Sranan Tongo Bible 2016 (STB16)
32

Den lo di kisi gron na a oostsei fu a Yordanliba

321Den sma fu a lo fu Ruben nanga den di fu a lo fu Gad ben abi furu kaw. Den ben luku dan den si taki den kontren fu Yaser nanga di fu Gilead ben bun fu kweki kaw. 2So den sma fu a lo fu Gad nanga di fu a lo fu Ruben kon na Moses, priester Eleasar nanga den edeman fu den Israelitisma dan den taigi den taki: 3“Den kontren Atarot, Dibon, Yaser, Nimra, Hesbon, Elale, Sebam, Nebo nanga Beon, 4di MASRA meki wi teki abra meki heri Israel si, na kontren di bun fu hori kaw èn den knekti fu yu abi kaw.” 5Den taki moro fara taki: “Efu a bun na unu, dan meki den knekti fu yu kisi den kontren disi. No meki wi koti a Yordanliba.” 6Ne Moses taigi den man fu a lo fu Gad nanga den di fu a lo fu Ruben taki: “Un o meki den brada fu unu hari go feti dan un tan dyaso? 7Un o meki den tra Israelitisma lasi ati fu koti abra go na a kondre di MASRA gi den. 8Na a srefi sani den afo fu un du, di mi seni den fu go luku fa a kondre Kades-Barnea ben tan. 9Den hari go te leki a Eskoldal fu luku fa a kondre tan, dan den meki den Israelitisma lasi ati, fu den no go na a kondre di MASRA gi den. 10Ne MASRA ati bron dan A sweri gi den taki: 11‘Fu tru, fu di den no fertrow Mi, meki ala man fu tutenti yari nanga moro owru di hari kmoto na ini Egipte no sa si a kondre di Mi sweri gi Abraham, Isak nanga Yakob taki Mi o gi en na den. 12Soso Kaleb, a manpikin fu Yefune, a Kenisitiman nanga Yosua, a manpikin fu Nun, sa si en fu di den fertrow MASRA.’ 13Fu a sani dati MASRA ati ben bron tapu Israel, taki A meki den waka lontu fotenti yari ini a dreisabana, te leki ala sma ben dede di no ben du san bun ini MASRA ai. 14Luku, now unu tnapu dyaso leki wan grupu fu sondu sma fu du a srefi sani leki den afo fu unu, fu un meki MASRA ati bron moro tapu Israel. 15Efu un drai un baka gi En, A o meki un waka moro langa lontu ini a dreisabana èn un o meki a heri folku disi dede.” 16Ma den man waka kon moro krosbei dan den taki: “Wi wan meki skapupen dyaso gi den meti fu wi èn bow foto gi den pikin fu wi. 17Den pikin fu wi kan tan ini den tranga foto fu den sma fu a kondre no du den noti. Ma wi o meki wisrefi klari fu feti. Wi o hari na fesi fu den Israelitisma te leki den doro na a presi pe den mus de. 18wi no sa drai go na wi oso, fosi ala sma fu Israel kisi wan pisi gron. 19Efu wi kisi a gron na disi sei fu a Yordanliba, na a sei pe son e opo, dan wi no abi fu kisi gron na a tra sei fu a Yordanliba noso moro fara.” 20Ne Moses piki den taki: “Efu na disi un wani du, efu un wani meki unsrefi klari fesi MASRA fu go feti, 21èn efu ibriwan fu unu di meki ensrefi klari fesi MASRA wan koti a Yordanliba abra te leki A yagi den feyanti fu En gwe, 22èn efu un no drai baka te leki A teki a kondre abra, dan MASRA nanga Israel no o abi noti fu taki fu unu èn na fesi fu MASRA a kondre disi sa de fu unu. 23Ma arki, efu un no du dati, dan un e du wan sani di MASRA no wani èn un o firi a bakapisi fu a sondu. 24Un kan bow den foto gi den pikin fu unu nanga den pen gi den skapu nanga krabita fu unu, dan un du san un taki” 25Dan den sma fu a lo fu Ruben nanga di fu Gad taigi moses taki: “Den knekti fu yu sa du leki fa wi masra taigi den fu du. 26Den pikin, den uma fu wi, den kaw nanga ala den meti fu wi sa tan ini den foto fu Gilead. 27Ma den knekti fu yu sa koti abra gi MASRA fu feti. Ibri man di man di meki ensrefi klari fu feti sa go leki fa masra taki.”

28Dan Moses taigi priester Eleasar, Yosua, a manpikin fu Nun, nanga den famiri-edeman fu den lo fu Israel san den mus du. 29A taigi den taki: “Un sa gi den man fu a lo fu Gad nanga di fu Ruben a kontren fu Gilead, efu ibriwan fu den di meki densrefi klari fu feti, koti a Yordanliba abra nanga unu fu feti gi MASRA èn teki a kondre abra gi unu. 30Ma efu den no meki densrefi klari fu feti èn efu den no koti abra nanga unu, dan den o abi fu libi na un mindri ini Kanaan.” 31Ne den man fu a lo fu Gad nanga di fu Ruben piki taki: “Den knekti fu yu sa du san MASRA taki. 32Wi sa meki wisrefi klari fu feti gi MASRA èn koti abra go na a kondre Kanaan. Ma a gron sa wi o kisi sa de na disi sei fu a Yordanliba.”

33Dan Moses gi den bakapikin fu Gad, den di fu Ruben nanga afu fu a lo fu Manase, a manpikin fu Yosef, a kondre fu Sikon, a kownu fu den Amoritisma nanga a kondre fu Og, a kownu fu Basan, nanga ala den foto nanga gron fu den kondre disi. 34Den sma fu a lo fu Gad bow den foto disi baka: 35Dibon, Atarot, Arower, Atrot-Sofan, Yaser, Yogbeha, 36Bet-Nimra, Bet-Haran. Den bow den tranga foto disi nanga skapupen. 37Den sma fu a lo fu Ruben bow den foto disi baka: Hesbon, Elale, Kiryataim, 38Nebo, Baal-Meon, Musabbot-Sem nanga Sibma. Dan den gi den foto di den bow baka tra nen. 39Den manpikin fu Makir, a manpikin fu Manase, go na Gilead. Den teki en abra dan den yagi den Amoritisma gwe di ben e libi drape. 40Dan Moses gi Gilead na Makir, a manpikin fu Manase èn a tan libi drape. 41Yair, wan manpikin fu Manase, hari go dan a teki den dorpu abra fu den Amoritisma. Dan a kari den: den dorpu fu Yair. 42Nobak hari go tu. A teki Kenat nanga den dorpu fu en abra dan a kari den Nobak, leki fa a ben nen.

33

331Disi na den presi pe den Israelitisma ben teki bro, di Moses nanga Aaron ben meki den hari kmoto na ini grupu na ini Egipte. 2Moses ben skrifi fa den ben waka, nanga pe den ben rostu, leki fa MASRA ben taigi en fu du. Disi na den presi pe den ben teki bro.

3Den ben hari kmoto fu Rameses tapu a di fu tin-na-feifi dei fu a fosi mun. A dei baka a Paskafesa den Israelitisma ben hari gwe sondro frede leti fesi ala den sma fu Egipte. 4A pisten dati den sma fu Egipte ben e beri den sma fu den di MASRA ben kiri, ala den fosi pikin. MASRA ben strafu den gado fu den. 5Den Israelitisma hari kmoto na Rameses dan den meki den kampu na Sukot.

6Fu Sukot den hari go na Etam dan den meki den kampu drape. Etan ben didon krosbei fu a dreisabana.

7Baka dati den hari kmoto fu Etam dan den drai go baka na Pi-Hakirot di didon abra Baal-Sefon. Drape den meki den kampu na abrasei fu Migdol.

8Den kmoto fu Pi-Hakirot dan den koti psa mindri a se go na ini a dreisabana. Den waka dri dei langa go ini a dreisabana fu Etan, dan den meki den kampu na Mara.

9Fu Mara den hari go na Elim. Na Elim twarfu watrabron ben de nanga seibitenti palmbon. Dan den meki den kampu drape.

10Fu Elim den hari go na a Riet Se.

11Fu a Riet Se den hari go na a Sinsabana, dan den meki den kampu drape.

12Baka dati den hari kmoto fu a Sinsabana, dan den meki den kampu na Dofka.

13Fu Dofka den hari go na Alus, dan den meki den kampu drape.

14Fu Alus den hari go na Refidim ma watra no ben drape fu a folku dringi.

15Fu Refidim den hari go na a Sinaisabana, dan den meki den kampu drape.

16Fu a Sinaisabana den hari go na Kibrot-Hatawa, dan den meki den kampu drape.

17Fu Kibrot-Hatawa den hari go na Haserot, dan den meki den kampu drape.

18Fu Haserot den hari go na Ritma, dan den meki den kampu drape.

19Fu Ritma den hari go na Rimon-Peres, dan den meki den kampu drape.

20Fu Rimon-Peres den hari go na Libna, dan den meki den kampu drape.

21Fu Libna den hari go na Risa, dan den meki den kampu drape.

22Fu Risa den hari go na Kehelata, dan den meki den kampu drape.

23Fu Kehelata den hari go na Har-Safer, dan den meki den kampu drape.

24Fu Har-Safer den hari go na Harada, dan den meki den kampu drape.

25Fu Harada den hari go na Makhelot, dan den meki den kampu drape.

26Fu Makhelot den hari go na Takat, dan den meki den kampu drape.

27Fu Takat den hari go na Terak, dan den meki den kampu drape.

28Fu Terak den hari go na Mitka, dan den meki den kampu drape.

29Fu Mitka den hari go na Hasmona, dan den meki den kampu drape.

30Fu Hasmona den hari go na Moserot, dan den meki den kampu drape.

31Fu Moserot den hari go na Bene-Yaakan, dan den meki den kampu drape.

32Fu Bene-Yaakan den hari go na Hor-Hagidgad, dan den meki den kampu drape.

33Fu Hor-Hagidgad den hari go na Yotbata dan den meki den kampu drape.

34Fu Yotbata den hari go na Abrona dan den meki den kampu drape.

35Fu Abrona den hari go na Esyon-Geber, dan den meki den kampu drape.

36Fu Esyon-Geber den hari go na a Sinsabana. Drape den meki den kampu na Kades.

37Fu Kades den hari go na a Horbergi, krosbei fu a kondre fu Edom. Dan den meki den kampu drape. 38Dan priester Aaron kren go tapu a Horbergi leki fa MASRA ben taigi fu du, èn a dede drape. Dati ben de tapu a fosi dei fu a di fu feifi mun, fotenti yari baka di den Israelitisma kmoto ini a kondre Egipte. 39Aaron ben abi wan hondro tutenti-na-dri yari di a dede tapu a Horbergi. 40Dan a Kananiti kownu fu Arad, di ben e libi na a Zuidsei fu a kondre Kanaan, kisi fu yere taki den Israelitisma ben e kon.

41Fu a Horbergi den hari go na Salmona, dan den meki den kampu drape.

42Fu Salmona den hari go na Punon, dan den meki den kampu drape.

43Fu Punon den hari go na Obot, dan den meki den kampu drape.

44Fu Obot den hari go na den broko foto fu Abarim ini a kontren fu Moab, dan den meki den kampu drape.

45Fu den broko foto den hari go na Dibon-Gad, dan den meki den kampu drape.

46Fu Dibon-Gad den hari go na Almon-Diblataim, dan den meki den kampu drape.

47Fu Almon-Diblataim den hari go na a Abarimbergi na abrasei fu Nebo, dan den meki den kampu drape.

48Fu a Abarimbergi den hari go na den bigi opo wei fu Moab krosbei fu a Yordanliba na abrasei fu Yeriko, dan den meki den kampu drape. 49Den ben meki den kampu sei a Yordanliba fu Bet-Hayesimot go te na Abel-Hasitim ini den bigi opo wei fu Moab.

50Dan MASRA taigi Moses ini den bigi opo wei fu Moab na a Yordanliba krosbei fu Yeriko taki: 51“Taki nanga den Israelitisma. Taigi den taki: ‘Te un koti a Yordanliba abra go ini a kondre Kanaan, 52un mus yagi ala den sma di e libi ini a kondre gwe. Un mus broko ala den sani di den meki. Un mus broko ala den popki tu di den meki fu den gado fu den nanga den hei presi pe den e anbegi den gado fu den. 53Un mus teki a kondre abra fu libi na ini, bika Mi gi unu a kondre disi taki na fu unu. 54Un sa fringi a lot fu sori sortu pisi fu a kondre den famiri o kisi. Wan bigi famiri un sa gi wan bigi pisi gron. Wan pikin famiri sa kisi wan pikin pisi gron. San a lot sori na dati a famiri sa kisi. Na so a kondre sa prati ondro den difrenti lo. 55Ma efu un no yagi den sma fu a kondre gwe, dan den wan di o tan na un mindri o de leki maka ini un ai. Den o de leki sani di e dyuku un na un seibere. Den o pina unu ini a kondre pe un o tan. 56Dan Mi o du densrefi sani nanga unu san Mi ben abi ini prakseri fu du nanga den.’ ”

34

341Dan MASRA taigi Moses taki: 2“Komanderi den Israelitisma taki: ‘Te un doro ini a kondre Kanaan, a kondre di un o kisi, dan disi sa de o fara a kondre fu unu e waka. 3Na a zuidsei a kondre e waka fu a Sinsabana psa Edom. A moro fara pisi na a zuidsei sa de na a kba fu a Sowtu se na a oostsei. 4Drape a e boigi fu a zuidsei go na a Skorpionpas, dan a e waka go moro fara go na Sin. Fu Sin a e waka go na a zuidsei fu Kades-Barnea, dan a e teki Hasar-Adar go na Asmon. 5Baka dati a sa boigi na Asmon go na a kriki fu Egipte dan a e waka go na a se. 6Na a westsei a kondre sa waka sei a bigi se nanga a sekanti. Dati sa de o fara a kondre o waka na a westsei. 7Disi sa de o fara a kondre o waka na a noordsei: fu a bigi se a kondre o waka langalanga go na a Horbergi. 8Fu a Horbergi a o waka go na a pasi di e go na Hamat. Fu Hamat a e waka go na Sedad. 9Dan a e go moro fara na Sifron. A kba pisi fu en sa de na Hasar-Enan. Na so a kondre sa waka na noordsei. 10Na a oostsei a kondre sa waka langalanga fu Hasar-Enan go na Sefam. 11Fu Sefam a e saka go na Ribla, di didon na a oostsei fu Ain, dan a e saka go moro fara go waka leti sei den bergi di de na a oostsei fu a Meer fu Kineret. 12Baka dati a o saka go na a Yordanliba èn a kba pisi fu en sa de a Sowtu se. Disi na o fara a kondre fu unu o waka.’ ”

13Dan Moses taigi den Israelitisma taki: “Disi na a kondre di un kisi èn di un mus prati. A lot sa sori sortu pisi un sa kisi. Leki fa MASRA taki a sa prati gi den sma fu neigi nanga afu lo. 14Bika den famiri fu a lo fu Ruben nanga den famiri fu a lo fu Gad kisi den gron kba. Afu fu a lo fu Manase kisi di fu den kba tu. 15Den sma fu tu nanga afu lo kisi den gron kba na a oostsei, na a sei pe a son e opo. Dati de na a tra sei fu a Yordanliba na abrasei fu Yeriko.”

16Dan MASRA taigi Moses taki: 17“Disi na den sma di sa sori un sortu pisi fu a kondre un sa kisi: priester Eleasar nanga Yosua, a manpikin fu Nun. 18Fu ibri lo un sa teki wan fesiman te un o prati a kondre. 19Disi na den nen fu den fesiman: Kaleb, a manpikin fu Yefune, fu a lo fu Yuda. 20Semuel, a manpikin fu Amihud, fu a lo fu Simeon. 21Elidad, a manpikin fu Kislon, fu a lo fu Benyamin. 22A fesiman fu a lo fu Dan na Buki, a manpikin fu Yogli. 23Fu den manpikin fu Yosef a fesiman fu a lo fu Manase na Haniyel, a manpikin fu Efod. 24A fesiman fu a lo fu Efraim na Kemuel, a manpikin fu Siftan. 25A fesiman fu a lo fu Sebulon na Elisafan, a manpikin fu Parnak. 26A fesiman fu a lo fu Isakar na Paltiyel, a manpikin fu Asan. 27A fesiman fu a lo fu Aser na Akihud, a manpikin fu Selomi. 28A fesiman fu a lo fu Naftali na Pedael, a manpikin fu Amihud.” 29Na den man disi MASRA ben sori fu prati a kondre gi den Israelitisma ini a kondre Kanaan.