Sranan Tongo Bible 2016 (STB16)
8

Koni e taki nanga a pipel

81Koni e bari fu un arki en,

ferstan e opo en sten.

2A go tnapu tapu wan pikin bergi sei a pasi,

drape pe difrenti pasi e miti.

3A e tnapu sei den bigi doro fu a foto, pe sma mus kon ini a foto.

Te sma e kon ini a foto a e bari taki:

4“Libisma, na unu mi e kari,

nanga un alamala mi e taki!

5Un di no sabi furu, un leri fu un kon srapu,

don sma, un kisi ferstan.

6Un arki mi, bika mi o taki prenspari sani,

na bun sani o kmopo na ini mi mofo.

7Bika ala san mi e taki tru,

lei na wan groskin sani gi a mofo fu mi.

8Ala san mi e taki de fu fertrow,

mi no e draidrai noti,

èn noti no kruktu.

9Den krin gi a sma di koni,

èn den bun gi sma di abi furu sabi.

10Teki den warskow fu mi, den betre moro solfru,

èn fu suku sabi, betre moro lala gowtu.

11Bika koni warti moro parelkrara,

noti san yu e angri fu abi kan tnapu na en sei.”

12Mi na koni, na mi nanga srapufasi e waka,

èn mi kisi sabi fu di mi e sidon prakseri sani bun.

13Lespeki gi MASRA wani taki dati yu wani abi noti fu du nanga ogri.

Dat' meki mi no abi not'noti fu du nanga:

heimemre, bigifasi, takrudu nanga lei.

14Na mi yu e feni rai, na mi yu e leri teki yoisti besroiti,

na mi abi ferstan, na mi krakti de.

15Na mi e gi kownu makti,

na mi e meki tiriman meki bun wèt.

16Na Mi e meki edeman abi makti,

ala den heihei man di e tiri tapu wan leti fasi.

17Mi lobi ala sma di lobi mi,

den sma di e suku mi trutru o feni mi.

18Na mi gudu nanga grani de,

gudu di no e lasi gwe,

èn mi e meki sma kon bun ini Gado ai.

19San mi e gi yu warti moro gowtu,

iya, moro leki a moro fini gowtu.

San mi abi gi yu warti moro leki a moro bun solfru.

20Mi e du a wani fu Gado,

mi e du san bun.

21Mi e meki den sma di lobi mi kon gudu,

mi e furu a kamra pe den e poti den gudu fu den.

22MASRA meki mi fosi ala sani,

di A ben bigin meki sani, A meki mi fosi.

23A meki mi sensi na a bigin,

fosi wan sani ben meki,

fosi grontapu srefi ben meki.

24Di mi gebore, se no ben de ete,

no wan watrabron nanga watra ben de ete.

25Mi gebore di bergi no ben de na den presi ete,

di pikin bergi no ben de ete.

26A ten dati grontapu nanga den wei no ben meki ete,

sosrefi a doti fu grontapu.

27Di A ben e poti a heimel na en presi,

di A ben e poti pe a se nanga loktu ben o miti,

mi ben drape.

28Di A ben e fasi den wolku poti na loktu,

èn di A ben e meki a watra pusu kon na loktu di ben o furu den se,

29di A ben e poti o fara a se kan go,

èn komanderi a watra fu a no lon abra,

di A ben poti a fundamenti fu grontapu,

30mi ben de na En leki wan pikin di A e korikori,8:30 Un kan puru a pisi disi so tu: mi ben de na En leki wan sabiman fu a wroko.

ibri dei baka A ben e prisiri srefsrefi nanga mi,

èn misrefi ben e prisiri nanga En ala ten.

31Mi ben breiti nanga a grontapu fu En,

èn mi ben e prisiri nanga den libisma.

32We dan, un boi, dat' meki un mus arki mi,

bika den sma di e libi leki fa mi wani,

na blesi sma.

33Un arki den warskow fu mi,

fu un kan kon koni.

Un no si en leki noti.

34A sma di e arki mi na wan blesi sma,

a sma di e tnapu ala dei na mi oso,

èn di e wakti na mi doro.

35Bika a sma di feni mi, feni libi,

MASRA e sori en a bunfasi fu En.

36Ma a sma di e tan libi en sondu libi,

sowan sma e gi ensrefi mankeri.

Ala sma di no lobi mi, lobi den dede.