Sranan Tongo Bible 2016 (STB16)
25

Moro leri fu Salomo

251Disi na leri fu Salomo di den skrifiman fu kownu Hiskia fu Yuda, ben tyari kon na wan.

2Gado e kisi grani fu di A no e meki un si ala sani,

kownu e kisi grani fu di den e tyari sani kon na krin.

3Leki fa sma no man ferstan o hei heimel de,

noso o dipi grontapu de,

na so sma no man ferstan den prakseri fu wan kownu.

4Puru ala doti ini a solfru,

dan a solfrusmeti kan meki wan sani fu en.

5Puru den ogri-ati sma di de nanga a kownu,

dan a sa tan tapu en kownusturu

èn du a wani fu Gado.

6No opo yusrefi te yu de na kownu,

no go tnapu pe den prenspari sma mus tnapu.

7Bika a moro betre sma taigi yu taki:

“Kon, kon sidon moro na fes'sei,”

dan dati den taigi yu taki yu mus meki presi gi wan prenspari man.

8No lon tyari wan sma go na krutu-oso es'esi,

efu yu no sabi trutru taki a du wan sani,

bika efu wan tra ketoigi sori bakaten taki a no tru san yu si,

dan na syen yu o kisi.

9Efu yu nanga wan sma abi trobi,

un meki muiti fu unsrefi seti en,

èn no puru wan trawan bere kon na doro.

10Bika efu yu du dati, sma o yere,

den o gi yu syen,

èn yu o tan abi wan takru nen.

11Den yoisti wortu tapu a yoisti ten,

de leki gowtu apra tapu solfru skarki.

12Wan koni man di e gi warskow na wan yesi di e arki,

de leki wan gowtu linga nanga wan keti fu fini gowtu.

13Wan boskopuman di de fu fertrow, de gi en basi,

leki wan grasi kowru watra gi wan sma,

di e koti nyanyan ini en pranigron.

A e gi nyun krakti baka.

14Wan sma di e pramisi sani nomo ma a no e du den,

de leki wolku nanga winti di no e tyari alen.

15Pasensi e safu a ati fu wan tiriman,

èn awinsi fa wan sma e taki tak' a no wani,

wan safri taki kan kenki dati.

16Efu yu feni oni,

no nyan moro leki san yu man,

bika efu yu nyan tumsi,

yu o puru en kon na doro baka.

17No go tumsi furu na a oso fu yu mati,

noso a o weri fu yu èn a no o wani si yu srefsrefi moro.

18Leki fa wan hebi tiki, wan deigri noso wan srapu peiri kan kiri yu,

na so a de tu nanga wan sma di e lei gi wan trawan na fesi krutu.

19Efu yu poti yu fertrow, te yu de ini problema,

tapu wan sma di no de fu fertrow,

a de a srefi leki te yu e nyan nanga pori tifi ini yu mofo,

noso te yu drai yu futu

ma yu e suku fu waka na en tapu.

20Efu yu e singi gi wan sma di e sari,

a de leki te yu puru en krosi tapu wan kowru dei,

èn neleki yu kanti asin tapu wan soro.

21Efu angri e kiri yu feyanti, gi en nyanyan,

efu watra e kiri en gi en fu a dringi.

22A o firi so wan syen taki a gersi leki na bron a e bron,

èn MASRA sa pai yu.

23Neleki fa kowru winti e tyari alen,

na so taki sma sani bakabaka e tyari atibron.

24A moro betre fu libi ini wan uku tapu a daki fu wan oso,

dan fu libi ini a srefi oso nanga wan uma di lobi meki trobi.

25Bun nyunsu fu wan fara kondre,

na leki kowru watra gi wan drei neki.

26Efu wan bun sma meki wan ogri-ati sma drai en ede

fu du sani di no bun,

dan a de leki wan peti di trubu,

noso wan tokotoko watrabron.

27Leki fa a no bun fu nyan tumsi furu oni,

na so a no bun tu fu suku grani gi yusrefi.25:27 A Hebrewtekst fu a pisi disi no krin.

28Wan sma di no man hori ensrefi,

de leki wan foto pe den naki ala den skotu broko.