Sranan Tongo Bible 2016 (STB16)
14

Den sabiman fu Gado wèt nanga den priester wani kiri Yesus

Mat 26:1-5; Luk 22:1-2; Yoh 11:45-53

141A ben de tu dei fosi Paska nanga a fesa pe den e nyan brede san meki sondro dyesi. Den prenspari priester nanga den sabiman fu Gado wèt ben e suku wan fasi fa den ben o man kisi Yesus nanga wan triki fu ben kan kiri En.

14:1
Eks 12:1-27
2Ma den taki: “Un no mus grabu En tapu den dei fu a fesa, noso a folku o meki dyugudyugu.”

Wan uma kanti diri oli tapu Yesus ede

Mat 26:6-13; Yoh 12:1-8

3Yesus ben de na Betania, na a oso fu wan man di den ben kari Gwasi Simon. Di Yesus ben e nyan, wan uma kon na En nanga wan albast batra di ben furu nanga bun diri oli san ben meki fu nardus rutu. A uma broko a neki fu a batra, dan a kanti a oli tapu Yesus ede.

14:3
Luk 7:37-38
4Ma wantu sma drape ben mandi nanga a uma. Den aksi makandra taki: “Sanede a uma fermorsu a oli? 5Un ben kan seri en gi moro leki dri hondro solfrumoni, èn prati a moni gi pôtisma.” So den ben e krutu a uma. 6Ma Yesus taki: “Un libi en. Sanede un e krutu en? Na wan bun sani a du gi Mi. 7Pôtisma de ala ten nanga unu. Oten un wani, un kan du bun gi den. Ma Mi no o de ala ten nanga unu.
14:7
Deu 15:11
8A uma du san a man. A lobi oli na Mi skin na fesi fu meki Mi klari fu den beri Mi. 9Fu tru Mi e taigi un taki: Ala sei fu grontapu pe sma sa ferteri a bun nyunsu, den sma o memre a uma fu a sani san a du gi Mi.”

Yudas seri Yesus

Mat 26:14-16; Luk 22:3-6

10Dan Yudas Iskariot, wan fu den twarfu man di ben e teki leri fu Yesus, go na den prenspari priester fu gi Yesus abra na ini den anu. 11Di den man yere san Yudas ben wani du, den ben breiti èn den pramisi en tak' den o gi en moni. Dan a bigin luru wan bun okasi fu gi Yesus abra na den.

Ala sani seti fu nyan Paska

Mat 26:17-19; Luk 22:7-13

12Na a fosi dei fu a fesa pe den e nyan brede san meki sondro dyesi, den sma ben mus srakti wan pikin skapu fu nyan Paska. Dan den man di ben e teki leri fu Yesus aksi en taki: “Pe Yu wani fu wi go meki sani klari fu Yu kan nyan a Paska-nyanyan?” 13Dan Yesus seni tu fu den man di ben e teki leri fu En fu go du wan sani gi En. A taki: “Un go ini a foto, dan wan man di e tyari wan kroiki o kon miti unu. Un waka na en baka. 14A man o go ini wan oso. Dan un mus taigi a man di abi a oso taki: ‘A Meister seni aksi pe a kamra de pe A kan nyan Paska nanga den man di e teki leri fu En.’ 15Dan a man o sori unu wan bigi kamra na sodro, di seti èn di abi ala sani kba. Drape un mus meki a Paska-nyanyan klari gi wi.” 16Na so den man go na a foto èn ala sani waka soleki fa Yesus taki. Dan den meki a Paska-nyanyan klari.

Yesus taki tak' wan fu den o seri En

Mat 26:20-25; Luk 22:21-23; Yoh 13:21-30

17Di neti tapu, Yesus kon nanga den twarfu man fu En. 18Di den ben e nyan, Yesus taigi den taki: “Fu tru Mi e taigi un taki: Wan fu unu di e sidon nyan dyaso nanga Mi, o seri Mi.”

14:18
Psa 41:10
19Den man bigin sari, dan wan fru wan den aksi En taki: “Masra, na mi?” 20Yesus piki den taki: “Na wan fu unu, a wan di e dopu en brede ini a srefi komki nanga Mi. 21Bika a Manpikin fu Libisma sa dede leki fa a ben skrifi fu En kba na fesi. Ma a man di seri En mus luku bun! A ben o bun gi en efu noiti en m'ma ben meki en.”

A nyanyan fu memre Yesus

Mat 26:26-30; Luk 22:14-20; 1Kor 11:23-25

22Di den ben e nyan, Yesus teki wan brede, A blesi en, dan A broko en. Baka dati A gi den man di ben e teki leri fu En, dan A taki: “Un teki. Disi na Mi skin.” 23Dan Yesus teki wan kan nanga win, A taki Gado tangi fu en, dan A gi den man. Dan den alamala dringi. 24A taigi den taki: “Disi na Mi brudu san o stampu a ferbontu di Gado meki. A o lon gi furu sma.

14:24
Eks 24:8
Yer 31:31-34
25Fu tru Mi e taigi un taki: Mi no o dringi win moro, te leki Mi o dringi nyun win pe Gado e rigeri.”

26Baka di den singi fu gi Gado grani, den go na a Oleifbergi.

Petrus o taki tak' a no sabi Yesus

Mat 26:31-35; Luk 22:31-34; Yoh 13:36-38

27Di den ben de na pasi, Yesus taigi den man di ben e teki leri fu En taki: “Un alamala o gwe libi Mi. Bika a skrifi taki: ‘Mi o kiri a skapuman, dan ala den skapu o panya.’

14:27
Sak 13:7
28Ma te Mi kon baka na libi, Mi o go na un fesi na Galilea.”
14:28
Mat 28:16
29Ma Petrus taigi Yesus taki: “Mi no o gwe libi yu, awinsi ala den trawan gwe!” 30Yesus piki en taki: “Fu tru Mi e taigi yu taki: Tide neti, fosi kakafowru bari tu leisi, yu o taki dri leisi taki yu no sabi Mi.” 31Ma Petrus tan hori doro taki: “Awinsi mi mus dede nanga Yu, mi no o taki tak' mi no sabi Yu.” Dan ala den tra man taki a srefi sani.

Yesus go begi na Getsemane

Mat 26:36-46; Luk 22:39-46

32Baka dati den go na wan presi san den e kari Getsemane. Drape Yesus taigi den man di ben e teki leri fu En taki: “Un sidon dyaso. Mi o go begi.” 33Dan A teki Petrus, Yakobus nanga Yohanes go nanga En. A no ben man hori den firi fu En moro èn A ben frede. 34A taigi den dri man taki: “Mi abi sowan dipi sari tak' Mi no man tyari en. Un tan dya nanga Mi. No sribi.” 35Dan Yesus go pikinso moro fara. A fadon tapu En kindi na gron dan A begi fu Gado no meki A nyan a pina disi, efu a kan. 36A taki: “P'pa, Yu na Mi P'pa. Noti no tranga gi Yu fu du. Puru a kan disi na Mi fesi, meki Mi no nyan a pina. Ma a no san Mi wani, ma na san Yu wani musu psa.” 37Dan A drai kon baka na den man fu En, èn A si tak' den e sribi. A aksi Petrus taki: “Simon, na sribi yu e sribi? Yu no ben man tan wan yuru na ai? 38Un mus tan na ai, èn begi fu un no kon na ini tesi. Mi sabi taki ati wani, ma skin no abi krakti.” 39Dan Yesus go begi baka, èn A taki den srefi wortu. 40Di A drai kon baka den ben e sribi baka, bika sribi ben moro den. So den no ben sabi san fu piki Yesus. 41Yesus drai kon fu a di fu dri leisi, dan A taigi den taki: “Now un kan sribi èn rostu fu unu. A nofo. A yuru doro kba. Luku, den e gi a Manpikin fu Libisma abra na ini anu fu sondusma. 42Opo, kon meki un gwe. Luku, a sma di seri Mi e kon kba.”

Den grabu Yesus

Mat 26:47-56; Luk 22:47-53; Yoh 18:3-12

43Yesus no ben kba taki ete, di Yudas, wan fu den twarfu man fu En, doro. Den prenspari priester, den sabiman fu Gado wèt nanga den fesiman fu a folku, ben seni en kon nanga wan grupu sma di ben e tyari owru nanga tiki. 44Yudas ben meki mofo nanga den man taki: “Na a wan di mi o bosi, na En un mus grabu. Ma un mus hori ai na En tapu te un e tyari En gwe.” 45Di Yudas doro, a waka wantron go na Yesus. A taki: “Meister!” Dan a bosi En. 46Dan den man grabu Yesus hori. 47Ma wan fu den sma di ben tnapu drape hari en owru, dan a kapu a yesi puru fu a knekti fu a granpriester. 48Yesus taigi den man taki: “Un kon nanga tiki nanga owru fu grabu Mi, neleki Mi na wan bigi ogriman. 49Ala dei Mi ben de nanga unu ini a tempel e gi leri, ma un no grabu Mi. Ma san skrifi ini a Santa Buku mus fu psa.”

14:49
Luk 19:47
21:37
50Dan ala den man di ben e teki leri fu En lon gwe libi En. 51Wan yonkuman ben drape di ben waka na Yesus baka. A no ben weri krosi na en skin, boiti a sribikrosi nanga san a ben domru en skin. Den man ben suku fu grabu en. 52Ma a libi a sribikrosi na ini den anu, dan a lon gwe nanga sososkin.

Yesus go na fesi krutu

Mat 26:57-68; Luk 22:54-55,63-71; Yoh 18:13-14,19-24

53Dan so den tyari Yesus go na a granpriester. Ala den prenspari priester, den fesiman fu a folku nanga den sabiman fu Gado wèt, ben kon makandra. 54Petrus ben waka fara na baka kon te na ini a dyari fu a granpriester. Dan a go sidon mindri den waktiman fu a tempel sei a faya fu teki waran.

55Den prenspari priester nanga ala den man fu a grankrutu fu den Dyusma, ben suku sma fu kon taki wan sani san Yesus du fu den kan kiri En. Ma den no feni noti. 56Bika furu sma ben kon lei gi Yesus, ma den sani san den ben taki no ben de a srefi. 57Dan wantu sma kon lei gi Yesus. Den taki: “Un yere di A taki: 58‘Mi o broko a santa presi disi san libisma meki, dan ini dri dei Mi o meki wan trawan san libisma no meki.’ ”

14:58
Yoh 2:19
59Ma srefi ini a sani disi san den taki, den no ben agri. 60Ne a granpriester opo tnapu mindri den tra man, dan a aksi Yesus taki: “Yu no e piki tapu san den man disi e taki fu Yu?” 61Ma Yesus hori En mofo, A no piki. Dan a granpriester aksi En taki: “Na Yu na a Mesias? Na Yu na a Manpikin fu a Blesi Wan?” 62Dan Yesus piki taki: “Iya, na Mi na en. Èn un o si a Manpikin fu Libisma sidon na a let'anu sei fu Gado di abi Makti. Dan un o si En te A e kon baka tapu den wolku.”
14:62
Dan 7:13
63Di Yesus taki a sani dati, a granpriester priti en krosi,14:63 A granpriester priti en krosi fu di a si a sani san Yesus taki leki wan sani di afrontu Gado. dan a taki: “Un no abi kotoigi fanowdu moro! 64Un srefi yere fa A afrontu Gado. San na un besroiti?”
14:64
Lev 24:16

Den alamala feni taki a fiti fu A dede. 65Dan wantu fu den man bigin spiti na En tapu. Den tapu En fesi, dan den naki En kofu. Den taigi En taki: “Sori un taki Yu na wan profeiti.” Den waktiman fu a tempel naki En tu ini En fesi.

Petrus taki a no sabi Yesus

Mat 26:69-75; Luk 22:56-62; Yoh 18:15-18,25-27

66Di Petrus ben de na ondrosei na ini a dyari, wan uma di e wroko gi a granpriester kon. 67Di a si Petrus e teki waran sei a faya, a luku en, dan a taigi en taki: “Yu ben de nanga Yesus fu Nasaret tu.” 68Ma Petrus lei taki: “Mi no sabi noti èn mi no e ferstan noti fu san yu e taki.” Dan a kmopo fu drape go na fes'sei pe a poort de.14:68 Wantu manuscript skrifi moro fara taki: Ne wan kakafowru bari. 69Di a uma si en baka, a bigin taigi den sma drape taki: “A man disi na wan fu den man di ben e teki leri fu En.” 70Ma Petrus lei baka. Baka wan syatu pisten den sma di ben tnapu drape taigi Petrus agen taki: “A tru. Yu na wan fu den, bika yu na fu Galilea.” 71Dan Petrus bigin fluku ensrefi, èn a sweri taki: “Mi no sabi a man san un e taki!” 72A srefi momenti dati a kakafowru bari fu a di fu tu tron. Dan Petrus memre di Yesus ben taigi en taki: “Fosi kakafowru bari tu leisi, yu o taki dri leisi taki yu no sabi Mi.” Dan Petrus bigin krei.

15

Den tyari Yesus go na Pilatus

Mat 27:1-2,11-14; Luk 23:1-5; Yoh 18:28-38

151Fruku mamanten den prenspari priester, den fesiman fu a folku, den sabiman fu Gado wèt nanga den man fu a grankrutu fu den Dyusma, kon makandra fu taki san den o du. Dan den tai Yesus tyari go gi Pilatus.15:1 Den Romeinisma ben poti Pilatus leki granman fu tiri Yudea. 2Pilatus aksi En taki: “Na Yu na a Kownu fu den Dyusma?” Yesus piki en taki: “Na leki fa yu taki.” 3Den prenspari priester ben gi wan lo kragi fu Yesus. 4Dan Pilatus aksi Yesus taki: “Yu no e piki tapu san den man disi e taki fu Yu? Arki omeni kragi den e gi fu Yu.” 5Ma Yesus no piki moro fara, so Pilatus ben ferwondru.

Yesus kisi a dedestrafu

Mat 27:15-26; Luk 23:13-25; Yoh 18:39—19:16

6Ala yari tapu a Paskafesa, Pilatus ben gwenti fu lusu wan straf'man di den sma ben wani taki a mus lusu. 7Now wan man Barabas ben sroto makandra nanga den man di ben meki dyugudyugu, èn di ben kiri wan sma ini a dyugudyugu. 8Den sma kon na fesi dan den bigin aksi Pilatus fu a lusu wan straf'man soleki fa a ben gwenti. 9Dan Pilatus aksi den taki: “Un wani fu mi lusu a Kownu fu den Dyusma gi unu?” 10A aksi den so, bika a kon si taki den prenspari priester ben tyari Yesus kon gi en fu di den ben dyarusu na En tapu. 11Ma den prenspari priester sutu faya gi a bigi grupu sma fu den taigi Pilatus taki a mus lusu Barabas na ini Yesus presi. 12Pilatus aksi den sma baka taki: “Dan san mi mus du nanga a man di un e kari Kownu fu den Dyusma?” 13Ne den sma bari taki: “Spikri En na wan kroisi!” 14Pilatus aksi den taki: “Ma sortu ogri a man disi du?” Ma den sma bigin bari moro tranga taki: “Spikri En na wan kroisi!”

15Dan fu di Pilatus ben wani du den sma wan prisiri, a lusu Barabas, dan a meki den wipi Yesus èn tyari En go spikri na wan kroisi.

Den srudati teki Yesus leki spot'popki

Mat 27:27-31; Yoh 19:2-3

16Den srudati tyari Yesus go ini a krutu-oso, san den ben kari a Pretorium, dan den kari den tra srudati kon. 17Den weri wan lila krosi gi En, dan den brei wan banti fu makataki poti tapu En ede. 18Dan den bigin gi En odi. Den taki: “Odi, Kownu fu den Dyusma!” 19Baka dati den bigin naki En nanga wan tiki tapu En ede. Den spiti na En tapu, dan den go na tapu den kindi fu gi En grani. 20Di den kba meki spotu nanga En, den puru a lila krosi san den ben weri gi En, dan den weri En eigi krosi gi En baka.

Dan den tyari En gwe fu go spikri na wan kroisi.

Den spikri Yesus na a kroisi

Mat 27:32-44; Luk 23:26-43; Yoh 19:17-27

21Wan man ben kmopo na boiti e kon, dan den dwengi en fu tyari a kroisi fu Yesus. A man disi ben nen Simon, èn a ben de fu a foto Sirena. A ben de a p'pa fu Aleksander nanga Rufus.

15:21
Rom 16:13
22Dan den tyari Yesus go na a presi san den e kari Golgota. Golgota wani taki: Dede-ede Presi. 23Den gi En win moksi nanga mirre fu A dringi, ma A no dringi en. 24Dan den spikri En na a kroisi. Baka dati den prati En krosi, ma den ben hari a lot fosi fu luku suma o teki sortu pisi fu a krosi.
15:24
Psa 22:19
25A ben de neigi yuru mamanten di den spikri En na a kroisi. 26Den ben skrifi fu sanede den spikri En. Den skrifi: “A Kownu fu den Dyu.” 27Makandra nanga En den spikri tu fufuruman: wan na En let'anu sei, èn a trawan na En kruktu-anu sei. 28Na so san skrifi ini a Santa Buku kon tru. A skrifi taki: Den si en leki wan abani.15:28 Wantu manuscript no abi vers 28.
15:28
Yes 53:12
29Den sma di ben e waka psa afrontu Yesus. Den seki den ede èn den taki: “So, a no Yu ben o broko a santa presi dan Yu meki en baka ini dri dei?
15:29 a
Psa 22:8
109:25
30We, yepi Yusrefi! Saka kmopo fu a kroisi dan!” 31Den prenspari priester makandra nanga den sabiman fu Gado wèt ben meki spotu nanga Yesus tu. Den taki: “A ben yepi trawan, ma A no man yepi Ensrefi. 32Efu Yu na a Mesias, a Kownu fu Israel, saka kmopo fu a kroisi now, meki un si. Dan wi sa bribi.” Den man di ben spikri makandra nanga En, ben kosi En tu.

A dede fu Yesus

Mat 27:45-56; Luk 23:44-49; Yoh 19:28-30

33Di twarfu yuru doro, a heri kondre kon dungru te leki dri yuru bakadina. 34Dan a yuru dati Yesus bari taki: “Elohi, Elohi, lama sabaktani?” Dati wani taki: Mi Gado, Mi Gado, fu sanede Yu gwe libi Mi?

15:34
Psa 22:2
35Di wantu sma di ben tnapu drape yere a sani disi, den taki: “Arki! A e kari Elia.” 36Dan wan fu den lon go teki wan sponsu. A nati en nanga swa win, a fasi en na wan tiki, dan a langa en gi Yesus fu A dringi. A taki: “Wakti, meki un luku efu Elia o kon puru En na a kroisi.”
15:36
Psa 69:22
37Ma Yesus bari nanga tranga sten, dan En bro koti. 38Dan a garden ini a santa presi priti langalanga na mindri fu loktu kon te na gron.
15:38
Eks 26:31-33
39Di a kapten fu den srudati di ben tnapu e luku Yesus, si fa En bro koti, a taki: “Trutru, a Man disi ben de a Manpikin fu Gado!” 40Wantu uma ben tnapu fu fara e luku. Wantu fu den uma dati ben de: Salome, Maria fu a foto Magdala, nanga Maria a m'ma fu Yoses nanga Yakobus a yonguwan.
15:40-41
Luk 8:2-3
41Di Yesus ben de na ini Galilea, den uma disi ben e waka na En baka, èn den ben e yepi En. Wan lo tra umasma ben drape tu di ben kon nanga En na Yerusalem.

Den beri Yesus

Mat 27:57-61; Luk 23:50-56; Yoh 19:38-42

42A ben de a dei fosi a sabatdei èn neti ben de fu tapu. Tapu a dei dati den sma ben e meki ala sani klari gi a sabatdei. 43Dan Yosef fu a foto Arimatea teki dek'ati go na Pilatus fu aksi en a dedeskin fu Yesus. A man disi ben de wan prenspari man fu a grankrutu fu den Dyu èn a ben angri tu fu Gado kon tiri libisma. 44Pilatus ben ferwondru taki Yesus ben dede kba. A seni kari a kapten fu den srudati, dan a aksi en efu Yesus dede kba. 45Di a kapten taigi en taki A dede, Pilatus gi Yosef a dedeskin. 46Yosef bai wan linnen krosi, a puru a skin fu Yesus na a kroisi, dan a domru en na ini. Baka dati a poti Yesus na ini wan grebi san den ben diki ini a bergiskin. Dan a lolo wan bigi ston na a mofo fu a grebi fu tapu en.

47Maria fu Magdala nanga Maria, a m'ma fu Yoses, si pe Yosef poti a skin fu Yesus.

16

Yesus kon baka na libi

Mat 28:1-8; Luk 24:1-12; Yoh 20:1-10

161Baka a sabatdei, Salome, Maria fu Magdala, nanga Maria a m'ma fu Yakobus, bai den sani di de fanowdu fu go sreka a dedeskin fu Yesus. 2Dan fruku mamanten tapu a fosi dei fu a wiki, di a son opo, den go na a grebi. 3Den ben aksi makandra taki: “Suma sa lolo a ston puru fesi a grebi-olo gi unu?” 4A ston ben de wan bigi ston. Dan di den luku go na a grebi, den si taki a ston lolo kmopo. 5Di den go ini a olo, den si wan yongu man di ben weri weti krosi, sidon na a let'anu sei. Den skreki taki den no ben sabi san fu taki. 6Dan a man taigi den taki: “Un no mus ferwondru. Na Yesus fu Nasaret di den ben spikri na a kroisi un e suku. A no dya, A kon baka na libi. Luku pe den ben poti en didon. 7Un go na den man di ben teki leri fu En, dan un taigi den nanga Petrus taki: Yesus go na un fesi na Galilea. Drape un sa si En, soleki fa A ben taigi unu.”

16:7
Mat 26:32
Mrk 14:28

8Den uma kmopo ini a grebi-olo, dan den lon gwe. Bika den ben beifi èn den ben ferwondru. Den no taigi no wan sma no wan sani, bika den ben frede.

Yesus sori Ensrefi na Maria fu Magdala

Mat 28:9-10; Yoh 20:11-18

9Fruku mamanten fu a fosi dei fu a wiki, di Yesus kon baka na libi, A sori Ensrefi fosi na Maria fu Magdala. Yesus ben puru seibi takruyeye na tapu a uma disi. 10Dan Maria go taigi den man di ben waka nanga Yesus ala ten. Den man disi ben e sari èn den ben e krei. 11Ma di Maria taigi den tak' Yesus e libi, èn tak' a si En, den no ben wani bribi.

Yesus sori Ensrefi na tu man

Luk 24:13-35

12Baka dati Yesus sori Ensrefi wan tra fasi na tu fu den man di ben e teki leri fu En di ben de na pasi e go na wan dorpu. 13Dan den man drai go baka go taigi den trawan, ma den trawan no ben bribi den man disi tu.

Yesus sori Ensrefi na den man di ben teki leri fu En

Mat 28:16-20; Luk 24:36-49; Yoh 20:19-23; Bosk 1:6-8

14Te fu kba Yesus sori Ensrefi na den erfu man fu En di den ben sidon e nyan. Dan Yesus bigin puru wiwiri gi den tak' den no e bribi, èn tak' den trangayesi. Bika den no ben wani bribi den sma di si En baka di A kon baka na libi. 15Dan Yesus taigi den taki: “Un go na ala sei fu grontapu, èn ferteri ala sma a bun nyunsu.

16:15
Bosk 1:8
16A sma di bribi èn teki dopu, sa kisi a libi fu têgo. Ma den sma di no wani bribi, o kisi strafu. 17Fu sori taki A de nanga den, Gado o gi den sma di e bribi makti fu du den marki disi: den o puru takruyeye tapu sma na ini Mi nen, èn den o taki na ini nyun tongo. 18Den o hori sneki nanga den anu, èn awinsi den dringi wan sani san kan kiri den, noti no o psa nanga den. Den o poti anu tapu sikisma, dan den o kon betre.”

Yesus opo go na heimel

Luk 24:50-53; Bosk 1:9-11

19Baka di Masra Yesus kba taki nanga den, Gado teki En go na heimel. Drape A go sidon na Gado let'anu sei.

16:19
Bosk 1:9-11
20Dan den man go ala sei go panya a bun nyunsu. Masra ben yepi den. A ben gi den makti fu du marki fu sori taki san den e taki na tru.16:20 Wantu manuscript no abi vers 9 te kon miti vers 20.