Sranan Tongo Bible 2016 (STB16)
1

11A boskopu fu Gado gi Nineve. Disi na a buku pe den sani skrifi di Nahum, fu Elkos, si.

2MASRA na wan dyarusu Gado,

wan Gado di e pai den feyanti fu En baka.

Nanga bigi atibron MASRA e pai den baka.

MASRA e pai den sma baka di wan feti nanga En,

A e puru En atibron tapu den feyanti fu En.

3MASRA abi langa pasensi,

ma A abi bigi krakti tu.

MASRA e strafu ala sma di fiti fu kisi strafu.

A e kon ini wan drai winti,

ini wan tranga winti.

Den wolku ondro En futu,

den de leki drei doti di e wai opo.

4A e komanderi a se,

A e meki a se drei gwe.

Ala liba A e meki drei gwe.

So den wei fu Basan e drei gwe.

Ala san e gro tapu a Karmelbergi e drei gwe tu.

srefi den bromki fu a Libanonbergi e drei gwe.

5Bergi e beifi gi En,

pikin bergi e seki.

Grontapu e opo gi En,

iya, ala den kondre nanga ala den sma fu den.

6Suma man kaka futu gi a atibron fu En?

Suma man tan tnapu efu A lusu En atibron?

A atibron fu En de leki wan faya,

wan faya di e broko bigi ston pis'pisi.

7Ma MASRA bun,

A de leki wan tranga presi pe yu kan go kibri te yu de ini nowtu.

A sabi den sma di e kibri na En.

8Nanga wan frudu A e wasi a presi fu En feyanti gwe.

A e yagi den go na dungru presi.

9Awinsi san den prakseri fu du baka,

MASRA e pori den prakseri fu den.

10Bika awinsi den frekti densrefi leki makamaka kon na wan,

awinsi sopi e meki den firi taki den man du ala sani,

leki drei grasi den o bron gwe.

11Na ini yu wan sma kmoto di ben poti na en ede fu du ogri,

di ben sidon prakseri fu du MASRA wan sani di no bun.

12Ne MASRA taki disi: “Awinsi den kon nanga ala krakti,

awinsi den kon bosubosu,

den o wai kmoto na pasi, den o dede gwe.

Mi ben broko yu saka,

ma mi no sa broko yu saka moro.

13Mi o puru den na yu tapu

bika den ben de leki wan ston na yu neki.

Mi o broko den keti di ben tai yu.”

14Ma gi yu, MASRA taki disi:

Yu no sa kisi pikin moro fu tyari yu nen.

Mi o broko ala den popki fu den gado fu yu ini den tempel fu den.

Mi o meki yu grebi klari,

bika yu no warti fu tan na libi.

15Luku, wan knekti e lon kon abra den bergi,

wan di e tyari bun nyunsu fu ferlusu kon.

Yuda, hori den fesa fu yu,

du den sani di yu ben pramisi fu du.

Bika a ogriwan no o hari kon ini yu kondre moro,

A kiri puru na pasi.1:15 Son vertaling abi a vers disi leki 2:1.

2

21A wan opo, di o panya den go na ala sei.

Nineve, poti waktiman fu luku a foto,

hori ai tapu a pasi.

Seti yusrefi,

kari ala yu krakti kon na wan.

2Bika MASRA gi Yakob a glori fu en baka,

leki di fu Israel,

awinsi fa fufuruman ben fufuru den sani fu den tyari gwe,

awinsi fa den ben broko den droifibon fu den.

3Den schild fu den dyadya fetiman fu en redi,

den srudati weri redi krosi.

Den fetiwagi fu en di a seti e brenki,

den lansri fu en e sori go na fesi kba.

4Es'esi den wagi e lon psa den strati,

den e frei psa ini den wei.

Den gersi frambo,

den e psa na yu fesi leki a faya di e koti na loktu.

5A e pusu den ofisiri fu en fu du es'esi,

den futu e frekti fa den e feti fu go.

Den e lon go miti den skotu fu a foto,

den seti wan daki fu kibri densrefi.

6Den sroisi e opo,

a oso fu kownu e fadon broko.

7A kba. Sondro krosi den e tyari en gwe.

A krei fu den srafu fu en gersi a babari fu doifi.

Den e naki tapu den borsu fu sori fa den e sari.

8Nineve ben de ala ten leki wan kriki di ben furu nanga watra,

Now ala a watra lon gwe.

Un tan tnapu! Un tan tnapu.

Ma no wan sma e drai luku.

9Un fufuru a solfru, un fufuru a gowtu!

So furu de taki a gersi leki wan kba no e kon na en.

Bogobogo gudu de fu teki.

10Ala sani leigi, ala sani broko fadon, ala sani didon panyapanya.

Den ati broko, den kindi e beifi,

pe den tnapu den steifi,

ala den fesi kon weti.

11San psa nanga a nesi fu den lew?

San psa nanga a presi pe den yongu lew ben e nyan?

A presi pe a lew, a umalew nanga den pikinwan,

ben e waka sondro fu wan sma trobi den.

12Pe a lew de di ben e fufuru fu den pikin fu en kan nyan,

di ben e kiri gi den uma fu en,

di ben e furu den olo pe a ben e tan,

nanga a nesi fu en,

nanga meti di a ben kiri.

13Ma arki, Mi o feti yu now,

MASRA fu ala sani taki.

Mi o bron ala den fetiwagi fu yu.

Deigri o kiri ala den yongu lew fu yu.

Mi o figi ala sani gwe di yu ben wini ini den feti fu yu,

èn noiti moro sma o yere a sten fu den boskopuman fu yu.

3

31Yu, foto di e meki brudu lon,

yu mus luku bun!

Bika soso lei yu sabi,

yu furu nanga sani di yu wini ini feti.

Yu no e tapu fu fufuru.

2Arki, wipi e naki.

Arki, a babari fu wagiwiel.

Asi e lon,

fetiwagi e seki.

3Asi e dyompo,

deigri e brenki,

lansri e koti faya.

Den wan di kisi mankeri no de fu teri,

dedesma na ala sei,

dedeskin, so fara leki yu ai man si.

Yu e stotu yu futu na den dedeskin.

4Nineve, na a hurulibi fu yu meki ala den sani disi psa.

Yu ben man drai sma ede nanga a moi di yu moi.

Yu sabi du tofruwroko bun di e tyari sma go na den grebi.

Yu meki heriheri folku tron srafu nanga a huru libi fu yu,

heriheri lo nanga a tofruwroko fu yu.

5Ma arki, Mi o feti yu now,

MASRA fu ala sani taki.

Mi o opo yu krosi te abra yu ede,

meki ala folku si yu sondro krosi.

Mi o sori ala kownu yu syenpresi.

6Mi o trowe doti na yu tapu,

Mi o gi yu syen na ala sma fesi.

7Dan ala sma di si yu sa drai den fesi gi yu èn taki:

Nineve broko pis'pisi.

Suma sa firi sari gi en?

Suma mi o feni fu trowstu yu.

8Yu no betre moro Thebe, di didon na a Nijl-liba,

pe watra lontu en na ala sei.

Na a se ben e kibri en,

watra ben de leki wan skotu lontu en.

9Etiopia nanga Egipte ben e hori baka gi yu,

ala ten.

Put nanga Libia ben e hari kon yepi yu.

10Ma srefi den sma fu a foto dati yu ben tyari gwe leki srafu.

Den nyunyun pikin fu en yu ben e naki kiri

tapu den uku fu den strati.

Yu ben e fringi lot

fu luku suma bo teki den guduman fu a kondre.

Ala den fesiman yu naki poti na bui.

11Ma yusrefi o drungu tu,

yusrefi no o man denki krin moro,

yusrefi o abi fu kibri gi yu feyanti.

12Den tranga foto fu yu,

den gersi figabon nanga froktu di lepi fosi den ten.

Efu yu seki a bon,

den e fadon langalanga ini a mofo fu a sma di o nyan den.

13Luku, na soso umasma de ini a legre fu yu.

Den bigi doro fu a kondre bradi densrefi opo gi den feyanti fu yu.

Faya bron den bowtu nanga san den e tapu den doro fu a foto.

14Kibri watra poti fu te feyanti lontu a foto.

Meki den foto fu yu moro tranga.

Stampu a kleidoti,

masi a smenti,

teki yu wrokosani fu meki ston.

15Ma dati no o hori a faya fu no bron yu,

a deigri fu no kiri yu.

A o nyan yu,

leki fa wan grupu sprenka no e libi noti na baka fu san den nyan.

Yu kan furu leki den sprenka srefi,

yu kan meki pikin so furu srefi leki den.

16Den bai nanga seriman fu yu,

den furu moro den stari na heimel.

Den gersi wan ipi sprenka di e opo den frei èn frei gwe.

17Den srudati fu yu furu leki sprenka,

den wrokoman fu yu leki freifrei.

Solanga a kowru den e kibri na mindri den ston fu a skotu.

Te a son opo den e frei gwe.

No wan sma no sabi pe den go.

18Kownu fu Asiria, den tiriman fu yu dede.

Den bigiman fu kondre tapu den ai fu têgo.

A folku fu yu panya tapu den bergi.

No wan sma de fu tyari den kon na wan.

19Dresi no de gi a mankeri fu yu,

a soro fu yu no o kon betre.

Ala sma di yere san psa nanga yu e naki anu fu prisiri.

Bika yu no ben abi no wan firi gi trawan

èn ala sma ben e firi dati dorodoro.