Sranan Tongo Bible 2016 (STB16)
1

Odi

11Gi ala den sma fu Gado na Filipi, di de wan nanga Kristus Yesus,

1:1
Bosk 16:12

Disi na wan brifi fu Paulus nanga Timoteus, knekti fu Kristus Yesus. A brifi disi de tu gi den tiriman nanga den dinari fu a gemeente. 2Wi e winsi taki Gado wi P'pa, nanga Masra Yesus Kristus, sa sori un bun-ati èn gi un freide.

A begi fu Paulus

3Mi e taki Gado tangi ala leisi te mi e prakseri unu. 4Ala leisi te mi e begi gi un alamala, mi e du dati nanga prisiri. 5Bika sensi a fosi dei di un yere a bun nyunsu, kon te leki now, un ben yepi fu panya en. 6Disi mi sabi krinkrin taki: A Wan di bigin a bun wroko ini unu, sa go doro nanga en te leki a kba tapu a dei fu Kristus Yesus.

7A fiti taki mi e prakseri so fu un alamala, bika un abi wan spesrutu presi ini mi ati. Un alamala abi prati ini a bun-ati san Gado sori mi, dya na ini straf'oso èn owktu te mi e gi frantwortu fu sori taki a bun nyunsu tru. 8Gado na mi kotoigi fa a tranga lobi san Kristus Yesus poti ini mi, e meki mi e angri fu si un alamala. 9Mi e begi taki a lobi fu unu sa gro moro nanga moro, èn taki a sa go makandra nanga wan dipi sabi nanga wan krin ferstan. 10Dan un o man sabi san na a moro bun sani fu du. Na so un o de krin èn sondro fowtu na a dei fu Kristus. 11Èn den furu bun wroko san un e du fu di Yesus Kristus meki un kon bun ini Gado ai, sa meki Gado kisi glori nanga grani.

Un mus libi gi Kristus

12Brada nanga sisa, mi wani fu un sabi taki a sani san miti mi, meki a bun nyunsu panya go moro fara. 13Na so a kon krin gi ala den sma na a oso fu a grankownu,1:13 Un kan puru a wortu disi so tu: granman. nanga ala den tra sma, tak' mi de na strafu fu Kristus ede. 14Èn fu di mi de na strafu, meki moro furu fu den brada ini Masra kisi krakti nanga moro dek'ati fu panya a wortu fu Gado sondro frede. 15A tru taki wantu sma e ferteri trawan fu Kristus soso fu di den e dyarusu na mi tapu èn fu di den wani strei nanga mi. Ma trawan e du en nanga wan bun prakseri. 16Den dati e du en nanga lobi. Den sabi taki Masra poti mi fu feti gi a bun nyunsu. 17Ma den fosi sma e preiki fu Kristus fu suku den eigi bun. Den e du en nanga wan takru prakseri: fu hebi a strafu gi mi. 18Ma a no abi trobi fa sma e ferteri trawan fu Kristus: nanga wan bun noso wan takru prakseri. Bika awinsi fa, na panya den e panya a boskopu fu Kristus, èn mi breiti fu dati.

Mi sa tan prisiri fu dati, 19bika mi sabi taki a sani disi o tyari ferlusu kon gi mi, fu di un e begi gi mi èn a Yeye fu Yesus Kristus e yepi mi. 20Mi e howpu èn mi e ferwakti nanga mi heri ati tak' mi no sa kon na syen fu no wan sani. Ma tak' mi sa abi a dek'ati now leki fa mi ben abi en kba, fu libi sowan fasi taki Kristus sa kisi bigi nen, awinsi mi dede noso mi tan na libi. 21Bika efu mi e libi, mi e libi gi Kristus. Èn efu mi dede, dan dati moro bun baka. 22Efu mi tan na libi, dan mi kan du furu sani ete di abi warti. Ma mi no sabi sortu wan fu den tu mi mus teki. 23Mi wani teki ala tu. Na a wan sei mi wani go yanda fu go tan nanga Kristus, bika dati moro bun. 24Ma na a tra sei a moro betre gi unu efu mi tan na libi. 25Èn fu di mi sabi taki na so a de, mi sabi taki mi o tan na libi. Mi o tan nanga un alamala fu un kan gro èn fu un kan prisiri ini a bribi. 26Dan te mi drai kon baka na unu, un o abi ete wan sani fu meki bigi ini Kristus Yesus fu mi ede.

Un mus hori doro

27Wan sani nomo mi e begi unu: Un mus libi wan libi di fiti a leri fu a bun nyunsu fu Kristus. Dan te mi kon mi sa si, noso efu mi no kon mi sa yere taki un de wan ini un prakseri, èn tak' leki wan man un e strei makandra gi a bribi ini a bun nyunsu. 28Ini a strei un no mus frede kwet'kweti gi den sma di e feti unu, bika dati e sori den krin tak' den e go lasi. Ma gi unu a de wan marki tak' Gado o ferlusu unu. 29Bika Gado gi unu a okasi, fu un no bribi wawan na ini Kristus, ma fu un nyan pina tu fu En ede. 30Mi nanga unu e strei a srefi strei. Un ben si fa mi ben strei fosi, èn now un e yere taki mi e strei a strei ete.

1:30
Bosk 16:19-40

2

Wi mus abi a srefi fasi leki Kristus

21Efu a de so taki Kristus e gi un dek'ati, efu a de so taki a lobi fu En e trowstu unu èn taki un de wan nanga makandra ini a Yeye, efu a de so taki un e firi gi makandra èn taki un e sori sari-ati na makandra, 2dan un mus abi a srefi prakseri èn un mus sori makandra a srefi lobi. Un mus de wan na ini un denki, èn un mus agri ini san un wani. Bika dati o meki mi prisiri srefsrefi. 3Un no mus denki unsrefi wawan, noso suku fu kisi grani fu sma. Ma nanga ala sakafasi, a wan mus si a trawan moro prenspari leki ensrefi. 4No wan fu unu mus luku soso san bun gi ensrefi, ma ibriwan fu unu mus luku tu san bun gi trawan. 5Un mus abi a srefi fasi di Kristus Yesus ben abi. 6Aladi A ben de leki fa Gado de, A no ben tan hori nomo taki En nanga Gado na a srefi. 7Ma A poti a fasi fa A ben de na wan sei. A kon de leki fa wan futuboi de, A tron wan libisma. 8Èn leki libisma A saka Ensrefi. A du san Gado wani te leki A dede srefi: Iya, a dede na a kroisi. 9Dat'ede Gado gi En a moro hei presi di de èn A gi En a nen di bigi moro ala tra nen, 10fu meki taki ala libisani na ini heimel, na grontapu èn na ondro gron, sa saka kindi gi a nen fu Yesus.

2:10-11
Yes 45:23
11Dan Gado a P'pa sa kisi grani te ala sma sa taki: “Yesus Kristus na Masra.”

Fa wan bribisma mus hori ensrefi na mindri trawan

12So mi lobiwan, soleki fa un ben gi yesi ala ten di mi ben de nanga unu, un mus du dati moro ete now di mi no de na unu. Gado ferlusu unu, èn nanga bigi lespeki nanga sakafasi un mus sorgu taki a sani disi de fu si ini un libi.2:12 Ini Grikitongo a skrifi taki: un mus wroko na a ferlusu fu unu nanga bigi lespeki èn nanga sakafasi. 13Bika na Gado e wroko na ini unu. Èn na En e gi unu a wani nanga a krakti fu du den sani san e gi En prisiri. 14Un mus du ala sani sondro fu knoru noso fu hari taki. 15Na so un o de sondro fowtu èn sondro flaka. Un o de pikin fu Gado tapu san sma no o man sori finga. Un o brenki leki den stari fu heimel na mindri den sma di kruktu èn di abi wan takru ati.

2:15
Deu 32:5
16Un mus tan hori unsrefi na a boskopu san e gi libi. Dan tapu a dei fu Kristus, mi srefi sa man meki bigi taki a muiti nanga a wroko fu mi no ben de fu soso. 17A bribi fu unu de leki wan ofrandi, wan sani nanga san un e dini Masra. Awinsi mi mus gi mi brudu leki wan pisi fu a ofrandi dati, mi breiti èn mi e prisiri makandra nanga un alamala. 18Unu mus breiti tu, èn un mus prisiri makandra nanga mi.

Timoteus nanga Epafroditus

19Efu Masra Yesus wani, mi o seni Timoteus her'esi kon na unu. Dan mi ati sa sidon te mi yere fa a e go nanga unu. 20Bika mi no abi no wan tra sma di abi den srefi prakseri leki mi, di wani sorgu nanga en heri ati taki sani e waka bun nanga unu. 21Bika ala den tra sma e suku den eigi bun. Den no e broko den ede nanga den sani fu Yesus Kristus. 22Ma un srefi sabi taki Timoteus sori taki a de fu fertrow. Bika leki fa wan pikin e yepi en p'pa, na so a ben yepi mi fu panya a bun nyunsu. 23Dat' meki mi e howpu fu seni en kon wantewante na unu, so esi leki mi sabi fa sani o waka gi mi. 24Ma mi e fertrow tapu Masra taki mi srefi sa kon her'esi na unu.

25Ma mi e feni en fanowdu fu seni brada Epafroditus kon baka na unu. Mi nanga en ben wroko èn strei makandra. Un ben seni en kon fu yepi mi nanga san mi ben abi fanowdu. 26Bika ensrefi e angri fu si unu. A e broko en ede, bika un ben kisi fu yere taki a ben siki. 27A tru taki a ben siki, te fu dede srefi. Ma Gado sari en. A no ben sari en wawan, A ben sari mi tu, fu mi no kisi moro sari leki san mi abi kba. 28Fu dat'ede mi e seni en gawgaw kon na unu, fu un sa prisiri baka te un si en, èn dan mi srefi no sa abi someni sari moro. 29So, un mus teki en na un mindri nanga bigi prisiri, soleki fa bribisma di de wan nanga Masra e du. Un mus lespeki den sortu sma disi. 30Bika fu di a e wroko gi Kristus meki a doro te na grebimofo. A no ben frede fu lasi en libi srefi, nomo fu yepi mi pe unu no ben man.

3

A wan enkri sani san e teri

31Moro fara, mi brada nanga sisa, un mus prisiri na ini Masra. A no e ferferi mi fu skrifi unu den srefi sani san mi ben skrifi kba, bika a e yepi un fu no meki fowtu. 2Un mus luku bun nanga den dagu! Un mus luku bun nanga den sma disi di e du soso ogri! Un mus luku bun nanga den sma di e taki tak' yu mus koti yusrefi. 3Bika na wi abi a trutru kotimarki fu a bribi, wi di e dini Gado nanga a yepi fu a Yeye fu Gado. Wi e meki bigi tapu san Kristus Yesus du, èn wi no e poti wi fertrow na tapu san libisma e du. 4Ma efu mi ben wani, mi ben sa man poti mi fertrow tu tapu suma mi de. Efu wan sma e prakseri taki a kan fertrow tapu suma a de, dan mi ben o man du dati moro ete. 5Mi ben besnei di mi ben abi aiti dei. Mi na wan sma fu Israel, fu a lo fu Benyamin. Mi na wan trutru Hebrewsma. Leki wan trutru Fariseiman, mi ben e hori a wèt finifini.

3:5 a
Rom 11:1
6Mi ben faya sote gi a Dyubribi taki mi ben de baka den sma fu a gemeente fu du den ogri. Sondro fu meki fowtu mi ben du ala sani san a wèt e taki un mus du fu un kon bun ini Gado ai.
3:6
Bosk 8:3
22:4
26:9-11
7Ma ala den sani disi di ben e tyari wini gi mi, mi kon si leki noti fu san Kristus du gi mi. 8Fu tru mi e si ala sani leki noti, bika gi mi a moro prenspari sani na fu sabi Kristus Yesus mi Masra. Fu En ede mi poti ala den sani disi na wan sei, èn mi e si den leki sani di no abi warti kwet'kweti, nomo fu mi kan abi Kristus 9èn fu mi kan de wan nanga En. A no fu di mi ben e hori a wèt, ma fu di mi e bribi ini Kristus, meki mi kon bun ini Gado ai. Na Gado meki mi kon bun nanga En fu di mi e bribi. 10Ala san mi wani na fu kon sabi Kristus dorodoro nanga a krakti di ben meki A opo baka na dede. Mi wani fu teki prati ini a pina di A ben mus pina, nanga a dede di A ben mus dede. 11Dan so mi srefi sa man opo baka na dede neleki En.

Wi mus du ala muiti fu doro a marki

12Mi no e taki tak' mi de kba leki fa mi mus de, noso tak' mi de sondro fowtu. Ma mi e du ala muiti fu doro pe mi mus doro, bika na fu dati Kristus Yesus teki mi gi Ensrefi. 13Brada nanga sisa, mi fu mi sei no e waka nanga a prakseri taki mi doro kba. Ma wan sani nomo mi e du: Mi no e prakseri den sani moro san de na mi baka, ma mi e meki ala muiti fu kisi san de na mi fesi. 14Mi e meki ala muiti fu doro na a marki, fu mi kan kisi a paiman na heimel san Gado kari wi fu kisi ini Kristus Yesus. 15Wi alamala di gro kba ini a bribi, mus abi a srefi prakseri disi. Ma efu sonwan fu unu e prakseri tra fasi, dan Gado srefi sa opo un ai. 16Ma wi alamala mus hori san wi kisi, èn wi mus tan waka a pasi dati.

17Brada nanga sisa, un alamala mus libi soleki fa mi e libi, èn un mus leri fu den sma di e gi unu a srefi eksempre san wi ben gi unu.

3:17
1Kor 4:16
11:1
18Bika furu sma de di e libi leki feyanti fu san a kroisi fu Kristus wani taki. Mi ben taigi un disi furu leisi kba, èn now mi e taki en baka nanga watra-ai. 19Te fu kba den o go lasi. Den bere na den gado. Den e si den syen sani san den e du leki wan grani, èn den e prakseri soso grontapu sani. 20Ma wi dati, wi kondre de na heimel. Fu drape wi e ferwakti Masra Yesus Kristus fu drai kon baka leki wi Ferlusuman. 21Nanga a krakti di e meki A kan poti ala sani na En ondro, A o kenki a swaki skin fu wi, meki a kon neleki a moi brenki skin fu En.