Sranan Tongo Bible 2016 (STB16)
22

221Fu abi wan bun nen betre moro furu gudu,

fu sma lespeki yu betre moro solfru nanga gowtu.

2Gudusma nanga pôtisma abi wan sani makandra,

na MASRA meki den ala tu.

3Wan koni sma e si a ogri di e kon, èn a e go kibri,

wan sma di no e denki, e waka go miti en,

èn a e tesi a bakapisi fu en.

4Gudu, grani nanga langa libi,

na a pai fu abi sakafasi nanga lespeki gi MASRA.

5A sma di e libi wan kruktu fasi,

e miti soso makamaka tapu en pasi,

nanga sani di sma poti fu fanga en.

A sma di lobi en libi e tan fara fu den.

6Leri wan pikin yonguyongu fa a mus libi,

dan a o tan libi so, srefi te a kon owru.

7Wan guduman abi makti abra den pôtiwan,

èn wan sma di e leni fu wan trawan,

e tron a srafu fu a wan di leni en.

8A sma di e du kruktudu, o miti nanga bigi ogri,

a tiki nanga san a e naki, o broko.

9Wan bun-ati sma e kisi blesi,

bika a e prati en nyanyan nanga pôtisma.

10Yagi a sma gwe di e meki spotu nanga trawan,

èn a trobi e tapu,

hari taki nanga broko trawan saka,

e tapu wantron.

11A sma di lobi wan soifri ati,

èn di e taki switi,

e abi kownu leki en mati.

12MASRA e sorgu taki a tru no e lasi gwe,

èn A e tyari den lei fu a bedrigiman kon na krin.

13a lesiman e taki: “Wan lew de na dorosei,

efu mi go na strati a o priti mi!”

14A mofo fu wan uma fu wan tra man,

de leki wan dipi peti,

MASRA e meki a man tapu san En ati e bron,

fadon na ini.

15Efu wan pikin e du soso don sani,

a fonfontiki sa puru en gi en.

16A sma di e pina wan pôtisma,

e meki a kon moro gudu,

a sma di e gi wan guduman kado,

e meki a kon pina.22:16 A Hebrewtekst fu a pisi disi no krin.

Wortu fu koni sma

17Kaka yu yesi èn arki den wortu fu koni sma,

poti yu prakseri tapu a sabi fu mi.

18Bika a o gi yu prisiri efu yu hori den na prakseri,

èn efu yu man taki den baka.

19Mi e leri yu den tide, iya yu,

fu di mi wani tak' yu mus fertrow tapu MASRA.

20Dritenti leri mi skrifi poti gi yu,

di furu nanga sabi èn nanga bun rai,

21fu meki yu kan sabi san tru,

èn fu yu man piki tru sani na den wan di seni yu.

22No puru wan sani nanga tranga na a anu fu wan pôtisma,

fu di en na wan pôtisma,

èn no broko a mofinawan saka te a de na fesi krutu.

23Bika MASRA sa feti gi den leti fu en

èn A sa teki a libi fu den sma,

di teki sani puru na den pôtiwan anu.

24No tron mati nanga wan sma di e kisi atibron es'esi,

no teki waka nanga wan man di ati e teki faya gawgaw.

25noso yu o kon tan leki en,

èn poti yusrefi ini bigi problema.

26No de wan fu den sma di e seki anu es'esi leki wan pramisi,

èn di e tnapu dyaranti gi wan paiman fu wan tra sma.

27Efu yu no man pai a moni baka,

den o tyari a bedi srefi gwe tapu san yu e didon.

28No dribi den stonpostu di e sori o bigi wan dyari de,

na den afo fu yu ben poti den drape olanga kba.

29Wan man di e du en wroko fin'fini

sa wroko gi kownu,

so wan man no e wroko gi sma di no abi bigi nen.

23

231Efu yu sidon nanga wan prenspari sma na tafra,

yu no mus fergiti suma sidon na yu fesi.

2Hori yusrefi,

efu yu na wan sma di e nyan furu.

3No gridi gi den switi nyanyan fu en,

na kori a e kori yu nanga den.

4No naki yu skin fu kon gudu,

poti a prakseri dati na wan sei.

5Bika na luku yu e luku en wawan,

èn a no de fu si moro.

A gersi leki na frei a kisi

èn frei leki wan aka go na loktu.

6No go sidon nyan makandra nanga wan gridiman,

no meki gridi gi a switi nyanyan fu en.

7Bika so wan sma e sidon teri ala sani san yu e nyan.23:7 A Hebrewtekst fu a pisi disi no krin.

A e taki: “Yu kan nyan, yu kan dringi,”

ma a no e kmopo ini en ati.

8Ala san yu nyan, yu o puru kon na doro baka,

èn ala den switi wortu fu yu o de fu soso.

9No lasi yu ten fu taki nanga wan don sma,

bika a o hari en noso gi den bun sani di yu o taigi en.

10No dribi den stonpostu di e sori o bigi wan dyari de,

den postu di drape olanga kba,

èn no puru a pranigron na a anu fu pikin,

di no abi p'pa nanga m'ma moro.

11Bika a Wan di o strei gi den, tranga,

na En o feti gi den leti fu den.

12Arki te sma e warskow yu,

èn kaka yu yesi fu leri sabi.

13No frede fu leri yu pikin fa a mus libi,

awinsi yu fon en nanga tiki,

a no o dede fu en.

14Yu e fon en nanga wan tiki,

ma na kibri yu e kibri en fu a no dede.

15Mi boi, efu yu e denki koni,

mi sa prisiri srefsrefi.

16Mi sa furu nanga prisiri,

te mi e yere yu e taki bun sani.

17No dyarusu tapu sondusma,

ma tan lespeki MASRA ala dei fu yu libi.

18Dan trutru sani sa go bun ini a ten di didon na yu fesi,

èn yu howpu no sa de fu soso.

19Arki mi, mi boi, èn kon koni,

teki a besroiti fu waka tapu a yoisti pasi.

20No teki waka nanga sma di e dringi tumsi furu win,

nanga sma di lobi nyan fu gridi.

21Bika wan sma di e dringi tumsi,

nanga wan sma di e nyan fu gridi,

o pina,

èn efu yu e sribi heri dei,

yu o abi soso owru krosi na yu skin.

22Arki yu p'pa di meki yu,

èn no si yu m'ma leki noti te a kon owru.

23Meki ala muiti fu kon sabi san na tru

èn tan hori en,

meki muiti tu fu kon koni,

fu abi ferstan,

èn arki te trawan e warskow yu.

24Wan pikin di e du san bun ini Gado ai,

e gi en p'pa bigi prisiri,

wan p'pa di meki wan koni pikin,

e breiti trutru nanga en.

25Meki yu p'pa nanga yu m'ma breiti nanga yu,

meki a mama di meki yu prisiri nanga yu.

26Mi boi, poti yu prakseri tranga na mi tapu,

èn teki wan eksempre na a libi fu mi.

27Bika wan motyo de leki wan dipi olo,

wan uma di e yayo leki wan smara peti.

28A e didon luru leki wan fufuruman,

èn a e meki taki moro nanga moro sma no e tan waka baka Gado.

29Suma e soktu èn dyeme ala ten?

Suma e kragi èn meki trobi ala ten?

Suma e gi ensrefi mankeri fu soso?

Suma ai noiti no krin?

30Na den sma di e sidon te lati e dringi win,

den sma di lobi tesi nyun sopi.

31No meki win kori yu fu dringi en,

awinsi fa a redi kloru fu en moi ini a grasi,

awinsi fa a e brenki so moi,

awinsi fa e grati makriki go ini yu bere.

32Ma te fu kba a e beti leki wan sneki,

leki a beti fu wan takru sneki.

33Dan yu o si sani di no tru,

èn yu o taki lawlaw sani nanga yu mofo.

34Yu e firi leki yu didon na mindri fu a se,

leki yu de ini a moro hei pisi fu wan sipi.

35Dan yu o taki:

“Den naki mi, ma mi no ben sabi srefi,

den gi mi wan steifi fonfon, ma mi no ben firi noti.

Ma te mi wiki mi o go suku wan dringi baka.”

24

241No dyarusu tapu sma di e du ogri,

no angri fu tron mati nanga den.

2Bika soso ogri de ini den prakseri,

den e taki fa den o go poti tra sma na ini problema.

3Nanga koni sma e bow wan oso,

nanga ferstan den e poti en tnapu.

4Na sabi e meki kamra e furu

nanga ala sortu moi èn diri sani.

5Wan man di koni na wan tranga man,

èn wan man nanga sabi e kon moro tranga.

6Bika fosi yu go feti wan bigi feti,

yu mus prakseri bun fosi,

a wini didon na den furu raiman di yu abi.

7Koni hei tumsi fu wan don sma ferstan en,

a no o man opo en mofo na den doro fu a foto,

te prenspari sani e taki.

8A sma di e prakseri soso fu du ogri,

den e kari wan abani.

9Den sani di wan don sma e prakseri na sondu,

èn a sma di e teki trawan meki spotu,

na wan groskin sani gi libisma.

10Efu yu lasi ati te yu de na ini problema,

dan yu na wan sma di no abi furu krakti.

11Yepi den sma di den wani seni go kiri fu soso,

du ala san yu man du fu yepi den.

12No taki: “Mi no ben sabi.”

Bika a Wan di e ondrosuku den ati, sabi,

a Wan di e luku yu, e si,

èn A e pai libisma fu den sani di den e du.

13Yu kan nyan oni, mi boi, bika a bun gi yu,

oni di dropu fu a godo, switi tapu yu tongo.

14Na so koni de tu gi yu libi.

Efu yu feni en, dan sani sa go bun

ini a ten di didon na yu fesi,

èn yu howpu no sa de fu soso.

15Un ogri-ati sma,

un no go didon luru na a oso fu sma di bun ini Gado ai,

no go broko a tanpresi fu en.

16Bika awinsi omeni leisi sani e miti wan sma di bun ini Gado ai,

a o opo baka,

ma te sani miti wan ogri-ati sma,

a no e opo moro.

17No prisiri te sani e miti yu feyanti,

no breiti te a e fadon.

18Bika MASRA no o feni en wan bun sani te a si dati,

èn dati bo kowru a atibron fu En di A ben abi tapu yu feyanti.

19No meki yu atibron tapu ogri-ati sma,

èn no dyarusu na den tapu.

20Bika sani no o go den bun

ini a ten di didon na den fesi,

den ogri-ati sma de leki a faya fu wan lampu

di e dede gwe.

21Mi boi, abi lespeki gi MASRA nanga gi kownu,

èn no moksi nanga sma di no wani saka densrefi gi den.

22Bika wantronso a ongoloku kan miti den,

èn no wan sma no sabi fa a ongoloku dati kan bigi.

Moro leri

23Na koni sma taki den sani disi tu:

Te wan krutubakra e koti krutu

a no kan teki a sei fu wan fu den sma.

24Ala sma sa fluku en,

ala folku sa taki na en tapu,

efu a taigi a sma di fiti fu kisi strafu taki: “Yu no du noti.”

25Ma a sa go bun nanga den wan di e koti krutu tapu wan leti fasi,

wan blesi sa de na den tapu,

èn den sa abi en bun.

26Wan tru piki, de leki wan bosi tapu yu mofo.

27Wroko yu pranigron fosi,

prani sani na tapu,

dan baka dati yu kan go bow yu oso.

28No lei fu soso gi wan trawan na fesi krutubakra,

no lei gi en.

29No taki: “Mi o du nanga en baka, leki fa a ben du nanga mi.

Mi o pai en fu den sani di a du.”

30Mi waka psa a pranigron fu wan lesiman,

a droifidyari fu wan sma di no abi ferstan.

31A ben gro tapu nanga grasi nanga makamaka,

èn a ston skotu ben broko fadon.

32Di mi si dati, mi prakseri bun san mi si,

di mi luku, mi teki leri fu en.

33Sribi pikinso fu yu ete,

dyonko pikinso ete,

didon fow yu anu fu yu tapu yu borsu.

34Dan pina o teki yu es'esi,

mofinafasi o kon na yu tapu,

leki wan fufuruman nanga en fetisani ini en anu.