Sranan Tongo Bible 2016 (STB16)
9

91Dan Yesus taigi den taki: “Fu tru Mi e taigi un taki: Son sma de dya na un mindri di no sa dede fosi den si Gado kon nanga makti èn A bigin tiri libisma.”

Moses nanga Elia kon na Yesus tapu a bergi

Mat 17:1-13; Luk 9:28-36

2Siksi dei baka dati Yesus teki Petrus, Yakobus nanga Yohanes, tyari go na tapu wan hei bergi pe den wawan ben kan de. Dan let' na den fesi a skin fu Yesus kenki.

9:2-7
2Pe 1:17-18
3En krosi ben kon so weti taki a e brenki. Sma no de na grontapu di ben o man meki sowan weti krosi. 4Dan wantron so Elia nanga Moses ben de fu si, èn den ben e taki nanga Yesus. 5Ne Petrus taigi Yesus taki: “Masra, a bun taki un de dyaso. Meki un meki dri tenti: wan gi Yu, wan gi Moses nanga wan gi Elia.” 6Petrus taki so, fu di a no ben sabi san fu taki. Bika en nanga den tu trawan ben skreki srefsrefi. 7Dan wan wolku saka kon na den tapu, èn wan sten taki kmopo ini a wolku taki: “Disi na Mi Manpikin di Mi lobi. Un mus arki san A e taki.”
9:7
Mat 3:17
Mrk 1:11
Luk 3:22
8Di den luku lontu, den no si no wan sma tnapu drape moro nanga den, boiti Yesus.

9Di den ben e saka fu a bergi, Yesus warskow den tak' den no mus taigi no wan sma san den si, solanga a Manpikin fu Libisma no ben dede èn kon baka na libi. 10So den hori a sani disi gi densrefi, ma den aksi densrefi san Yesus ben wani taki di A taigi den tak' A o kon baka na libi. 11Dan den aksi En taki: “Fu sanede den sabiman fu Gado wèt e taki tak' Elia mus kon fosi a Mesias doro?”

9:11
Mal 4:5
Mat 11:14
12Yesus piki den taki: “A tru taki Elia o kon fosi fu seti ala sani. Ma san skrifi fu a Manpikin fu Libisma? A skrifi taki A o nyan pina èn den o poti En na wan sei. 13Ma Mi e taigi un taki: Elia kon, èn den du nanga en san den ben wani, soleki fa a ben skrifi fu en.”

Yesus puru wan takruyeye tapu wan boi

Mat 17:14-21; Luk 9:37-43

14Di Yesus nanga den dri man go baka na den trawan, den si wan bigi grupu sma tnapu lontu den. Den man fu En ben hari taki nanga den sabiman fu Gado wèt. 15Den sma ben tnapu nanga opo mofo di den si Yesus e kon. Wantron den waka miti En, dan den gi En odi. 16Ne Yesus aksi den man di ben e teki leri fu En taki: “Fu san unu nanga den man ben e hari taki so?” 17Dan wan man ini a grupu piki taki: “Meister, mi tyari a boi fu mi kon na Yu, bika a abi wan takruyeye na en tapu san e meki a no man taki. 18Awinsi pe a sani kon na en tapu, let' drape a e fringi a boi na gron. Skuma e kmopo ini en mofo, a e kaw en tifi, dan a e kon steifi. Mi ben aksi den man di e teki leri fu Yu fu yagi en puru na en tapu, ma den no ben man.” 19Dan Yesus taigi den sma taki: “Ai baya! Yu kan si taki un no e bribi. O langa Mi mus tan nanga unu? O langa Mi mus teki den sani disi fu unu ete?” Dan A taigi a man taki: “Tyari a boi kon gi Mi.” 20Dan den tyari a boi go na Yesus. Di a takruyeye si Yesus, wantron a naki a boi stoipi. A boi fadon na gron e lolo e puru skuma na ini en mofo. 21Yesus aksi a p'pa taki: “Olanga a sani disi e psa kba nanga a boi?” 22A p'pa piki taki: “A sani disi e psa nanga en sensi a de wan pikin. Furu leisi a takruyeye meki a boi go na ini faya nanga watra nomo fu kiri en. Ma efu Yu ben sa man du wan sani, yepi unu! Abi sari-ati nanga unu!” 23Yesus taigi a man taki: “Yu no mus taki: Efu yu ben sa man! Bika a sma di e bribi kan du ala sani.” 24Wantron a p'pa fu a boi bari taki: “Mi e bribi. Ma mi bribi swaki. Masra, yepi mi!” 25Di Yesus si taki moro nanga moro sma e kon tnapu drape, A bari a takruyeye fu kmopo tapu a boi. A taki: “Yu dofu èn babaw yeye yu, Mi e komanderi yu fu kmopo tapu a boi! Noiti moro yu mus drai kon baka na en!” 26A takruyeye kmopo tapu a boi nanga bigi babari èn nanga hebi stoipi. Dan a boi tan didon leki wan dede. Dat' meki moro furu fu den sma ben taki tak' a dede. 27Ma Yesus teki a boi na en anu fu a opo tnapu. Dan a boi opo tnapu tu. 28Baka dati Yesus go ini wan oso. Di den man di ben e teki leri fu Yesus wawan ben de nanga En, den aksi En taki: “Fu sanede un no ben man yagi a takruyeye puru tapu a boi?” 29Yesus piki den taki: “Soso nanga begi wawan yu kan yagi den sortu takruyeye disi puru.”

Yesus taki baka fu a pina di o miti En

Mat 17:22-23; Luk 9:43-45

30Di den kmopo fu drape, den waka psa ini Galilea fu go moro fara. Ma Yesus no ben wani fu no wan sma sabi taki A de drape, 31bika A ben e gi den man di ben e teki leri fu En leri. A taigi den taki: “Den o gi a Manpikin fu Libisma abra na ini anu fu sma di o kiri En. Ma dri dei baka te den kiri En, A o kon baka na libi.” 32Ma den man no ben ferstan san Yesus ben wani taki, èn den ben frede fu aksi En.

Suma moro prenspari?

Mat 18:1-5; Luk 9:46-50

33Dan den doro na Kafarnaum. Di Yesus doro na oso, A aksi den man taki: “Fu san un ben taki nanga makandra di un ben de na pasi?” 34Ma den no piki, bika di den ben de na pasi, den ben taki nanga makandra fu sortu wan fu den na a moro prenspari wan.

9:34
Luk 22:24
35Yesus go sidon, dan A kari den twarfu man kon. A taigi den taki: “Efu wan sma wani de a moro prenspari wan, a mus saka ensrefi ondro ala den trawan, èn a mus dini den ala.”
9:35
Mat 20:26-27
23:11
Mrk 10:43-44
Luk 22:26
36Dan A teki wan pikin poti tnapu na den mindri. A poti En anu lontu en, dan A taigi den taki: 37“A sma di opo en doro gi sowan pikin ini Mi nen, e opo en gi Mi. Èn a sma di opo en doro gi Mi, no opo en gi Mi, ma a opo en gi a Wan di seni Mi kon.”
9:37
Mat 10:40
Luk 10:16
Yoh 13:20

38Dan Yohanes taigi Yesus taki: “Meister, un si wan man e yagi takruyeye puru na sma tapu na ini Yu nen. Un ben suku fu tapu en, bika a no de ini a grupu fu unu.” 39Ma Yesus piki taki: “No tapu en. Bika wan sma di du wan bigi sani na ini Mi nen, no o man taki ogri fu Mi so gaw. 40Bika efu wan sma no e suku fu tapu a wroko fu unu, dan a de na un sei.

9:40
Mat 12:30
Luk 11:23
41Fu tru Mi e taigi un taki: A sma di sa gi un wan kan watra ini a nen fu Kristus fu di un na sma di e teki leri fu En, sa kisi en pai fu dati.”
9:41
Mat 10:42

Yesus warskow den sma

Mat 18:6-9; Luk 17:1-2

42Yesus taki moro fara: “A sma di e meki wan fu den pikinwan disi di e bribi ini Mi fadon ini sondu, mus luku bun! A ben o moro bun gi en efu den tai wan bigi ston na en neki èn fringi en go na ini a se. 43Efu yu anu e meki yu sondu, kapu en puru. A moro betre taki yu lasi yu wan sei anu, ma yu kisi a libi fu têgo, dan taki den trowe yu nanga ala tu anu go ini a faya fu hel, di no man dede.

9:43
Mat 5:30
44Drape den woron san e nyan den, noiti no e dede, èn a faya san e bron den noiti no e dede. 45Èn efu yu futu e meki yu sondu, kapu en puru. A moro betre taki yu lasi yu wan sei futu, ma yu kisi a libi fu têgo, dan taki den trowe yu nanga ala tu futu go na ini hel. 46Drape den woron san e nyan den, noiti no e dede, èn a faya san e bron den noiti no e dede.9:46 Wantu manuscript no abi vers 44 nanga vers 46. 47Efu yu ai e meki yu sondu, diki en puru. A moro betre taki yu kon ondro a tiri fu Gado nanga wan ai, dan taki den trowe yu nanga ala tu ai go na ini hel.
9:47
Mat 5:29
48Drape den woron san e nyan den, noiti no e dede, èn a faya san e bron den noiti no e dede.
9:48
Yes 66:24

49Ala sma musu psa ini a faya fu kon de leki sowtu. 50Sowtu bun. Ma efu sowtu lasi en krakti, fa yu o man gi en tesi baka? Un mus de leki sowtu, èn un mus libi ini freide nanga makandra.”

9:50
Mat 5:13
Luk 14:34-35

10

San Yesus taki fu a trowlibi

Mat 19:1-12; Luk 16:18

101Yesus kmopo fu drape, dan A go na Yudea nanga a kontren abrasei fu a Yordanliba. Agen wan lo sma kon na En, èn A bigin gi den leri soleki fa A ben gwenti fu du. 2Dan wantu Fariseiman kon na En fu tesi En. Den aksi En taki: “Wan man kan broko trow nanga en uma?” 3Yesus aksi den taki: “San Moses skrifi taki un kan du?” 4Den taki: “Moses taki tak' wan man kan broko trow, ma a mus gi a uma wan brifi san e sori taki a trow broko.”

10:4
Deu 24:1-4
Mat 5:31
5Yesus piki taki: “Na fu di un no wani du san Gado taki, meki Moses skrifi a sani disi. 6Ma na a bigin di Gado meki libisma, A meki den leki man nanga uma.
10:6
Gen 1:27
5:2
7Dat'ede wan man sa gwe libi en m'ma nanga en p'pa fu go libi nanga en uma.
10:7-8
Gen 2:24
8Dan den tu sma disi sa de leki wan enkri sma. So den no de tu sma moro, ma den de leki wan. 9Èn san Gado tyari kon na wan, libisma no mus prati.”

10Di den go na oso, den man di ben e teki leri fu Yesus aksi En a tori disi baka. 11Dan Yesus taigi den taki: “A man di broko trow nanga en uma dan a trow baka, e huru gi en fosi uma.

10:11-12
Mat 5:32
1Kor 7:10-11
12Èn efu wan uma broko trow nanga en masra èn a trow baka, dan sowan uma e libi wan huru libi tu.”

Yesus blesi den pikin

Mat 19:13-15; Luk 18:15-17

13Den sma ben e tyari den pikin kon na Yesus fu A fasi den. Ma den man di ben e teki leri fu Yesus bari den. 14Di Yesus si san den man e du, a mandi srefsrefi. A taigi den taki: “Meki den pikin kon na Mi. No tapu den, bika na sma leki den pikin disi, Gado e tiri. 15Fu tru Mi e taigi un taki: Efu yu no kon na Gado leki wan pikin fu A tiri yu, dan noiti yu o man kon ondro a tiri fu Gado.”

10:15
Mat 18:3
16Yesus brasa den pikin, dan A poti anu na den tapu èn A blesi den.

Yesus nanga a guduman

Mat 19:16-30; Luk 18:18-30

17Di Yesus ben e waka go moro fara, wan man lon kon na En. A saka kindi gi En, dan a aksi En taki: “Bun Meister, san mi mus du fu kisi a libi fu têgo?” 18Yesus piki en taki: “Fu sanede yu e taki tak' Mi bun? No wan sma bun, boiti Gado. 19Yu srefi sabi san a wèt fu Gado e taki: Yu no mus kiri, yu no mus huru, yu no mus fufuru, yu no mus lei gi trawan, yu no mus bedrigi sma, èn yu mus lespeki yu m'ma nanga yu p'pa.”

10:19 a
Eks 20:13
Deu 5:17
20A man piki taki: “Meister, sensi mi pikin mi hori ala den wèt disi.” 21Di Yesus luku a man, a firi wan lobi gi en. Dan A taigi en taki: “Wan sani libi ete fu yu du. Go seri den sani san yu abi, dan yu e prati a moni gi pôtisma. So yu o abi wan gudu na heimel. Baka dati yu e kon waka na Mi baka.” 22Di a man yere san Yesus taki, en fesi kenki. A gwe nanga sari bika a ben abi furu gudu.

23Yesus luku lontu, dan A taigi den man di ben e teki leri fu En taki: “A sa tranga gi sma di lai moni fu den poti densrefi ondro a tiri fu Gado.” 24Den man fu En ben ferwondru fu a sani san Yesus taki. Ma Yesus taki baka taki: “Mi pikin, a tranga fu kon ondro a tiri fu Gado. 25A moro makriki gi wan asaw fu psa ini wan nanai-olo, dan fu wan guduman poti ensrefi ondro a tiri fu Gado.” 26Den man ben ferwondru srefsrefi. Den taigi Yesus taki: “Suma Gado o man ferlusu dan?” 27Yesus luku den man di ben e teki leri fu En, dan A taigi den taki: “Libisma no man du en, ma Gado man. Bika Gado kan du ala sani.” 28Dan Petrus bigin taigi Yesus taki: “Ma luku, wi libi ala sani san wi ben abi fu waka na Yu baka.” 29Yesus piki en taki: “Fu tru Mi e taigi un taki: Ala sma di libi en oso, noso en brada nanga en s'sa, noso en m'ma nanga en p'pa, noso en pikin nanga en gron fu Mi ede èn fu a bun nyunsu ede, o kisi den sani disi baka. 30Ini a libi disi Gado o gi den sma dati hondro tron so moro furu oso, brada nanga s'sa, m'ma, pikin nanga gron. Ma sma o de na den baka fu du den ogri. Dan ini a ten san e kon, A o gi den a libi fu têgo. 31Ma furu fosiwan o tron lastewan, èn furu lastewan o tron fosiwan.”

10:31
Mat 20:16
Luk 13:30

Yesus e taki a di fu dri leisi fu a pina di o miti En

Mat 20:17-19; Luk 18:31-34

32Den ben de na pasi fu go na Yerusalem èn Yesus ben e waka na fesi. Den man di ben e teki leri fu Yesus ben ferwondru, èn den tra sma di ben waka nanga den ben frede. Dan Yesus kari den twarfu man fu En kon na wan sei, dan A bigin ferteri den san nanga san o miti En. 33A taki: “Luku, un de na pasi fu go na Yerusalem. Drape den o gi a Manpikin fu Libisma abra na den prenspari priester nanga den sabiman fu Gado wèt. Den man dati sa teki a besroiti tak' A mus dede. Dan den o gi En abra na den sma di no de Dyu. 34Den o teki En leki spot'popki, den o spiti na En tapu, den o wipi En, dan den o kiri En. Ma baka dri dei, A o kon baka na libi.”

No suku fu sma dini yu, ma dini trawan

Mat 20:20-28

35Yakobus nanga Yohanes, den tu manpikin fu Sebedeus, kon na Yesus. Den taki: “Meister, un ben sa wani fu Yu du a sani gi unu san un o aksi Yu.” 36Yesus aksi den taki: “San un wani taki Mi mus du gi unu?” 37Den piki taki: “Un ben sa wani taki te Yu sidon na tapu Yu kownusturu, Yu sa meki wan fu unu sidon na Yu let'anu sei, èn a trawan na Yu kruktu-anu sei.” 38Ma Yesus taigi den taki: “Un no sabi san un e aksi. Un sa man nyan a pina san Mi mus nyan? Un sa wani dede a dede san Mi mus dede?”

10:38
Luk 12:50
39Den piki Yesus taki: “Iya, un sa man.” Yesus taigi den taki: “Un sa nyan a pina san Mi o nyan, èn un sa dede a dede san Mi o dede. 40Ma a no Mi e taki suma o sidon na Mi let'anu sei noso na Mi kruktu-anu sei. Gado libi den presi dati gi den sma di A wani fu sidon drape.”

41Di den tra tin man yere a tori disi, den bigin mandi nanga Yakobus nanga Yohanes. 42Dat' meki Yesus kari den alamala kon, dan A taigi den taki: “Un sabi taki den sma di e tiri den folku, e rigeri abra den. Èn den sma di abi makti e dwengi a folku fu du san den wani. 43Ma unu no mus du leki den. Efu wan fu unu wani de wan prenspari sma na un mindri, dan a mus dini den trawan.

10:42-44
Mat 23:11
Mrk 9:35
Luk 22:25-26
44Èn a sma di wani de a fosiwan na un mindri, mus de leki wan srafu gi ala den trawan. 45Bika a Manpikin fu Libisma, no kon tu fu sma dini En. Ma A kon fu dini trawan èn fu gi En libi fu meki furu sma kon fri.”

Yesus yepi Bartimeus, a breniman

Mat 20:29-34; Luk 18:35-43

46Na so den doro na Yeriko. Dan di Yesus nanga den man di ben e teki leri fu En nanga wan bigi grupu sma gwe libi Yeriko, den miti nanga wan breniman di ben sidon na sei pasi. A man disi ben nen Bartimeus, èn en p'pa ben nen Timeus. 47Di Bartimeus yere taki na Yesus fu Nasaret e kon, a bigin bari taki: “Yesus, Manpikin fu David, abi sari-ati nanga mi!” 48Wan lo sma bari en fu a tapu en mofo, ma a bigin bari moro tranga taki: “Yesus, Manpikin fu David, abi sari-ati nanga mi!” 49Ne Yesus tan tnapu, dan A taigi den sma taki: “Un kari en kon.”

Dan den sma kari en. Den taki: “Hori doro. Opo kon. A e kari yu.” 50Bartimeus puru en mantel, a dyompo opo, dan a go na Yesus. 51Yesus aksi en taki: “San yu wani taki Mi mus du gi yu?” A breniman piki taki: “Masra, mi wani si.” 52Yesus piki en taki: “Yu kan go. A bribi fu yu meki yu kon betre.” Wantron a man bigin si, dan a waka a pasi go doro nanga Yesus.

11

Yesus go ini a foto Yerusalem

Mat 21:1-11; Luk 19:28-40; Yoh 12:12-19

111Yesus nanga den man di ben e teki leri fu En ben kon krosbei fu Yerusalem. Di den doro na den dorpu Betfaga nanga Betania ini a birti fu a Oleifbergi, A seni tu fu den man di ben e teki leri fu En go na fesi. 2A taigi den taki: “Un go na a dorpu san de na un fesi. Leki fa un e go ini a dorpu, un o si wan yongu buriki san den sma tai drape. Noiti ete wan sma ben sidon na en tapu. Un lusu en, dan un tyari en kon dya. 3Efu wan sma sa aksi unu fu sanede un e lusu en, un mus piki taki: ‘Masra abi en fanowdu. Te A kba, A sa seni en wantron kon dya baka.’ ” 4Na so den man gwe, den feni a yongu buriki tai na a doro fu wan oso na sei strati, dan den lusu a buriki. 5Wantu fu den sma di ben tnapu drape aksi den taki: “San un e du? Fu sanede un e lusu a buriki?” 6Den man piki den sma leki fa Yesus taigi den, dan den sma libi den meki den gwe nanga a buriki. 7Den tyari a buriki go gi Yesus, dan den bradi den krosi na en tapu. Dan Yesus go sidon na tapu. 8Furu sma bradi den krosi tapu a pasi gi En. Trawan koti taki puru ini den gron, dan den poti den tapu a pasi. 9Den sma di ben e waka na En fesi nanga na En baka, ben e bari taki:

Hosana!

Blesi de tapu a Wan

di e kon ini a nen fu Masra!

11:9
Psa 118:26

10Blesi fu a kownukondre fu un afo David,

di de fu kon.

Hosana!

Prijse Gado di de na heimel!

11Di Yesus doro na Yerusalem, A go ini a tempel dan A waka lontu e luku ala sani. Baka dati En nanga den twarfu man go na Betania, bika a ben kon lati kba.

Yesus fluku a figabon

Mat 21:18-19

12A tamara fu en, di den e drai kmopo fu Betania, angri bigin kiri Yesus. 13Fu fara Yesus si wan figabon di ben lai nanga grun wiwiri. Dan A go na a bon fu luku efu A ben sa feni froktu na en fu nyan. Ma di A doro na a bon, A si den grun wiwiri nomo, bika a no ben de figaten. 14Dan Yesus taigi a bon taki: “Noiti moro wan sma sa man nyan wan froktu fu yu.” Den man di ben e teki leri fu En yere di A taki a sani dati.

Gado oso mus de wan presi fu begi

Mat 21:12-17; Luk 19:45-48; Yoh 2:13-22

15Di Yesus doro baka ini Yerusalem, A go ini a tempel. Dan A bigin yagi ala den sma gwe di ben e bai sani noso seri sani drape. A drai den tafra tapu fu den man di ben e broko moni. A du a srefi sani nanga den sturu fu den man di ben e seri doifi. 16A tapu ala sma di ben e teki a dyari fu a tempel leki boropasi fu syow sani psa. 17Dan Yesus taigi den sma taki: “A skrifi taki: ‘Mi oso mus de wan presi pe ala folku kan kon fu begi.’ Ma un meki a tron wan nesi fu fufuruman.”

11:17 a
Yes 56:7
18Den prenspari priester nanga den sabiman fu Gado wèt yere san psa. Dan den bigin suku wan fasi fu kiri En. Den ben frede fu Yesus, bika ala den sma ben e arki a leri fu En nanga opo mofo. 19Di a son bigin saka, Yesus nanga den man di ben e teki leri fu En kmopo ini a foto.

San psa nanga a figabon

Mat 21:20-22

20Fruku mamanten di den e waka psa a figabon, den si taki a bon ben drei te na a rutu srefi. 21Petrus memre san Yesus ben taigi a figabon, dan a taigi Yesus taki: “Meister, luku. A figabon san Yu ben fluku, kon drei.” 22Dan Yesus taigi den taki: “Un mus abi bribi na ini Gado. 23Fu tru Mi e taigi un taki: Efu yu no frede taki san yu taki no o psa, ma yu e bribi taki a o psa soleki fa yu taki, dan yu kan taigi a bergi disi: ‘Opo, go trowe yusrefi ini a se!’ èn a o psa.

11:23
Mat 17:20
1Kor 13:2
24Dat'ede Mi e taigi un taki: Awinsi san un aksi na ini begi, bribi taki yu kisi en, dan a sa de fu yu.” 25Dan Yesus taigi den moro fara taki: “Efu yu abi wan sani nanga wan tra sma, yu mus gi en pardon te yu e begi. Dan so yu P'pa di de na heimel kan gi yu pardon fu yu sondu tu.
11:25-26
Mat 6:14-15
26Ma efu yu no e gi pardon, dan yu P'pa di de na heimel no sa gi yu pardon tu fu yu sondu.”11:26 Wantu manuscript no abi vers 26.

Den aksi Yesus pe A feni a makti

Mat 21:23-27; Luk 20:1-8

27Na so den go baka na ini Yerusalem. Di Yesus e waka na ini a tempel, den prenspari priester, den sabiman fu Gado wèt nanga den fesiman fu a folku, kon na En. 28Den aksi En taki: “Pe Yu feni a leti fu du den sani san Yu e du? Suma gi Yu a makti fu du den sani disi?” 29Yesus piki den taki: “Mi wani aksi unu wan sani fosi. Un mus piki Mi, dan Mi sa taigi unu suma gi Mi a makti fu du den sani san Mi e du.” 30Dan A aksi den taki: “Suma ben gi Yohanes a makti fu dopu sma? Gado noso libisma? Un piki Mi.” 31Den man taki a tori nanga makandra. Den taki: “Efu un taki: ‘Na Gado,’ dan A o aksi unu: ‘Fu sanede un no ben bribi en dan?’ 32Ma na a tra sei un no kan taki tak' na libisma ben gi en a makti.” Fu taki leti, den man ben frede fu den sma, bika ala sma ben si Yohanes leki wan trutru profeiti. 33So den piki Yesus taki: “Un no sabi.” Ne Yesus taigi den taki: “We, dan Mi srefi no o taigi unu pe Mi feni a leti fu du den sani disi.”