Sranan Tongo Bible 2016 (STB16)
11

Gado e strafu a folku

111A folku ben e krutukrutu èn disi no ben de wan bun sani na a yesi fu MASRA. MASRA ben yere san den ben taki èn a ben gi En atibron. Ne a faya fu MASRA bigin bron na den mindri. A faya bigin bron na seisei fu a kampu. 2Dan a folku bari suku Moses. Ne Moses begi MASRA dan a faya dede. 3Na fu dat'ede den e kari a presi Tabera, fu di a faya fu MASRA ben bron na den mindri.

4Wan grupu fu ala sortu sma fu tra folku ben de mindri den Israelitisma. Nyanyan no ben sari den sma disi. So den Israelitisma srefi ben e bigin knor'knoru. Den taki: “Suma o gi wi meti fu nyan? 5Wi e prakseri a fisi di wi ben e nyan fu soso na ini Egipte. Den komkomro, den watramun, a supuwiwiri, a ayun nanga a konofroku. 6Ma now wi e drei gwe. Not'noti no dyaso. Soso a mana disi wi e si.” 7A mana ben gersi koriandersiri, ma a ben abi a kloru fu balsemhars. 8A folku ben e panya go na alasei fu suku a mana. Den ben e mara en ini pikin miri noso den ben stampu en na ini mata. Den ben e bori en na ini patu èn den ben e meki kuku fu en. Den kuku ben e tesi leki den ben baka na ini oli. 9Ala neti te a dow ben e fadon tapu a kampu, a mana ben e fadon tapu a kampu tu.

10Moses ben e yere fa a heri folku, ala den lo, ben e krutukrutu na mofodoro fu den tenti èn a lasi ati di MASRA ati bron srefsrefi. 11Ne a aksi MASRA taki: “Fu sanede Yu e libi so nanga mi? Fu sanede Yu no sori Yu knekti Yu bun-ati. Fu sanede Yu poti a lai fu a heri folku disi na tapu mi skowru? 12A no mi ben tyari a folku disi ini mi bere. A no mi tyari den kon na grontapu tu. Dan fa Yu kan taigi mi taki: ‘Tyari den tapu yu anu. Leki fa den e tyari nyunyun pikin tapu den anu, na so yu mus tyari den go na a kondre di Mi sweri gi den afo fu yu taki Mi o gi den.’ 13Pe mi o feni meti fu gi a heri folku disi? Den e krutu gi mi taki: ‘Gi unu meti fu nyan!’ 14Mi wawan no man teki a sorgu fu a heri folku disi na mi tapu. A hebi tumsi gi mi. 15Efu na so Yu wan du nanga mi dan sori mi Yu bun-ati, kiri mi, dan mi no sa pina moro langa.”

16Ne MASRA piki Moses taki: “Teki seibitenti fesiman fu Israel. Den mus de man fu san yu sabi taki den na fesiman nanga tiriman fu a folku. Meki den kon tnapu na yu fesi na a tenti pe yu kan miti nanga Gado. 17Dan Mi sa saka kon fu taki drape nanga yu. Mi sa teki wan pisi fu a Yeye di de na yu tapu poti na den tapu. So den sa yepi yu tyari a lai fu a folku dan yu wawan no abi fu tyari en. 18Ma yu mus taigi a folku taki: ‘Un mus sorgu taki tamara mamanten un santa. Dan un o nyan meti. Bika un krutu gi MASRA taki: Suma sa gi un meti fu nyan? Un ben abi en so bun na ini Egipte. MASRA o gi unu meti fu nyan. Un o nyan meti! 19A no wan noso tu dei nomo. A no feifi, tin noso tutenti dei nomo. 20Ma wan heri mun langa te leki a e kmoto na ini un noso èn un e fuga fu en. Bika un si MASRA di de na un mindri leki noti èn un krutu taki un no sabi fu sanede un kmoto na ini Egipte.’ ” 21Ne Moses taki: “Mi de dyaso nanga wan folku fu siksi hondro dusun sma. Dan fa Yu o man gi den meti fu nyan wan heri mun langa? 22Pe wi o feni someni skapu nanga kaw fu srakti gi den te leki den no man nyan moro? Srefi efu wi ben fanga ala den fisi fu a se gi den, a no bo sari den.” 23Ma MASRA piki Moses taki: “Yu denki taki disi na wan sani san Mi no man du? Mi sa meki yu si taki Mi o du san Mi taigi yu.”

24Moses go na dorosei dan a taigi a folku san MASRA ben taki. Baka dati a teki seibitenti fesiman fu a folku, dan a meki den tnapu lontu a tenti. 25Dan MASRA saka kon ini a wolku. A taki nanga Moses èn A teki wan pisi fu a Yeye di ben de na en tapu poti tapu den seibitenti fesiman. Di a Yeye ben de na den tapu den ben man taki san Gado ben e gi den fu taki. Baka dati den no ben man du disi moro. 26Tu man, di ben nen Eldad nanga Medad, ben tan na baka ini a kampu. Den nen ben skrifi tu ma den no ben go na a tenti fu Gado. Di a Yeye kon na den tapu den bigin taki ini a kampu san Gado ben gi den fu taki. 27Dan wan yonkuman lon go taigi Moses taki: “Eldad nanga Medad e taki san Gado e gi den fu taki ini a kampu.” 28Ne Yosua, a manpikin fu Nun, di ben de a knekti fu Moses sensi di a ben yongu, taki: “Mi masra Moses, tapu den fu den no du dati.” 29Ma Moses piki en taki: “Na dyompo yu wan dyompo gi mi? Mi winsi taki MASRA ben poti En Yeye tapu ala sma, meki a heri folku fu MASRA ben de profeiti.” 30Di Moses taki dati a drai go baka na a kampu nanga den fesiman fu Israel.

31Dan MASRA meki wan winti bigin wai. A winti ben wai fowru fu a se kon trowe tapu a kampu. Den ben didon alasei lontu a kampu tapu makandra, wan meter hei. Efu yu ben waka wan dei langa kmoto fu a kampu yu ben feni den ete. 32Ne a folku bigin piki den fowru. A heri dei, a heri neti nanga a tamara mamanten fu en. A sma di ben piki a moro pikinso, ben piki sowan tu dusun kilo. Den ben poti den lontu a heri kampu fu drei. 33Ma leki fa den ben poti a meti ini den mofo, fosi den kaw en srefi, MASRA lusu En atibron tapu folku èn A kiri wan lo fu den. 34Dat' meki den e kari a presi dati Kibrot-Hatawa, fu di na drape den beri den sma di ben feni taki nyanyan no ben sari den.

35Fu Kibrot-Hatawa a folku hari go na Haserot. Dan den tan wan pisten na Haserot.

12

Gado e strafu Miryam

121Miryam ben taki nanga Aaron fu a trow di Moses ben trow nanga wan uma fu Etiopia. Bika a ben de so taki Moses ben trow nanga wan uma fu Etiopia. 2Den ben taki tak': “A no nanga Moses wawan MASRA e taki. A taki nanga unu tu.” Ma MASRA ben yere san den ben taki. 3Moses srefi ben de wan safri-ati sma. No wan sma na grontapu ben abi sowan safri-ati leki en. 4Sondro draidrai MASRA taigi Moses, Aaron nanga Miryam taki: “Un go na a tenti pe yu kan miti nanga Gado.” So den ala dri go na a tenti pe yu ben kan miti nanga Gado. 5Dan MASRA saka kon ini a wolku. A ben tan na mofodoro fu a tenti, dan a kari Aaron nanga Miryam. Di den ala tu waka kon na fesi 6A taigi den taki: “Arki san Mi o taigi unu. Efu wan profeiti de na un mindri, dan Mi, MASRA, e meki a si wan sani pe Mi e sori misrefi na en. Mi e taki nanga en na ini dren. 7Ma nanga Mi knekti Moses a no sa de so. Mi e fertrow en na Mi pipel. 8Mi e taki fesi nanga fesi, krin nanga en. Mi no e kibri noti gi en. A si fa MASRA tan. Fa un ben kan prefuru fu taki na tapu Mi knekti Moses?” 9Dan MASRA gwe ma En ati ben e bron srefsrefi na den tapu. 10Di a wolku ben kmoto tapu a tenti den si taki Miryam en skin ben kon weti leki katun. Di Aaron drai luku Miryam a si wan sma di ben abi gwasi siki. 11Ne Aaron taigi Moses taki: “Tye masra, no strafu wi gi a sondu disi di wi du leki tu don sma. 12No meki a gersi wan sma di ben dede èn di meti ben e pori kba, di a e kmoto ini en m'ma bere.” 13Dan Moses begi MASRA taki: “Tye Gado, dresi en.” 14Ne MASRA piki Moses taki: “Efu na en p'pa ben spiti na ini en fesi, dan na seibi dei langa a ben o a waka nanga a syen dati. Dat' meki na seibi dei langa un mus sroto en na dorosei fu a kampu. Baka dati a kan kon na ini a kampu baka.” 15So den sroto Miryam seibi dei na dorosei fu a kampu. A folku no ben hari go moro fara solanga Miryam no ben kon baka na den mindri. 16Baka dati den hari kmoto fu Haserot dan den meki den kampu na ini a Paransabana.

13

Den man fu Israel e go luku kibrikibri fa Kanaan tan

131MASRA taigi Moses taki: 2“Seni wantu man go fu go luku fa a kondre Kanaan tan di Mi sa gi na den sma fu Israel. Fu ibri lo yu sa teki wan man di sa go gi a lo fu en. Ma den mus de edeman fu wan famiri.” 3Dan Moses seni den kmoto ini a Paransabana leki fa MASRA ben taigi en fu du. Ala den man ben de edeman fu den Israelitisma. 4Den nen fu den ben de: Samua, a manpikin fu Sakur, fu a lo fu Ruben. 5Safat, a manpikin fu Hori, fu a lo fu Simeon. 6Kaleb, a manpikin fu Yefune, fu a lo fu Yuda. 7Yigal, a manpikin fu Yosef, fu a lo fu Isakar. 8Hosea, a manpikin fu Nun, fu a lo fu Efraim. 9Palti, a manpikin fu Rafu, fu a lo fu Benyamin. 10Gadiyel, a manpikin fu Sodi, fu a lo fu Sebulon. 11Gadi, a manpikin fu Susi, fu a lo fu Manase, fu a lo fu Yosef. 12Amiyel, a manpikin fu Gemali, fu a lo fu Dan. 13Setur, a manpikin fu Mikael, fu a lo fu Aser. 14Nakbi, a manpikin fu Wofsi, fu a lo fu Naftali. 15Geyuel, a manpikin fu Maki, fu a lo fu Gad. 16Disi na den nen fu den man di Moses ben seni go fu go luku fa a kondre tan. Moses ben gi Hosea, a manpikin fu Nun, a nen fu Yosua.

17Na so Moses seni den go fu go luku fa a kondre Kanaan ben tan. A taigi den taki: “Un hari go ini a Negebsabana dan un e kren go tapu den bergi. 18Dan un mus luku fa a kondre tan, efu a folku di e libi drape tranga noso swaki èn efu na wan pikin folku nomo noso wan bigi folku. 19Luku tu efu a kondre pe a folku e tan na wan bun kondre fu tan noso wan kondre pe sma no man tan. Luku fa den foto de pe a folku e tan, efu na ini tenti den e tan noso ini foto di tranga fu teki abra. 20Luku efu a gron fatu noso efu gron mangri, efu bon e gron drape noso efu bon no e gro drape. Un teki dek'ati. Un mus tyari froktu fu a kondre kon.” A pisten dati a ben de a ten pe den fosi droifi ben mus lepi. 21So den man go dan den luku fu a kondre ben tan. Den luku fu a Sinsabana go te na Rekob, pe a pasi e bigin di e go na Hamat. 22Den hari psa ini a Negebsabana te leki den doro na Hebron. Drape Akiman, Sesai nanga Talmai ben e tan. Bakapikin fu Enak. Hebron ben bow seibi yari fosi Soan ini Egipte. 23Di den doro ini a Eskoldal, den koti wan taki nanga wan bosu droifi. Den ben tai a bosu na wan tiki dan tu sma ben e syow en. Den ben piki wantu granaki-apra nanga figa tu. 24Den ben e kari a presi dati a Eskoldal, fu di na drape den Israelitisma ben koti a bosu droifi puru.

25Baka di den man luku fotenti dei langa fa a kondre tan, den drai go baka. 26Den go na Moses, Aaron nanga ala den Israelitisma di ben de na Kades, ini a Paransabana. Dan den ferteri den nanga ala den sma san den si èn den sori den den froktu fu a kondre. 27Den ferteri taki: “Wi doro ini a kondre pe un ben seni wi go. A tru, na wan kondre pe merki nanga oni de bogobogo. Disi na den froktu fu en. 28Ma wan tranga folku e libi ini a kondre. Den foto fu den bigi èn den abi skotu lontu den. Wi si bakapikin fu Enak drape tu. 29Den Amalekitisma e libi ini a Negebsabana. Tapu den bergi den Hetitisma, den Yebusitisma nanga den Amoritisma e tan. Den Kananitisma e libi na a sekanti nanga na syoro fu a Yordanliba.” 30Kaleb ben e suku fu meki den sma arki Moses. Dat' meki a taki: “Un no abi fu frede fu hari go èn teki a kondre abra, bika wi o man du dati tu.” 31Ma den man di ben go nanga en taki: “Meki wi no hari go feti nanga a folku, bika den tranga moro wi.” 32Den panya ala sortu takru nyunsu tu fu a kondre di den ben go luku. Den taki: “Na wan kondre pe sma no e tan na libi. Ala den sma di wi si drape ben langa trutru. 33Wi si bun langa man tu, bakapikin fu Enak. Wi ben firi wisrefi leki sprenka èn ini den ai wi ben sa gersi sprenka tu.”