Sranan Tongo Bible 2016 (STB16)
11

111Wan wegi di no soifri na wan groskin sani gi MASRA,

ma wan soifri wegi e gi En prisiri.

2Wan heimemre sma e kisi syen es'esi,

ma wan sma nanga sakafasi na wan koni sma.

3Den sma di e libi leki fa a fiti e meki bunfasi tyari den waka,

ma a bedrigifasi fu den sma di no e waka na Gado baka, o kiri den.

4Tapu a dei di Gado o strafu libisma, gudu no o yepi no wan sma,

ma fu du a wani fu Gado e kibri yu gi dede.

5Fu du a wani fu Gado e opo pasi gi a sma di e libi krin,

ma a ogri di ogri-ati sma e du e meki den broko den neki.

6Fu du a wani fu Gado e kibri den sma

di e libi leki fa a fiti,

ma den sma di no e waka na Gado baka,

e fasi ini den takru lostu fu den.

7A dede fu wan ogri-ati sma e tyari wan kba tu

na a howpu di a ben abi.

A gudu fu en no man du noti gi en.11:7 Un kan puru a pisi disi so tu: A ferwakti fu den takru-ati sma e kon na wan kba.

8Gado e ferlusu a sma di bun ini En ai na ini benawtu,

dan A e meki a benawtu dati miti a ogri-ati sma.

9Wan sma di no e dini Gado

e poti wan trawan nanga en mofo

na ini bigi problema,

ma a koni fu den sma di bun ini Gado ai

e kibri den.

10Den sma fu wan foto e breiti

te a e go bun nanga sma di bun ini Gado ai,

ma te ogri-ati sma e dede,

prisiri e de fu yere alasei.

11A blesi fu den sma di e libi leki fa a fiti

e tyari wan foto go na fesi,

ma den sani di ogri-ati sma e taki

e broko en.

12A sma di e si wan trawan leki noti, na wan sma sondro ferstan,

ma wan sma nanga ferstan e tan tiri.

13Wan sma di e waka taki sani, no man hori kibritori gi ensrefi,

ma wan sma di de fu fertrow, e hori en gi ensrefi.

14Efu wan folku no sabi sortu pasi den mus teki, den o dede gwe,

ma wan foto e gro te furu raiman de.

15Wan sma di tnapu dyaranti gi wan sma di a no sabi, o broko en neki,

ma a sma di no meki pramisi, no abi noti fu frede.

16Wan moi uma e kisi lespeki,

ma na krakti e gi wan man gudu.

17Wan bun sma e du ensrefi bun,

ma wan sma di no sabi san na sari-ati, e du ensrefi ogri nanga dati.

18A moni di ogri-ati sma e meki, no de san den ben prakseri,

ma a pai fu wan sma di bun ini Gado ai, na wan trutru pai.

19A sma di e du a wani fu Gado sa libi langa,

ma a sma di e waka e du ogri, o dede.

20Wan sma nanga wan kruktu ati na wan groskin sani gi MASRA,

ma den sma di e libi leki fa a fiti, e gi En prisiri.

21Soleki fa a no abi misi taki sma di e du ogri o kisi den strafu,

na so a no abi misi taki Gado sa ferlusu den sma di bun ini En ai.

22Wan moi uma sondro ferstan,

de leki wan gowtu linga na a noso fu wan agu.

23Den sani di sma di bun ini Gado ai e angri, e tyari soso bun,

den sani di ogri-ati sma wani, e wiki a atibron fu Gado.

24Wan sma di e gi,

e kisi moro nanga moro,

tra sma e pina moro nanga moro,

aladi den e hori sani na baka di den ben mus gi.

25Sma di e du bun, sa feni bun,

sma di e gi trawan fu dringi, o kisi fu dringi tu.

26A pipel e fluku a sma di e kibri en karu, fu seri en moro diri,

ma blesi e kon tapu a wan di e seri en.

27Gado e prisiri nanga a sma di e meki muiti fu du bun,

ma ogri e miti a sma di lobi du ogri.

28Wan sma di e fertrow na tapu en gudu, de leki drei wiwiri di e fadon,

ma den sma di bun ini Gado ai o gro kon leki yongu pransun.

29A sma di lobi meki trobi ini a famiri, o kisi noti te a gudu o prati,

wan don sma o de srafu fu wan koni sma.

30A fasi fa wan sma e libi di bun ini Gado ai, e gi langa libi,

èn wan koni sma e wini a ati fu trawan.

31Wan sma di bun ini Gado ai e kisi en pai dyaso na grontapu,

na so a ogri-ati sma nanga den sondusma o kisi di fu den tu.

12

121A sma di lobi te wan trawan e sori en fa a mus libi,

na wan sma di lobi sabi,

ma a sma di no lobi srefsrefi te wan trawan e warskow en,

na wan don sma.

2MASRA e sori En bunfasi na a sma di e libi bun,

ma A e krutu a sma di e waka nanga takru prakseri.

3Ogridu no e hori no wan sma tnapu,

ma a sma di bun ini Gado ai de leki wan bon di beri en rutu dipi.

4Wan dyadya uma e meki en masra kisi bigi grani,

ma wan uma di e gi en masra syen,

de leki wan takru siki di e nyan en fu inisei.

5Sma di bun ini Gado ai no e waka nanga takru prakseri,

ma ogri-ati sma e prakseri soso fu bedrigi sma.

6Den wortu fu ogri-ati sma e meki brudu lon,

ma den sani di wan sma di e libi leki fa a fiti e taki,

e ferlusu sma.

7Ogri-ati sma e dede gwe

èn den no de fu si moro,

ma a oso fu den sma di bun ini Gado ai

sa tan tnapu.

8O moro wan sma srapu,

o moro grani a e kisi,

ma den sma di e denki kruktu

tra sma e si fu noti.

9A moro betre yu no de na teri ma yu abi wan knekti,

dan fu prei bigi ma yu no abi nyanyan.

10Wan sma di bun ini Gado ai e sorgu bun gi den meti fu en,

ma ogri-ati sma no sabi san na sari-ati.

11Wan sma di e wroko en pranigron sa abi furu nyanyan,

ma wan sma di e lon baka sani di no abi warti,

na wan sma di no abi ferstan.

12Wan ogri-ati sma e angri fu kisi gudu tapu wan kruktu fasi,

ma a rutu fu den sma di bun ini Gado ai, e gi bun froktu.12:12 A Hebrewtekst fu a pisi disi no krin.

13Wan takru sma e fasi ensrefi nanga en eigi lei,

ma wan sma di bun ini Gado ai e kmopo ini benawtu.

14Na den sani di wan sma e taki kan meki taki a abi en bun.

Den bun sani di wan sma du, e drai kon baka na en.

15Wan don sma e prakseri ala ten taki a abi leti,

ma wan koni sma e teki rai.

16Wan don sma e sori wantron taki en ati e bron,

ma wan sma di koni e hori en mofo te wan trawan afrontu en.

17Wan sma di de fertrow e meki a tru kon na doro,

ma wan sma di no de fu fertrow e lei.

18Den sani di wan sma e taki kan hati wan trawan

leki te wan nefi sutu en,

ma sani di a mofo fu wan koni sma e taki,

e dresi.

19A tru e tan fu têgo,

ma wan lei no abi langa libi.

20A ati fu wan sma di e prakseri ogri, furu nanga bedrigi fasi,

ma den sma di e suku fu tyari freide, abi prisiri.

21No wan ogri sa miti a sma di bun ini Gado ai,

ma soso problema e miti wan ogri-ati sma.

22Sma di e lei de leki wan groskin sani gi MASRA,

ma sma di de fu fertrow, e gi En prisiri.

23Wan sma di koni no e meki ala sma sabi fa a koni,

ma wan sma di don e meki ala sabi fa a don.

24Sma di e wroko tranga e kisi makti,

sma di lesi e tron srafu.

25Sorgu e hebi a ati fu wan sma,

ma wan bun wortu e gi en prisiri.

26A e go moro bun nanga a sma di bun ini Gado ai, dan ibri tra sma,

ma a ogri-ati sma e teki wan pasi di e tyari en go lasi.12:26 A Hebrewtekst fu a pisi disi no krin.

27Wan ontiman di lesi no o man fanga noti,

ma wan sma di e wroko tranga e feni furu gudu.12:27 A Hebrewtekst fu a pisi disi no krin.

28A sma di e du a wani fu Gado o libi langa,

na wan grati pasi pe dede no de.12:28 A Hebrewtekst fu a pisi disi no krin.

13

131Wan manpikin di koni e arki te en p'pa e leri en fa a mus libi,

ma wan sma di e meki spotu no e arki warskow.

2Na den sani di wan sma e taki kan meki taki a abi en bun.

ma den sma di no e waka na Gado baka, e angri fu du trawan ogri.

3A sma di e denki bun fosi a taki, no sa lasi en libi es'esi,

ma a sma di abi wan tak'taki mofo, e suku problema gi ensrefi.

4Na fu soso wan lesiman e angri fu abi sani,

ma wan sma di e wroko tranga e abi furu.

5A sma di bun ini Gado ai no lobi lei srefsrefi,

ma wan ogri-ati sma e meki taki sma no lobi en srefsrefi

èn a e kisi syen.

6Fu du a wani fu Gado e kibri a sma tapu san trawan no man sori finga,

ma sondu e meki ogri-ati sma lasi den libi.

7Son sma e meki leki den gudu, ma den no abi noti,

tra sma e meki leki den pôti ma den gudu psa marki.

8A gudu fu wan guduman kan meki a pai fu sma no kiri en,

ma wan pôtisma no e kisi fu yere taki den wan kiri en.

9Sma di bun ini Gado ai de leki wan krin faya,

ma a faya fu a lampu fu wan ogri-ati sma e dede gwe.

10Sma di denki taki den sabi en moro betre e meki soso trobi,

ma koni sma e teki rai.

11Gudu di yu kisi sondro fu wroko fu en e kba es'esi,

ma a sma di e wroko fu kan abi, e kon gudu.

12Wan sma di e howpu langa fu wan sani e siki,

ma te a kisi san a ben wani a e kisi libi baka.

13A sma di e poti bun rai na wan sei, sa firi a bakapisi fu en,

ma a sma di e sori lespeki te a kisi rai, o kisi pai fu dati.

14A leri fu wan koni sma na wan bron fu libi,

den e puru yu ini den sani di dede ben seti fu fanga yu.

15Nanga prisiri sma e yepi wan sma nanga ferstan,

ma a libi tranga gi wan sma di no e waka baka Gado.

16Ala koni sma e denki bun fosi den du wan sani,

ma wan don sma e meki ala sma si fa a don.

17Wan boskopuman di no de fu fertrow e tyari dyugudyugu,

ma wan boskopuman di de fu fertrow e tyari yepi.

18Pina nanga syen e wakti wan sma di no wan leri fa a mus libi,

ma a sma di e arki te trawan e warskow en, e kisi grani.

19A switi te yu kisi wan sani fu san yu ben e angri,

ma a de wan bigi ogri gi don sma fu no du ogri.

20A sma di e waka nanga koni sma, e kon koni,

ma a sma di e waka nanga don sma, o broko en neki.

21Ogri e tan waka baka sondusma,

ma soso bun e miti den sma di bun ini Gado ai.

22Bun sma e libi gudu gi den pikin

nanga gi den granpikin fu den na baka,

ma a gudu fu den sondusma

na gi den sma di bun ini Gado ai.

23Te wan pôtiman drai a pranigron fu en

a kan gi furu nyanyan,

ma kruktudu e meki a lasi ala sani baka.

24A sma di no e fon en pikin, no lobi en pikin,

ma a sma di lobi en pikin e bigin sori en frukufruku fa a mus libi.

25A sma di bun ini Gado ai e nyan te a sari en,

ma a bere fu a ogri-ati sma e tan leigi.