Sranan Tongo Bible 2016 (STB16)
14

141Ne ala den Israelitisma bigin krei trangatranga. Heri neti den krei. 2Ala den Israelitisma bigin krutukrutu gi Moses nanga Aaron. Den taigi den taki: “Tye, a ben o moro betre efu wi ben dede ini Egipte noso dyaso ini a dreisabana! 3Fu sanede MASRA tyari wi kon na a kondre disi? Fu den kiri wi na ini feti? Fu den teki den frow nanga den pikin fu wi leki srafu? A ben o moro betre gi wi efu wi ben drai go baka na Egipte.” 4Den ben taigi makandra tu taki: “Kon meki wi teki wan man leki fesiman, dan wi drai go baka na Egipte.” 5Ne Moses nanga Aaron trowe densrefi nanga fesi na gron, leti na fesi fu ala den sma fu Israel. 6Yosua, a manpikin fu Nun, nanga Kaleb, a manpikin fu Yefune, priti den krosi. Den tu man disi ben de fu a grupu di ben go luku fa a kondre tan. 7Den taigi ala den Israelitisma taki: “Wi ben go luku fa a kondre tan èn wi waka ini a heri kondre. Na wan tumsi bun kondre. 8Efu MASRA abi prisiri nanga wi, dan A sa tyari wi go ini a kondre èn A sa gi wi a kondre. Wan kondre pe merki nanga oni de bogobogo. 9Un no kaka un futu gi MASRA, èn un no mus frede gi a folku fu a kondre bika sondro muiti wi o wini den. Den no abi noti di e feti gi den, ma MASRA de nanga wi.” 10Ne ala den Israelitisma teki ston fu fringi naki den. Ma dan a glori fu MASRA ben de fu si ini a tenti pe yu kan miti nanga Gado èn ala den Israelitisma si en.

11Dan MASRA taigi Moses taki: “Olanga a folku disi o sori Mi ete taki den no wani Mi? Olanga den o go so doro fu no fertrow Mi aladi den si ala den wondru di Mi du na den mindri? 12Mi sa naki den nanga wan takru siki meki den alamala dede. Dan Mi sa meki den pikin nanga den bakapikin fu yu tron wan folku di bigi èn tranga moro a disi.” 13Ma Moses taigi MASRA taki: “Na Yu puru a folku disi nanga Yu krakti na ini Egipte. Efu den sma fu Egipte yere a sani disi 14den o ferteri en na den sma fu a kondre disi. Den sma fu a kondre disi yere taki Yu, MASRA, de na mindri fu a folku disi èn taki Yu, MASRA, meki den si Yu, fesi nanga fesi. Den yere tu taki a wolku fu Yu de abra den, taki te deiten Yu e go na den fesi ini wan wolku di gersi wan postu èn te neti leki wan faya di gersi wan postu. 15Efu Yu kiri ala den sma fu a folku disi, dan den sma fu den tra folku di yere fu Yu nanga den sani di Yu du, sa taki: 16‘Na fu di MASRA no ben man tyari a folku disi go na a kondre di A sweri taki A o gi den, meki A kiri den ini a dreisabana.’ 17We, MASRA, sori Yu bigi krakti now. Yusrefi ben taki tak': 18‘MASRA abi langa pasensi nanga furu sari-ati. A e gi pardon fu takrudu nanga kruktudu. Ma A e strafu ala sani. A e strafu den pikin, den granpikin nanga den afopikin, fu den ogri di den bigisma fu den ben du.’ 19Mi e begi Yu, sori o bigi a sari-ati fu Yu de èn gi a folku disi pardon fu den ogri fu den, leki fa Yu ben gi den pardon kba, sensi wi kmoto fu Egipte kon miti dyaso.” 20Ne MASRA piki en taki: “Fu di yu aksi, Mi sa gi den pardon. 21Ma Mi e taigi yu tak' leki fa a tru taki Mi e libi èn taki heri grontapu furu nanga Mi glori, 22no wan fu den sma di si a glori fu Mi, nanga den marki di Mi du ini Egipte nanga ini a dreisabana sa tan na libi. Na tin leisi kba den tesi Mi èn den no arki Mi. 23Den no sa si a kondre di Mi sweri gi den afo fu den taki Mi o gi en na den. Iya, no wan fu den o si en fu di den sori tak' den no wani Mi. 24Ma Mi sa tyari Mi knekti Kaleb go na a kondre pe a ben go èn a sa de fu den bakapikin fu en. Bika en ben abi wan heri tra ati èn a tan fertrow na Mi tapu. 25Den Amalekitisma nanga den Kananitisma e libi ini a kontren na den bergifutu. Tamara yu mus drai dan yu e hari go na a dreisabana na a sei fu a Riet Se.”

26MASRA taigi Moses nanga Aaron tu taki: 27“Olanga ala den sma disi o tan krutukrutu na Mi tapu? Mi yere a krutu di den Israelitisma e krutu na Mi tapu. 28Taigi den taki: ‘Na so MASRA taki: Leki fa a tru taki Mi e libi, na so Mi sa du san Mi yere taki un taki! 29Den dedeskin fu unu sa didon ini a sabana disi. Someni leki den ben teri taki un de. Ala sma fu tutenti yari nanga moro owru. No wan no sa mankeri. Dati na fu di un krutukrutu na Mi tapu. 30Fu tru, Mi e taigi unu taki un no sa kon ini a kondre fu san Mi sweri taki na drape Mi ben o meki un tan. Kaleb, a manpikin fu Yefune, nanga Yosua, a manpikin fu Nun, sa go ini a kondre. 31Mi sa meki den pikin fu unu go. Den wan di un ben taki tak' sma o teki den tyari gwe leki srafu. Den dati sa go fu kon leri sabi a kondre di un no ben wani. 32Ma unu dati, den dedeskin fu unu sa didon ini a dreisabana disi. 33Den pikin fu unu o butu, fu di unu no ben de fu fertrow èn den sa drai lontu fotenti yari langa ini a dreisabana, te leki den dedeskin fu un alamala didon ini a dreisabana disi. 34Fotenti dei un ben luku fa a kondre tan, ma fotenti yari un sa butu gi den ogri fu unu. Wan yari gi ala dei. Dan un sa kon sabi san a wan taki te Mi drai Mi baka gi wan sma. 35Na Mi, MASRA, taki so. Mi o du en trutru nanga ala den ogri-ati sma disi, di kaka den futu gi Mi. Na ini a dreisabana disi den o dede. Na dyaso den libi o kon na wan kba.’ ”

36Den man di Moses ben seni fu go luku fa a kondre tan èn di ben meki ala den Israelitisma krutukrutu, fu di den ben panya wan takru nyunsu fu a kondre di den drai kon baka, 37ala den man disi, di ben panya a takru nyunsu fu a kondre, dede. Wan takru siki kiri den na MASRA fesi. 38Fu ala den man di ben go luku fa a kondre tan, na Yosua, a manpikin fu Nun, nanga Kaleb, a manpikin fu Yefune, tan na libi.

39Di Moses taigi den Israelitisma den sani di Gado ben taigi en, den ben e sari srefsrefi. 40A tra dei fu en frukufruku, den ben wani hari go na den bergi. Den taki: “Luku, wi o hari go na presi fu san MASRA ben taki. A tru taki wi sondu.” 41Ma Moses taigi den taki: “Fu sanede un wani du wan sani di MASRA no komanderi un fu du? Un no o man du en. 42Un no go, bika MASRA no de nanga unu. Efu un go den feyanti fu unu o fon unu. 43Bika un o abi fu feti den Amalekitisma nanga den Kananitisma. Den o kiri unu ini a feti. Un ben drai un baka gi MASRA, èn MASRA no sa de nanga unu.” 44Aladi di Moses taigi den, den prefuru fu hari go na den bergi. Ma Moses nanga a kisi fu a ferbontu tan ini a kampu. 45Dan den Amalekitisma nanga den Kananitisma di ben e tan tapu a bergi saka kon èn den fon den. Den yagi den go baka te na Horma.