Sranan Tongo Bible 2016 (STB16)
8

Yesus dresi wan gwasiman

Mrk 1:40-45; Luk 5:12-16

81Di Yesus saka kmoto fu a bergi, bun furu sma ben e waka na En baka. 2Ne wan gwasiman kon na Yesus, a saka tapu en kindi na En fesi, dan a taigi En taki: “Masra, efu Yu wani, Yu kan meki mi skin kon bun baka.”

3Yesus langa En anu fasi a man, dan A taki: “Iya, Mi wani. Kon betre!” A srefi momenti dati a man skin fu a man kon bun baka. 4Dan Yesus taigi a man taki: “Sorgu taki yu no e ferteri no wan sma san psa nanga yu. Ma yu mus go na a priester, meki a ondrosuku yu fu a kan si taki yu kon betre. Dan fu sori ala sma taki yu kon betre, yu mus tyari a ofrandi gi Gado leki fa Moses skrifi taki yu mus du.”

8:4
Lev 14:1-32

A bribi fu wan Romeini ofisiri

Luk 7:1-10

5Di Yesus doro na a foto Kafarnaum, wan Romeini ofisiri kon begi En wan sani. 6A taki: “Masra, a knekti fu mi didon na oso. A lan èn a abi hebi skin-ati.” 7Yesus piki a man taki: “Mi sa go dresi en.” 8Ma a edeman piki en taki: “Masra, mi no warti fu Yu kon ini mi oso. Ma efu Yu taki wan wortu nomo, dan a knekti fu mi o kon betre. 9Bika mi srefi e wroko ondro trawan, èn mi abi srudati di de ondro mi. Efu mi taigi wan fu den taki: ‘Go drape,’ a e go. Efu mi taigi wan trawan taki: ‘Kon dyaso,’ a e kon. Efu mi taigi mi srafu taki: ‘Du disi,’ a e du en.” 10Di Yesus yere san a man taki, A ferwondru. Dan A taigi den sma di ben e waka na en baka taki: “Fu tru Mi e taigi un taki: Na ini heri Israel Mi no feni no wan sma nanga sowan bigi bribi. 11Mi e taigi un taki: Te Gado o bigin tiri libisma, furu sma sa kmoto na ala sei fu grontapu fu sidon nyan makandra nanga Abraham, Isak nanga Yakob.

8:11
Luk 13:29
12Ma den sma di ben mus de ondro a tiri fu Gado, den o fringi go na dorosei ini a dungru. Drape den sa krei èn kaw den tifi.”
8:12
Mat 22:13
25:30
Luk 13:28
13Dan Yesus taigi a ofisiri taki: “Yu kan go. A sa psa soleki fa yu e bribi.” A srefi ten dati a knekti kon betre.

Yesus dresi furu sma

Mrk 1:29-34; Luk 4:38-41

14Baka dati Yesus go na Petrus oso. Drape A si taki a m'ma fu a uma fu Petrus ben didon nanga korsu. 15Ne Yesus fasi a uma na en anu, èn a korsu saka. Dan a uma opo go poti nyanyan nanga dringi gi Yesus.

16Di neti tapu, den tyari furu sma di ben abi takruyeye na den tapu, kon na Yesus. Na taki wawan A ben taki, dan den takruyeye gwe libi den sma. A dresi ala den sikisma tu. 17Na so a sani san a profeiti Yesaya ben taki kon tru. A ben taki: “A tyari den swakifasi fu wi, èn a teki wi siki na en tapu.”

8:17
Yes 53:4

Den man di ben wani waka na Yesus baka

Luk 9:57-60

18Di Yesus si fa wan heri ipi sma ben e lontu En, A taigi den man di ben e teki leri fu En taki: “Meki un abra go na a tra sei fu a meer.” 19Ma dan wan sabiman fu Gado wèt kon na En. A taigi En taki: “Meister, mi sa go nanga Yu ala sei pe Yu e go.” 20Yesus piki en taki: “Krab'dagu abi den olo, èn den pikinfowru abi den nesi. Ma a Manpikin fu Libisma no abi wan presi fu kanti En ede.” 21Dan wan tra man di ben e teki leri fu En, taigi En taki: “Masra, gi mi a okasi fu go beri mi p'pa fosi.” 22Ma Yesus piki en taki: “Kon nanga Mi, èn meki den dedewan beri den eigi dede.”

Yesus tapu wan bigi sek'watra

Mrk 4:35-41; Luk 8:22-25

23Dan Yesus go ini a boto èn den man di ben e teki leri fu En go na En baka. 24Ma di den e koti abra, wantron so wan tranga winti bigin wai tapu a watra, taki den skwala ben e naki go ini a boto. Ma Yesus ben e sribi. 25Ne den man go wiki En taki: “Masra, yepi wi! Wi e dede!” 26Yesus piki den taki: “Fu sanede un e frede so? A bribi fu un pikin!” Dan A opo, A bari a winti nanga a watra, èn wantron ala sani kon tiri. 27Den man ferwondru. Den taki: “Suma na a man disi? Winti nanga watra srefi e du san A e taki!”

Yesus puru takruyeye tapu tu man

Mrk 5:1-20; Luk 8:26-39

28Di Yesus doro na abrasei ini a kontren fu den sma fu Gadara, tu man di ben abi takruyeye na den tapu, waka kon miti En. Den man disi ben kmoto ini a berpe, èn den ben ogri sote taki no wan sma no ben man psa drape. 29Dan den man bari taki: “Yu Manpikin fu Gado, san Yu wani nanga unu? Na kon Yu kon dyaso fu pina wi fosi a ten doro?” 30Krosbei fu drape wan bigi ipi agu ben e nyan. 31Ne den takruyeye begi Yesus taki: “Efu Yu o yagi un puru na tapu den man, dan tangitangi, seni un go na ini den agu.” 32Yesus taigi den taki: “Kmopo fu dyaso!” Dan den takruyeye kmopo na den man tapu, go na ini den agu. Ne ala den agu lon saka fu a bergi go ini a meer, dan den dede ini a watra. 33Den man di ben e luku den agu, lon gwe. Den lon go na ini a foto, dan den ferteri ala sani san den si, sosrefi san ben psa nanga den man di ben abi den takruyeye na den tapu. 34Dan ala sma kmopo fu a foto go miti Yesus. Di den si En, den aksi En tangitangi fu A gwe libi a kontren fu den.

9

Yesus dresi wan lanman

Mrk 2:1-12; Luk 5:17-26

91So Yesus go ini wan boto, dan A koti a Meer fu Galilea abra go na a foto pe A ben e libi. Ne den sma tyari wan lanman na tapu wan bedi kon na En. 2Di Yesus si a bribi fu den, A taigi a lanman taki: “Mi mati, no frede. Yu kisi pardon fu yu sondu.” 3Ma wantu fu den sabiman fu Gado wèt taki na ini densrefi taki: “Fa a man disi kan taki so? A e afrontu Gado!” 4Ma Yesus ben sabi san den e prakseri, dat' meki A taigi den taki: “Fu sanede un e prakseri takru sani ini un ati? 5Bika san moro makriki? Fu taigi a man taki a kisi pardon fu en sondu, noso fu taigi en fu a opo waka? 6Ma Mi o sori unu taki a Manpikin fu Libisma abi makti dyaso na grontapu fu gi sma pardon fu sondu.” Dan Yesus taigi a lanman taki: “Opo, teki yu bedi, dan yu go na oso.” 7Ne a man opo, dan a go na en oso. 8We, di den sma si a sani dati, den kisi bigi lespeki gi Gado. Den gi Gado glori fu di A gi libisma sowan makti.

Yesus kari Mateus

Mrk 2:13-17; Luk 5:27-32

9Di Yesus kmoto fu drape e gwe moro fara, A si wan man di ben nen Mateus. A ben sidon pe den sma ben mus kon pai lantimoni. Yesus taigi en taki: “Kon nanga Mi!” Ne Mateus opo èn a bigin waka na Yesus baka. 10Bakaten Yesus go nyan na Mateus oso. Furu fu den man di e piki lantimoni, nanga tra sondusma, ben sidon e nyan makandra nanga Yesus nanga den man di ben e teki leri fu En.

9:10-11
Luk 15:1-2
11Di den Fariseiman si a sani dati, den aksi den man di ben e teki leri fu Yesus taki: “Fu sanede a Meister fu unu e nyan makandra nanga den man di e piki lantimoni, èn nanga den sondusma?” 12Ma di Yesus yere san den man aksi, A piki den taki: “Sma di gesontu no abi datra fanowdu, ma na sma di e siki abi datra fanowdu. 13Un go ondrosuku san Gado wani taki nanga a sani disi: ‘Mi no wani den meti di un e tyari leki ofrandi gi Mi, ma Mi wani fu un abi sari-ati nanga trawan.’ Mi no kon fu kari bun sma, ma Mi kon fu kari sondusma.”
9:13
Hos 6:6
Mat 12:7

A ten fu faste

Mrk 2:18-22; Luk 5:33-39

14Baka dati wantu fu den man di ben e teki leri fu Yohanes a Dopuman kon na Yesus, dan den aksi En taki: “Wi nanga den Fariseiman gwenti fu faste. Ma fu sanede den man fu Yu no e du dati?” 15Yesus piki den taki: “Sma di de na wan trow-oso no e sari solanga a trowmasra de drape nanga den. Ma a ten o kon taki den o puru a trowmasra na den mindri. Dan den sa faste. 16No wan sma e lapu wan owru krosi nanga wan pisi nyun wan. Bika te a nyun wan o krempi, a o hari a owru wan priti èn a olo o kon moro bigi. 17Sosrefi yu no e poti win di no lepi ete na ini winsaka di kon owru kba, noso den saka o priti èn yu o lasi a win nanga den saka. Fu dat'ede yu e poti win di no lepi ete na ini nyun winsaka, fu ala tu kan tan bun.”

Yesus abi makti abra siki nanga dede

Mrk 5:21-43; Luk 8:40-56

18Yesus no ben kba taki nanga den man fu Yohanes ete, di wan edeman fu a kerki kon na En. A man fadon tapu en kindi fesi Yesus, dan a taigi En taki: “Masra, didyonsro mi umapikin dede. Ma efu Yu kon poti Yu anu na en tapu, a o libi baka.” 19So Yesus opo, dan En nanga den man di ben e teki leri fu En go nanga a man. 20Ma di den ben de na pasi, wan uma waka mindri den sma kon baka Yesus, dan a fasi a lantyi fu En krosi. Twarfu yari langa a uma disi ben e lasi brudu kba. 21A uma ben prakseri taki: “Efu mi kan fasi En krosi nomo, mi o kon betre.” 22Yesus drai luku a uma, dan A taigi en taki: “No frede, Mi pikin, a bribi fu yu meki yu kon betre.” A srefi momenti dati a uma kon betre.

23Di Yesus doro na a oso fu a edeman, A si den sma di ben e prei dede-oso singi, nanga wan bigi grupu sma di ben e krei. 24Dan A taigi den sma taki: “Un kan gwe. A pikin no dede, na sribi a e sribi.” Ma den sma bigin lafu Yesus. 25Baka di den poti ala den sma na dorosei, Yesus go inisei pe a pikin ben didon. A hori en na en anu, dan a pikin opo. 26A tori disi panya na ini a heri kontren drape.

Yesus dresi tu breniman

27Di Yesus kmoto fu drape e gwe moro fara, tu breniman bigin waka na En baka e bari taki: “Manpikin fu David,9:27 Den Dyusma ben sabi taki a Mesias ben o gebore leki wan bakapikin fu kownu David. Na dati meki den ben kari Yesus furu leisi: Manpikin fu David. abi sari-ati nanga wi!” 28Di Yesus go ini wan oso, den breniman kon na En. Dan Yesus aksi den taki: “Un e bribi taki Mi kan du san un e aksi Mi?” Den piki taki: “Iya, Masra.” 29Dan Yesus fasi den na den ai, A taki: “A sa psa soleki fa un e bribi.” 30Ne den man ai opo èn den ben man si. Dan Yesus warskow den tranga taki: “Sorgu taki no wan sma kon sabi a tori disi.” 31Ma den man gwe èn den ferteri san Yesus du gi den na ini a heri kontren drape.

Yesus dresi wan babawman

32Di den tu man ben e gwe, den sma tyari wan man kon na Yesus. A man disi no ben man taki fu di a ben abi wan takruyeye na en tapu. 33Baka di Yesus yagi a takruyeye puru na en tapu, a babawman bigin taki. A bigi grupu sma drape ferwondru. Den taki: “Noiti ete sowan sani psa na ini Israel.” 34Ma den Fariseiman taki: “Na a edeman fu den takruyeye e gi En makti fu yagi den takruyeye puru.”

9:34
Mat 10:25
12:24
Mrk 3:22
Luk 11:15

Yesus abi sari-ati nanga libisma

35Yesus go na ala den foto nanga dorpu, èn A gi den sma leri ini den kerki. A ferteri den sma a bun nyunsu taki Gado o bigin tiri libisma, èn A dresi ala sortu siki di den sma ben abi.

9:35
Mat 4:23
Mrk 1:39
Luk 4:44
36Di Yesus si den bigi grupu sma na ala sei, A firi wan dipi sari gi den, bika den ben bruya èn den no ben abi wan sma fu luku den, neleki skapu di no abi sma fu tyari den go na wei.
9:36
Nom 27:17
1Kow 22:17
2His 18:16
Ese 34:5
Mrk 6:34
37Dat' meki Yesus taigi den man di ben e teki leri fu En taki: “A nyanyan ini a gron lepi kba fu koti, èn a furu, ma nofo wrokoman no de.
9:37-38
Luk 10:2
38Fu dat'ede un mus begi Masra di abi a gron, fu A seni moro wrokoman go ini a gron fu koti a nyanyan.”

10

Den twarfu boskopuman fu Yesus

Mrk 3:13-19; Luk 6:12-16

101Yesus kari den twarfu man di ben e teki leri fu En kon. Dan A gi den makti fu yagi takruyeye puru na tapu sma, èn fu dresi ala sortu siki.

2Disi na den nen fu den twarfu boskopuman fu Yesus: a fosi wan ben nen Simon, di den sma ben e kari Petrus, nanga en brada Andreas. Moro fara yu ben abi Yakobus a manpikin fu Sebedeus, nanga en brada Yohanes. 3Dan yu ben abi Filipus nanga Bartolomeus, Tomas nanga Mateus, a man di ben piki lantimoni, Yakobus a manpikin fu Alfeus, nanga Tadeus. 4Dan yu ben abi ete Simon, fu a grupu fu den Seloten,10:4 Den Seloten ben e feti nanga den Romeinisma fu puru Israel ondro a makti fu den. nanga Yudas Iskariot, a man di seri Yesus.

Yesus seni den man di ben e teki leri fu En fu go preiki a bun nyunsu

Mrk 6:7-13; Luk 9:1-6

5Na den twarfu man disi Yesus seni gwe èn A taigi den taki: “Un no mus go na den sma di no de Dyu, sosrefi un no mus go na den foto fu den Samariasma. 6Ma un mus go na den sma fu Israel, bika den de leki skapu di lasi pasi. 7Un go taigi den taki her'esi Gado o bigin tiri libisma.

10:7-15
Luk 10:4-12
8Un dresi sikisma, un wiki dedewan, un meki a skin fu den gwasiman kon bun baka, èn un yagi takruyeye puru na tapu sma. Un kisi a makti fu du den sani disi fu soso, un mus du den fu soso tu. 9Un no mus tyari no wan moni te unu e gwe, 10sosrefi un no mus tyari wan saka fu te un de na pasi, noso tra krosi noso susu. Wan wakatiki srefi un no mus tyari. Bika a fiti taki wan wrokoman kisi san a abi fanowdu.”
10:10
1Kor 9:14
1Tim 5:18
11Yesus taigi den man moro fara taki: “Te un doro ini wan foto noso wan dorpu, un mus suku wan sma di warti fu un kon ini en oso. Dan un mus tan ini a oso dati te leki un o gwe na wan tra presi. 12Te un go ini a oso dati, un mus winsi den sma taki Gado sa blesi den. 13Efu a sori taki den sma fu a oso warti fu kisi a blesi fu unu, a blesi sa tan nanga den. Ma efu a sori taki den sma no warti fu kisi a blesi fu unu, a sa drai kon baka na unu. 14Èn efu a sori taki den sma no wani meki un tan na den, noso den no wani arki san un e taki, dan un mus naki a santi puru na un futu te un e gwe libi a oso noso a foto dati.
10:14
Bosk 13:51
15Fu tru Mi e taigi un taki: Tapu a dei di Gado o krutu libisma, a strafu fu a foto disi sa hebi moro a strafu fu den foto Sodom nanga Gomora.”
10:15
Gen 19:24-28
Mat 11:24

Den problema san den sma fu Yesus o miti

Mrk 13:9-13; Luk 21:12-17

16“Luku, Mi e seni unu leki skapu go na mindri den tigri. Dat' meki un mus de na ai, èn un no mus du no wan sma ogri.

10:16
Luk 10:3
17Un luku bun nanga libisma. Bika den sa tyari un go na krutu, èn den o fon unu na ini den kerki fu den.
10:17-20
Mrk 13:9-11
Luk 12:11-12
21:12-15
18Fu Mi ede den o srepi un go na fesi granman nanga kownu. Dan un mus teki den okasi dati fu ferteri den, nanga den folku, fu Mi. 19Te den sma tyari un go na krutu, un no abi fu broko un ede fa un mus taki noso san un mus taki. Bika Gado o gi unu san un mus taki a yuru dati. 20Bika a no unu sa taki fu unsrefi, ma na a Yeye fu Gado un P'pa sa gi un den wortu fu un taki.” 21Yesus taigi den boskopuman fu En moro fara taki: “Wan brada sa gi en eigi brada abra fu den kiri en. Wan p'pa sa du a srefi sani nanga en pikin. Pikin sa tron feyanti fu den m'ma nanga den p'pa, èn den o kiri den.
10:21
Mrk 13:12
Luk 21:16
22Fu Mi ede no wan sma no o man si un na ai. Ma Gado sa ferlusu a sma di sa hori doro te na a kba.
10:22 a
Mat 24:9
Mrk 13:13
Luk 21:17
23Te den sma fu a wan foto de na un baka fu du un ogri, un lowe go na wan tra foto. Bika fu tru Mi e taigi un taki: A Manpikin fu Libisma sa drai kon baka fosi un kba du un wroko ini ala den foto fu Israel.

24Wan sma di e teki leri, no betre moro en leriman, èn wan knekti no hei moro en masra.

10:24 a
Luk 6:40
25A mus de nofo gi a sma di e teki leri efu a kon de leki en leriman, èn a mus de nofo gi a knekti efu a kon de leki en masra. Efu den sma gi Mi leki a edeman fu a oso a nen fu Beelsebul,10:25 Beelsebul na wan fu den nen fu didibri. den sa gi un nen di takru moro dati.”
10:25
Mat 9:34
12:24
Mrk 3:22
Luk 11:15

No frede libisma

Luk 12:2-9

26Yesus taigi den boskopuman fu En moro fara taki: “Un no mus frede libisma. Bika ala sani san de na dungru o kon na krin, èn ala sani di kibri o kon na doro.

10:26
Mrk 4:22
Luk 8:17
27Den sani di Mi e taigi unu na dungru, un mus taki den na a krin fu dei. San Mi e taigi unu safri, un mus bari na strati. 28Un no abi fu frede libisma. Den kan kiri soso a skin, ma den no man kiri a sili. Ma un mus frede Gado di kan meki a skin nanga a sili go pori ini hel. 29Un sabi taki yu kan bai tu gadotyo gi wan sensi. Ma toku no wan fu den e dede sondro taki Gado un P'pa sabi fu en. 30Gado sabi srefi omeni wiwiri yu abi na tapu yu ede. 31Dat' meki un no mus frede, bika un warti moro leki furu gadotyo. 32So dan, a sma di e taigi trawan taki a sabi Mi, Mi sa taigi Mi P'pa na heimel taki Mi sabi en. 33Ma a sma di e taigi trawan taki a no sabi Mi, Mi sa taigi Mi P'pa na heimel tu taki Mi no sabi en.”
10:33
2Tim 2:12

Yesus no kon fu tyari freide, ma pratifasi

Luk 12:51-53; 14:26-27

34“Un no mus prakseri taki Mi kon fu tyari freide na grontapu. Mi no kon fu tyari freide, ma na prati Mi kon fu prati. 35Mi kon fu tyari prati na mindri wan man nanga en p'pa, na mindri wan uma nanga en m'ma, èn na mindri wan uma nanga en masra m'ma.

10:35-36
Mika 7:6
36Den feyanti fu yu sa de yu eigi ososma. 37Suma lobi en m'ma noso en p'pa moro Mi, no warti fu waka na Mi baka. Sosrefi a sma di lobi en manpikin noso en umapikin moro Mi, no warti fu waka na Mi baka. 38A sma di no de klar'klari fu nyan pina te fu dede srefi te a e waka na Mi baka, no warti fu de wan sma fu Mi.
10:38
Mat 16:24
Mrk 8:34
Luk 9:23
39A sma di wani hori en libi, o lasi en. Ma a sma di e poti en libi na wan sei fu Mi ede, o feni en.”
10:39
Mat 16:25
Mrk 8:35
Luk 9:24
17:33
Yoh 12:25

Den sma di o kisi pai fu Gado

Mrk 9:41

40“Suma opo en doro gi unu, e opo en gi Mi. Èn suma opo en doro gi Mi, e opo en gi a Wan di seni Mi kon.

10:40
Mrk 9:37
Luk 9:48
10:16
Yoh 13:20
41Suma opo en doro gi wan profeiti, fu di a de wan profeiti, sa kisi a srefi pai di Gado o gi a profeiti fu En. Èn suma opo en doro gi wan sma di bun ini Gado ai, fu di a de wan sma di bun ini Gado ai, sa kisi a srefi pai di Gado o gi a sma di bun ini En ai. 42Fu tru Mi e taigi un taki: Efu yu gi wan sma wan kan kowru watra nomo, fu di a e teki leri fu Mi, dan Gado no sa fergiti fu pai yu, awinsi a sma dati no de wan prenspari sma.”