Sranan Tongo Bible 2016 (STB16)
28

Difrenti ofrandi

281Dan MASRA taigi Moses taki: 2“Komanderi den Israelitisma taki: ‘Un mus sorgu taki un tyari den ofrandi fu Mi tapu den ten di Mi poti. Dati na a nyanyan nanga den ofrandi di mus bron nanga faya leki wan switismeri gi Mi.

3Taigi den taki: Disi na san un sa tyari fu bron nanga faya leki wan ofrandi gi MASRA: gi a aladei ofrandi un sa tyari tu skapu fu wan yari. Noti no mus mankeri den skapu. 4A wan skapu un sa meki klari te mamanten. A trawan sa meki klari te neti e fadon. 5Makandra nanga den skapu un sa tyari tu kilo fini blon leki graan-ofrandi. A blon disi mus moksi nanga wan liter fu a moro bun oleif-oli. 6Disi na a ofrandi di mus bron aladei. Na wan ofrandi di mus bron nanga faya leki wan switismeri gi MASRA. Tapu a Sinaibergi un ben leri fa un mus du en. 7Makandra nanga a ofrandi dati un sa kanti wan liter win gi ibri skapu. Un mus kanti win ini a santa presi leki wan ofrandi gi MASRA. 8A tra skapu un sa meki klari te neti e fadon. Un mus meki en klari nanga wan graan-ofrandi èn un mus kanti win tu leki wan ofrandi, leki fa un e du te mamanten. Na wan ofrandi di mus bron nanga faya leki wan switismeri gi MASRA.

9Tapu a sabatdei un sa tyari tu skapu fu wan yari leki wan ofrandi. Noti no mus mankeri den skapu disi. Makandra nanga den skapu un sa tyari fo kilo fini blon leki graan-ofrandi. A blon disi mus moksi nanga oli. Un sa kanti win leki ofrandi tu. 10Disi na a ofrandi di un mus bron ala sabatdei, boiti a ofrandi di mus bron aladei èn boiti a win di mus kanti aladei leki wan ofrandi.

11Na a bigin fu ala mun un sa bron wan ofrandi gi MASRA tu fu tu yongu bulu, wan man skapu nanga seibi skapu fu wan yari. Noti no mus mankeri den skapu disi. 12Makandra nanga ibri bulu un sa tyari siksi kilo blon leki graan-ofrandi. A blon disi mus moksi nanga oli. Makandra nanga a wan man skapu un mus tyari fo kilo blon leki graan-ofrandi. A blon disi mus moksi nanga oli. 13Nanga ibri skapu un mus tyari tu kilo fini blon leki graan-ofrandi. A blon disi mus moksi nanga oli tu. Na wan ofrandi di mus bron leki wan switismeri, wan ofrandi di bron nanga faya gi MASRA. 14A win di mus kanti leki ofrandi sa de: tu liter gi ibri bulu, wan nanga afu liter gi a man skapu nanga afu liter win gi ibri skapu. Disi na a ofrandi di mus bron ala mun fu a yari. 15Moro fara un sa meki wan bokoboko klari leki ofrandi gi MASRA fu kisi pardon fu sondu. A ofrandi disi sa meki klari, boiti a ofrandi di mus bron aladei èn boiti a win di mus kanti aladei leki ofrandi.

16Tapu a di fu tin-na-fo dei fu a fosi mun, un mus meki a paskanyanyan klari gi MASRA. 17Tapu a di fu tin-na-feifi dei fu a mun dati un sa hori wan fesa. Seibi dei langa un sa nyan brede di meki sondro dyesi. 18Tapu a fosi dei wan spesrutu konmakandra sa de. No wan sma sa du hebi wroko a dei dati. 19Dan un sa bron wan ofrandi nanga faya gi MASRA. Un sa bron wan ofrandi fu tu yongu bulu, wan man skapu nanga seibi skapu fu wan yari. Noti no mus mankeri den meti disi. 20Makandra nanga a ofrandi disi un sa tyari wan graan-ofrandi fu fini blon di moksi nanga oli. Siksi kilo gi ibri bulu nanga fo kilo gi a man skapu. 21Gi ibri wan fu den seibi skapu un sa tyari tu kilo blon. 22Moro fara un mus tyari wan bokoboko leki ofrandi fu kisi pardon fu sondu, fu meki en bun nanga Gado. 23Boiti den ofrandi disi un mus tan tyari den ofrandi di mus bron aladei. 24Ala seibi dei un sa tyari a nyanyan disi leki wan ofrandi di bron nanga faya, leki wan switismeri gi MASRA. Boiti den ofrandi disi un sa tan tyari den ofrandi di mus bron aladei nanga a win di mus kanti aladei leki ofrandi. 25Tapu a di fu seibi dei un sa hori wan santa konmakandra. A dei dati un no sa du no wan hebi wroko.

26Un sa hori wan santa konmakandra tapu a dei di un o tyari den fosi nyanyan fu un gron kon. Dati na a dei fu a fesa fu den wiki. Tapu a dei dati un sa tyari wan nyun graan-ofrandi gi MASRA. Un no sa du no wan hebi wroko. 27Tapu a dei dati un sa bron wan ofrandi leki wan switismeri gi MASRA. Leki ofrandi un sa bron: tu yongu bulu, wan man skapu nanga seibi skapu fu wan yari. 28Un sa tyari a graan-ofrandi tu di e go makandra nanga a ofrandi disi. Dati na fini blon di moksi nanga oli. Siksi kilo gi ibri bulu, fo kilo gi a wan man skapu, 29nanga tu kilo gi ibriwan fu den seibi skapu. 30Moro fara un sa tyari wan bokoboko fu meki en bun baka nanga Gado. 31Noti no mus mankeri den meti disi. Boiti den ofrandi disi un sa tan bron a ofrandi di mus bron aladei nanga a graan-ofrandi di e go makandra nanga en.’ ”

29

291“Tapu a fosi dei fu a di fu seibi mun un sa hori wan santa konmakandra. A sa de wan spesrutu dei gi unu. Un no sa du no wan hebi wroko. 2A dei dati un sa bron leki ofrandi nanga wan switi smeri gi MASRA: wan yongu bulu, wan man skapu nanga seibi skapu fu wan yari. Noti no mus mankeri den skapu. 3Makandra nanga a ofrandi disi un sa tyari wan graan-ofrandi fu fini blon di moksi nanga oli. Siksi kilo gi a bulu, fo kilo gi a man skapu 4nanga tu kilo gi ibriwan fu den seibi skapu. 5Moro fara un sa tyari wan bokoboko leki ofrandi fu kisi pardon fu sondu, fu un meki en bun baka nanga Gado. 6Boiti den ofrandi disi un sa tan tyari a ofrandi di un mus tyari ala mun nanga a graan-ofrandi di e go makandra nanga en, èn un sa tan tyari a ofrandi di mus bron ala dei makandra nanga a graan-ofrandi èn nanga a win di mus kanti leki ofrandi. Un mus du en leki fa un ben leri taki un mus du en. A mus de wan ofrandi di bron nanga faya leki wan switismeri gi MASRA.

7Tapu a di fu tin dei fu a di fu seibi mun un sa hori wan santa konmakandra. Un sa faste a dei dati èn un no sa du no wan hebi wroko. 8Tapu a dei dati un sa bron leki ofrandi nanga wan switismeri gi MASRA: wan yongu bulu, wan man skapu nanga seibi skapu fu wan yari. Noti no mus mankeri den skapu. 9Makandra nanga a ofrandi disi un sa tyari wan graan-ofrandi fu fini blon di moksi nanga oli. Siksi kilo gi a bulu, fo kilo gi a man skapu 10nanga tu kilo gi ibriwan fu den seibi skapu. 11Un sa tyari wan bokoboko leki ofrandi tu fu kisi pardon fu un sondu. Boiti den ofrandi disi, un sa tan tyari a ofrandi fu meki en bun baka nanga Gado, a ofrandi di mus bron aladei, a graan-ofrandi di e go makandra nanga en, nanga a win di mus kanti leki ofrandi.

12Tapu a di fu tin-na-feifi dei fu a di fu seibi mun, un sa hori wan santa konmakandra. Un no sa du no wan hebi wroko. Seibi dei langa un sa hori wan fesa gi MASRA. 13Dan un sa bron wan ofrandi. Un sa bron en nanga faya leki wan switi smeri gi MASRA. Un sa bron tin-na-dri yongu bulu, tu man skapu nanga fotenti skapu fu wan yari. Noti no mus mankeri den meti. 14Makandra nanga a ofrandi disi un sa tyari wan graan-ofrandi fu fini blon di moksi nanga oli. Siksi kilo gi ibriwan fu den tin-na-dri bulu, fo kilo gi den tu man skapu, 15nanga tu kilo gi ibriwan fu den tin-na-fo skapu. 16Un sa tyari wan bokoboko leki ofrandi tu fu kisi pardon fu sondu. Boiti a ofrandi disi un sa tan bron a ofrandi di mus bron aladei tu, a graan-ofrandi di e go makandra nanga en, nanga a win di mus kanti leki ofrandi. 17Tapu a di fu tu dei un sa tyari leki ofrandi twarfu yongu bulu, tu man skapu nanga tin-na-fo skapu fu wan yari. Noti no mus mankeri den skapu disi. Un sa tyari a graan-ofrandi di e go makandra nanga a ofrandi disi, 18nanga a win di mus kanti leki ofrandi gi den bulu, den man skapu nanga den skapu. Un sa du disi leki fa un leri èn un sa poti someni leki fa un ben leri taki un mus du en. 19Un sa tyari wan bokoboko leki ofrandi tu fu kisi pardon fu sondu. Boiti a ofrandi disi un sa tan bron a ofrandi di mus bron aladei, a graan-ofrandi di e go makandra nanga en, nanga a win di mus kanti leki ofrandi. 20Tapu a di fu dri dei un sa tyari erfu bulu, tu man skapu nanga tin-na-fo skapu fu wan yari leki ofrandi. Noti no mus mankeri den skapu disi. 21Un sa tyari a graan-ofrandi di e go makandra nanga a ofrandi disi, nanga a win di mus kanti leki ofrandi gi den bulu, den man skapu nanga den skapu. Un sa du disi leki fa un leri èn un sa poti someni leki fa un ben leri taki un mus du en. 22Un sa tyari wan bokoboko leki ofrandi tu fu kisi pardon fu sondu. Boiti a ofrandi disi un sa tan bron a ofrandi di mus bron aladei, a graan-ofrandi di e go makandra nanga en, nanga a win di mus kanti leki ofrandi. 23Tapu a di fu fo dei un sa tyari tin bulu, tu man skapu nanga tin-na-fo skapu fu wan yari leki ofrandi. Noti no mus mankeri den skapu disi. 24Un sa tyari a graan-ofrandi di e go makandra nanga a ofrandi disi, nanga a win di mus kanti leki ofrandi gi den bulu, den man skapu nanga den skapu. Un sa du disi leki fa un leri èn un sa poti someni leki fa un ben leri taki un mus du en. 25Un sa tyari wan bokoboko leki ofrandi tu fu kisi pardon fu sondu. Boiti a ofrandi disi un sa tan bron a ofrandi di mus bron aladei, a graan-ofrandi di e go makandra nanga en, nanga a win di mus kanti leki ofrandi. 26Tapu a di fu feifi dei un sa tyari neigi bulu, tu man skapu nanga tin-na-fo skapu fu wan yari leki ofrandi. Noti no mus mankeri den skapu disi. 27Un sa tyari a graan-ofrandi di e go makandra nanga a ofrandi disi, nanga a win di mus kanti leki ofrandi gi den bulu, den man skapu nanga den skapu. Un sa du disi leki fa un leri èn un sa poti someni leki fa un ben leri taki un mus du en. 28Un sa tyari wan bokoboko leki ofrandi tu fu kisi pardon fu sondu. Boiti a ofrandi disi un sa tan bron a ofrandi di mus bron aladei, a graan-ofrandi di e go makandra nanga en, nanga a win di mus kanti leki ofrandi. 29Tapu a di fu siksi dei un sa tyari aiti bulu, tu man skapu nanga tin-na-fo skapu fu wan yari leki ofrandi. Noti no mus mankeri den skapu disi. 30Un sa tyari a graan-ofrandi di e go makandra nanga a ofrandi disi, nanga a win di mus kanti leki ofrandi gi den bulu, den man skapu nanga den skapu. Un sa du disi leki fa un leri èn un sa poti someni leki fa un ben leri taki un mus du en. 31Un sa tyari wan bokoboko leki ofrandi tu fu kisi pardon fu sondu. Boiti a ofrandi disi un sa tan bron a ofrandi di mus bron aladei, a graan-ofrandi di e go makandra nanga en, nanga a win di mus kanti leki ofrandi. 32Tapu a di fu seibi dei un sa tyari seibi bulu, tu man skapu nanga tin-na-fo skapu fu wan yari leki ofrandi. Noti no mus mankeri den skapu disi. 33Un sa tyari a graan-ofrandi di e go makandra nanga a ofrandi disi, nanga a win di mus kanti leki ofrandi gi den bulu, den man skapu nanga den skapu. Un sa du disi leki fa un leri èn un sa poti someni leki fa un ben leri taki un mus du en. 34Un sa tyari wan bokoboko leki ofrandi tu fu kisi pardon fu sondu. Boiti a ofrandi disi un sa tan bron a ofrandi di mus bron aladei, a graan-ofrandi di e go makandra nanga en, nanga a win di mus kanti leki ofrandi. 35Tapu a di fu aiti dei un sa konmakandra fu hori wan fesa. Un no sa du no wan hebi wroko. 36A dei dati un sa bron wan ofrandi. Un sa bron en nanga faya leki wan switi smeri gi MASRA. Un sa bron wan bulu, wan man skapu nanga seibi skapu fu wan yari. Noti no mus mankeri den skapu. 37Un sa tyari a graan-ofrandi di e go makandra nanga a ofrandi disi, nanga a win di mus kanti leki ofrandi gi den bulu, den man skapu nanga den skapu. Un sa du disi leki fa un leri èn un sa poti someni leki fa un ben leri taki un mus du en. 38Un sa tyari wan bokoboko leki ofrandi tu fu kisi pardon fu sondu. Boiti a ofrandi disi un sa tan bron a ofrandi di mus bron aladei, a graan-ofrandi di e go makandra nanga en, nanga a win di mus kanti leki ofrandi.

39Disi na den ofrandi di un mus bron gi MASRA tapu den fesadei fu unu, den graan-ofrandi, a win di mus kanti leki ofrandi nanga den freide-ofrandi, boiti den sani di un ben pramisi fu gi leki ofrandi nanga den sani di un wan gi leki ofrandi nanga wan fri wani.” 40Dan Moses taigi den sma fu Israel ala den sani di MASRA taigi en fu du.

30

301Dan Moses taigi den edeman fu den lo fu Israel taki: “Disi na san MASRA komanderi un fu du.

2Te wan man pramisi MASRA taki a o du wan sani, noso te a teki wan plekti nen en tapu fu di a sweri en, a no sa broko a pramisi noso a sweri dati. A sa du en leki fa a ben pramisi noso sweri taki a o du en. 3Ma te wan umasma pramisi MASRA wan sani noso efu a ben teki wan plekti na en tapu di a ben de leki wan yongu uma ete ini en p'pa oso, 4a sa du ala den sani di a ben pramisi èn a sa du ala den plekti di a ben teki na en tapu, efu en p'pa no taki noti di a e yere taki a yongu uma disi e meki a pramisi nanga di a e teki a plekti na en tapu. 5Ma efu en p'pa no ben wani fu a du en di a yere san a uma taki, dan a uma no sa abi fu du no wan fu den pramisi noso den plekti di a ben teki na en tapu. MASRA sa gi en pardon fu di en p'pa no ben wani fu a du en.

6Efu a uma trow, baka di a meki den pramisi èn teki a plekti na en tapu sondro fu a ben denki moro fara, 7a sa hori ensrefi na den pramisi nanga a plekti di a teki na en tapu, efu en masra yere fu en dan a no taki noti. 8Ma efu en masra no wani fu a du en di a kon yere fu en, dan a uma no sa abi fu du en, fu di en masra e meki taki a pramisi di a uma ben meki nanga a ferplekti di a ben teki na en tapu sondro fu a denki moro fara, lasi den krakti. Dan MASRA sa gi en pardon.

9Wan uma di masra dede kba noso wan uma di broko trow sa hori ensrefi na ala pramisi di a ben meki nanga ala plekti di a ben teki na en tapu.

10Efu wan trow uma meki wan pramisi ini a oso fu en masra noso efu a sweri fu teki wan plekti na en tapu 11dan en masra yere ma a no taigi en noti èn a no taigi a frow tu fu no du en, a uma abi fu hori ensrefi na ala pramisi di a ben meki nanga ala plekti di a ben teki na en tapu. 12Ma efu en masra yere dan a kaka futu taki a no wan fu a uma du en, a uma no abi fu hori ensrefi na den pramisi di a ben taki tak' a o du nanga den plekti di a ben teki na en tapu. MASRA sa gi a uma pardon fu di en masra no ben wani fu a du en. 13A masra fu a uma kan meki taki a uma hori ensrefi na ala pramisi nanga ala plekti di a sweri taki a o du, ma en masra kan meki tu taki a uma no abi fu hori ensrefi na no wan fu den sani disi. 14Efu en masra no taki noti te leki a tra dei fu en, dan dati wan taki tak' a uma sa abi fu hori ensrefi na ala pramisi nanga ala plekti di a teki na en tapu. A uma sa abi fu du en fu di en masra no taigi en noti di a yere taki a uma e meki den pramisi. 15Ma efu en masra yere dan a kaka futu taki a no wani fu a uma du en, dan a frantwortu sa de gi a masra.”

16Disi na a fasi fa wan man mus du nanga en uma èn a fasi fa wan p'pa mus du nanga wan umapikin di e libi ini en p'pa oso ete. Na so MASRA komanderi Moses taki den mus tan du.