Sranan Tongo Bible 2016 (STB16)
29

291A sma di no wani arki, awinsi fa den e warskow en,

e de fu dede wantronso,

sondro fu a kon betre baka.

2Te sma di bun ini Gado ai de na makti,

a pipel e prisiri,

ma te ogri-ati sma de na makti

a pipel e dyeme.

3Wan pikin di lobi koni,

e gi en p'pa prisiri,

ma a sma di lobi go na motyo,

e fermorsu a gudu fu en.

4Sani sa go bun ini wan kondre,

efu a kownu e du sani na tapu wan leti fasi,

ma a kondre o broko,

efu a abi wan tiriman di e puru moni na den sma anu.

5A sma di e kori trawan nanga switi wortu,

e seti wan sani gi en fu fanga en.

6Wan takru sma e fasi ensrefi ini den kruktudu fu en,

ma a sma di bun ini Gado ai sa singi èn prisiri.

7Wan sma di bun ini Gado ai e teri den leti fu pôtisma,

ma wan ogri-ati sma no sabi dati srefsrefi.

8Den sma di e spotu e tyari dyugudyugu ini a kondre,

ma koni sma e kowru atibron.

9Efu wan koniman nanga wan don man de na krutu,

a don man o rigeri noso a o lafu,

ma den no o feni densrefi.

10Kiriman no lobi den sma srefsrefi di e libi krin,

ma den sma di e libi leki fa a fiti,

e lespeki a libi fu den.29:10 A Hebrewtekst fu a pisi disi no krin.

11Wan don sma e kisi atibron sondro fu man hori ensrefi,

ma wan koni sma man hori ensrefi

èn a e meki a atibron saka.

12Efu wan tiriman e arki lei,

ala den wrokoman fu en o de ogri-ati sma.

13A pôtiman nanga a wan di e pina en abi wan sani makandra,

na MASRA gi den ala tu libi.

14Wan kownu di e krutu den pôtiwan tapu wan leti fasi,

sa tan kownu gi wan langa ten.

15Fonfon nanga warskow e meki wan pikin kon koni,

ma te den bigisma fu en libi en fu a gro kon leki fa a wani,

a o gi den syen bakaten.

16Te ogri-ati sma e rigeri,

ogri e kon moro furu,

ma nanga prisiri den sma di bun ini Gado ai e luku te den e fadon.

17Leri yu pikin fa a mus libi,

dan yu no sa abi broko ede nanga en,

èn a sa gi yu prisiri.

18Wan folku di no man si san de fu kon,

na wan folku di o libi bruya,

ma Gado e blesi a folku di e du san a wèt fu En e taki.

19Wortu wawan no sari fu sori wan knekti fa a mus libi,

bika a e ferstan san yu e taigi en,

ma a no e du en.

20Howpu de moro gi wan don sma,

dan gi wan sma di e taki sondro fu prakseri fosi a taki.

21A sma di bigin pori en knekti yonguyongu,

no o man tiri en bakaten.

22Wan sma di e kisi atibron es'esi e meki trobi esi tu,

wan sma di ati e teki faya es'esi e sondu furu.

23A heimemre fu wan sma o broko en saka,

ma wan sma di abi sakafasi o kisi grani.

24A sma di e prati fufuru sani nanga wan fufuruman,

no lobi ensrefi,

bika a no o man taki,

awinsi a sabi taki wan fluku o kon na en tapu efu a no taki.

25A sma di e frede tra libisma e fasi ensrefi,

ma noti no e miti a sma di poti en fertrow tapu MASRA.

26Furu sma e meki muiti fu wan tiriman kan lobi den,

ma na MASRA e gi wan sma san a fiti fu kisi.

27Wan takru-ati sma na wan groskin sani

gi sma di bun ini Gado ai,

èn wan sma di e libi leki fa a fiti na wan groskin sani

gi ogri-ati sma.