Sranan Tongo Bible 2016 (STB16)
7

71Abi sari-ati nanga mi. Bika a gersi leki te sma e piki droifi, den laste droifi na den droifibon. Droifi no de moro fu nyan. No wan figa srefi de di mi angri so fu nyan. 2Sma no de ini a kondre moro di e waka baka Gado, no wan no de di e du Gado wani. Den alamala e suku fu kiri wan trawan. Den alamala e luru densrefi. 3Den sabi fa fu du ogri bun nanga den anu. Den fesiman no e du noti sondro fu moni, den krutubakra e meki sma pai den fu koti krutu. Den heihei wan e taki san bun gi den èn so den e seti den sani nanga makandra. 4A moro bun wan na den mindri gersi wan bon nanga maka. A wan fu den di yu ben kan fertrow ete gersi wan heri busi nanga makamakabon. A dei doro fu Gado strafu unu, leki fa den waktiman fu unu ben taki. Dan un o de ini bigi bruya. 5No fertrow yu eigi kondreman. No bow tapu yu mati. Luku bun san yu e taki nanga a uma di didon ini yu anu. 6Bika a manpikin no e lespeki en p'pa, a umapikin e kaka futu gi en m'ma. Den frow no e arki san a m'ma fu den masra e taki. Yu eigi ososma o de yu feyanti.

7Ma mi sa tan hori ai na tapu MASRA. Mi sa tan wakti tapu a Gado di o ferlusu mi. Mi Gado sa yere mi.

8Mi feyanti, yu no mus prisiri fu mi ede.

Awinsi mi fadon, mi sa opo baka.

Awinsi mi de na dungru,

MASRA sa de leki wan faya gi mi.

9Mi sondu,

fu dat'ede mi sa teki a atibron fu MASRA na mi tapu,

te leki A feti gi a tori fu mi

èn gi mi a leti di mi mus kisi.

A sa tyari mi kon ini a leti baka

èn mi sa si fa A e du sani nanga leti.

10Mi feyanti sa si dati

èn a sa kon na syen.

A wan di ben aksi mi taki:

“Pe MASRA, a Gado fu yu, de?”

Mi sa tnapu luku en,

te sma e waka psa na en tapu

leki a tokotoko di didon na strati.

11A ten e kon fu bow a skotu baka.

A ten dati a kondre o kon moro bigi.

12A ten dati sma sa kon na unu,

fu Asur te nanga Egipte,

fu Egipte go te na a Eufratliba,

fu a wan se go miti a tra se,

nanga fu a wan bergi go miti a trawan.

13Ma grontapu sa tron wan dreisabana,

fu den sani di den sma na grontapu du.

14Tyari Yu folku,

leki fa wan skapuman e tyari den skapu fu en

nanga en tiki.

Den skapu fu Yu,

di e libi den wawan ini wan busi,

nanga bun gron lontu en.

Meki den nyan grasi na ini Basan nanga Gilead,

leki fa a ben de bifo.

15Mi sa meki den si wondru,

leki fa a ben de ini den dei,

di un ben e hari kmoto na ini Egipte.

16Den folku o syen te den si dati.

Den no o abi krakti moro fu du wan sani.

Nanga opo mofo den o tnapu.

Den yesi o tapu.

17Den o nyan doti leki sneki,

leki den meti na grontapu di e kroipi na gron.

Beifibeifi den o kmoto ini den tranga oso fu den

kon na doro.

Nanga naki kindi den o kon na MASRA,

a Gado fu wi,

èn den sa lespeki En.

18Sortu gado de leki Yu,

di e gi pardon fu den kruktudu

nanga den sondu,

di den sma fu en folku e du

di tan abra.

A atibron fu En no e tan fu têgo,

ma A lobi fu sori sma a bigi lobi fu En.

19A sa sorgu baka gi wi,

A sa figi ala den kruktudu fu wi puru.

Iya, Yu sa trowe ala den sondu fu wi

na ini den moro dipi pisi fu a se.

20Yu sa sori Yakob

taki Yu de fu fertrow.

Yu sa sori Abraham a bigi lobi fu Yu,

leki fa Yu ben sweri gi den afo fu wi

langa ten bifo taki Yu o du en.