kba. 29Dat' meki efu yu let' ai meki yu sondu, diki en puru dan yu trowe en gwe. Bika a moro bun gi yu taki wan pisi nomo fu yu skin e lasi, dan taki yu feni yusrefi nanga yu heri skin ini hel.
5:29
Mat 18:9
Mrk 9:47
30Efu na yu let'anu meki yu sondu, kapu en puru dan yu trowe en gwe. Bika a moro bun gi yu taki wan pisi nomo fu yu skin e lasi, dan taki yu feni yusrefi nanga yu heri skin ini hel.”
5:30
Mat 18:8
Mrk 9:43

No broko trow

31“A skrifi tu taki: ‘Wan man di e prati nanga en uma, mus gi en wan brifi di e sori taki a trow broko.’

5:31
Deu 24:1-4
Mat 19:7
Mrk 10:4
32Ma Mi e taigi un taki: Wan man no mus broko trow nanga en uma sondro taki a uma ben huru gi en. Efu a man du dati, a e meki taki a uma libi wan huru libi efu a trow baka, èn a e meki a man di trow nanga en libi wan huru libi tu.”
5:32
Mat 19:9
Mrk 10:11-12
Luk 16:18
1Kor 7:10-11

No meki sweri

33“Un yere tu taki a wèt fu Moses leri den bigisma fu unu taki: ‘Yu no sa broko wan sweri di yu meki, ma yu sa du san yu sweri gi Masra.’

5:33 a
Lev 19:12
34Ma Mi e taigi un taki: Yu no mus meki sweri kwet'kweti. No sweri na heimel, bika heimel na a kownusturu fu Gado.
5:34 a
Yak 5:12
35Yu no mus sweri na grontapu, bika grontapu na a futubangi fu Gado. Yu no mus sweri na Yerusalem, bika Yerusalem na a foto fu a bigi Kownu.
5:35 a
Yes 66:1
36No sweri tu na yu ede, bika yu no kan meki no wan fu yu edewiwiri kon blaka noso weti. 37So dan, meki te yu e taki ‘iya,’ a tan ‘iya,’ èn meki te yu e taki ‘no,’ a tan ‘no.’ Bika ala san yu e taki moro leki dati, kmoto fu didibri.”

No pai ogri nanga ogri

Luk 6:27-36

38“Un yere taki a skrifi taki: ‘Efu wan sma naki wan trawan broko en ai, den mus broko a ai fu a sma dati baka. Èn efu wan sma naki wan trawan broko en tifi, den mus broko a tifi fu a sma dati baka.’

5:38
Eks 21:24
Lev 24:20
Deu 19:21
39Ma Mi e taigi un taki: No meki trobi nanga a sma di e du yu ogri. Efu wan sma naki yu na a let'sei fu yu fesi, drai a tra sei gi en tu. 40Efu wan sma tyari yu go na krutu fu yu empi ede, gi en a dyakti fu yu tu. 41Efu wan sma dwengi yu fu tyari a lai fu en wan kilometer,5:41 Den Romeini srudati di ben tiri Israel a ten dati, ben kisi a makti fu dwengi den Dyusma fu tyari a lai fu den wan kilometer. tyari en tu kilometer gi en. 42Efu wan sma aksi yu wan sani, gi en san a aksi. Èn efu a wani leni wan sani fu yu, leni en.”

Fa fu lobi tra sma

43“Un yere taki a skrifi taki: ‘Yu mus lobi yu mati, èn yu mus hori yu feyanti na ati.’

5:43
Lev 19:18
44Ma Mi e taigi un taki: Lobi yu feyanti, èn begi gi den sma di de na yu baka fu du yu ogri. 45Dan so yu sa de wan trutru pikin fu yu P'pa di de na heimel. Bika A e meki a son opo gi den sma di e du ogri, nanga gi den sma di e du bun. A e meki alen kon gi den sma di bun ini En ai, nanga den sma di no bun ini En ai. 46Bika efu yu lobi soso den sma di lobi yu, sortu pai yu abi? Bika srefi den man di e piki lantimoni e du dati. 47Efu yu e gi odi soso na den sma nanga san yu de bun, dan na wan aladei sani yu e du. Den sma di no sabi Gado e du a srefi sani. 48Ma yu mus bun dorodoro, soleki fa yu P'pa na heimel bun dorodoro.”
5:48
Lev 19:2
Deu 18:13

6

Fa fu gi tra sma wan sani

61“Sorgu taki te yu e du tra sma wan bun, yu no e du en fu sma si. Noso yu no abi pai na yu P'pa di de na heimel.

6:1
Mat 23:5
2Te yu e gi wan pôtisma wan sani, no du en nanga pranpran. Bika na so den hoigriman e du ini den kerki nanga tapu strati, soso fu sma kan gi den grani. Fu tru Mi e taigi un taki: Den kisi den pai kba. 3Ma te yu e gi wan pôtisma wan sani, yu kruktu-anu no mus sabi san yu let'anu e du. 4Na so a e tan wan kibri sani. Dan yu P'pa di si san yu du, sa pai yu.”

A yoisti fasi fu begi

5“Te yu e begi, yu no mus de leki den hoigriman. Bika den lobi fu tnapu begi ini den kerki nanga tapu uku fu strati fu sma kan si den. Fu tru Mi e taigi un taki: Den kisi den pai kba.

6:5
Luk 18:10-14
6Ma te yu e begi, go na ini yu kamra èn tapu a doro. Dan yu e taki nanga yu P'pa di no wan sma e si. Ma yu P'pa di e si yu drape, sa pai yu.

7Te yu e begi yu no mus begi langabere begi leki den sma di no sabi Gado. Bika den e prakseri taki te den begi langa, den o kisi san den e aksi. 8Yu no mus begi leki den, bika yu P'pa sabi san yu abi fanowdu fosi yu aksi En. 9Ma disi na a fasi fa yu mus begi:

Wi P'pa di de na heimel,

Yu nen mus de santa.6:9 Un kan puru a pisi disi so tu: sma mus abi bigi lespeki gi Yu nen.

10Kon tiri wi,

meki Yu wani psa na grontapu

soleki fa a e psa na heimel.

11Gi wi tide a nyanyan di wi abi fanowdu.

12Gi wi pardon fu wi sondu,

soleki fa wi e gi trawan pardon

di du wi wan sani.

13No meki tesi kon na wi pasi,

ma kibri wi fu didibri.

Bika na Yu na a Kownu,

èn ala makti nanga ala glori

na fu Yu, fu têgo. Amen.6:13 Wantu manuscript no abi a laste pisi fu vers 13.

14Bika efu yu e gi sma pardon di du yu wan sani, yu P'pa na heimel sa gi yu pardon tu.
6:14-15
Mrk 11:25-26
15Ma efu yu no e gi sma pardon, yu P'pa no sa gi yu pardon tu.”

Te yu e faste

16Yesus taigi den moro fara taki: “Te yu e faste, yu no mus poti wan sari fesi leki den hoigriman. Bika den e masi den fesi soso fu sma kan si taki den e faste. Fu tru Mi e taigi un taki: Den kisi den pai kba. 17Ma te yu e faste, yu mus wasi yu fesi èn yu mus kan yu wiwiri. 18Sma no abi fu sabi taki yu e faste, ma soso yu P'pa di no wan sma e si. Dan yu P'pa di e si san yu e du na wan kibri fasi, sa pai yu.”

Grontapu gudu nanga heimel gudu

19“Yu no mus suku gudu dyaso na grontapu, pe kakalaka e nyan den, pe frustu e meki den pori gwe, èn pe fufuruman kan broko kon ini yu oso, fufuru den.

6:19-21
Yak 5:2-3
20Ma meki yu gudu de na heimel, pe kakalaka no man nyan den, pe frustu no man meki den pori gwe, èn pe fufuruman no man broko kon ini yu oso, fufuru den. 21Bika pe yu gudu de, na drape yu ati o de tu.

22Yu ai de leki wan lampu di e tyari leti gi yu skin. Efu yu ai krin, yu heri libi o krin. 23Ma efu yu ai dungru, dan yu heri libi o dungru. Sobun, efu a sani di mus tyari leti kon gi yu, tyari dungru kon, a no spotu dungru yu libi sa dungru.

24No wan sma kan wroko gi tu basi. Bika a sa hori a wan na ati, dan a lobi a trawan. Noso a sa lespeki a wan, ma a no teri a trawan. Yu no kan dini Gado makandra nanga den gudu fu grontapu.”

No broko yu ede

Luk 12:22-31

25“Fu dat'ede Mi e taigi un taki: No broko yu ede nanga san yu o nyan noso dringi fu tan na libi, noso san yu o weri fu tapu a skin. A libi warti moro leki nyanyan, èn yu skin warti moro leki krosi. 26Luku den fowru di e frei na loktu. Den no e prani, den no e koti, den no e kibri nyanyan ini maksin. Ma toku un P'pa na heimel e gi den nyanyan. Un no warti moro leki den fowru dan? 27Sortu wan fu unu kan meki taki a e libi pikinso moro langa te a e broko en ede? 28Fu sanede yu e broko yu ede nanga krosi? Luku fa den bromki e gro. Den no e wroko èn den no e meki krosi. 29Ma Mi e taigi un taki: Wan bigi kownu leki Salomo srefi no ben man weri so moi leki den bromki disi.

6:29
1Kow 10:4-7
2His 9:3-6
30We, efu Gado e weri so moi krosi gi a grasi di e gro tide èn di sma e bron tamara, A no sa weri moro moi wan gi yu dan? Fa yu bribi pikin so? 31Dat'ede yu no mus broko yu ede nanga san yu o nyan, san yu o dringi, noso san yu o weri. 32Bika na sma di no sabi Gado e broko den ede nanga den sani disi. Ma yu P'pa na heimel sabi taki yu abi ala den sani disi fanowdu. 33Ma tapu a fosi presi yu mus suku fu de ondro a tiri fu Gado, èn fu libi bun ini En ai, dan A sa gi yu ala den sani disi tu. 34So, no broko yu ede nanga a dei fu tamara. Tamara sa abi en eigi broko-ede. Den broko-ede fu wan dei sari kba.”