Sranan Tongo Bible 2016 (STB16)
104

Grani gi a Wan di meki grontapu

1041Mi sili, prijse MASRA!

MASRA, Gado fu mi, Yu bigi fu tru.

A grani nanga glori de leki wan krosi na Yu skin.

2Wan krin leti de leki wan dyakti lontu Yu,

Yu e hari a heimel span leki wan tenti.

3Yu e meki den kamra fu Yu na tapu den watra,

den wolku na Yu wagi,

Yu e koiri na tapu den frei fu a winti.

4Yu teki a winti leki Yu boskopuman,

a faya di e koti na loktu leki Yu wrokoman.

5Yu poti grontapu tnapu steifi,

fu a no seki noiti moro.

6Bigi watra ben tapu grontapu leki wan krosi,104:6 A Hebrewtekst fu a pisi disi no krin.

a watra ben hei psa den bergi.

7Ma di Yu bari en a saka,

a gwe es'esi di a yere Yu sten leki a dondru.

8Den bergi opo kon na loktu,

a watra saka go na den lagi presi,

a go na den presi di Yu ben poti gi en.

9Yu poti marki gi en ofara den kan go,

noiti moro a sa tapu grontapu baka.

10Yu e seni a watra go na den kriki,

mindri den bergi den e hari psa.

11Ala den busi meti e dringi fu en,

den werder buriki fu a sabana e nati den neki.

12Den fowru di e frei na a heimel e meki den nesi ini den bon sei den kriki,

na mindri fu den taki den singi fu den de fu yere.

13Fu den kamra fu Yu, Yu e nati den bergi,

so Yu e meki taki grontapu abi nofo watra.

14Yu e meki grasi gro gi meti fu den nyan,

nanga grun wiwiri di libisma kan prani.

So a kan feni nyanyan fu a gron,

15win di e gi prisiri,

oli di e meki a fesi brenki,

iya brede di e gi libisma krakti.

16Den bon fu MASRA kan dringi te a sari den,

den sedrebon fu a Libanonbergi di A prani,

17drape den fowru e meki den nesi,

drape den ooievaar e tan.

18Den hei bergi na fu den stonbokoboko,

den klipdas e teki den bergiston leki den kibripresi.

19Yu meki a munkenki fu poti den spesrutu ten,

a son dati sabi oten a mus saka.

20Yu e seni dungru kon fu neti fadon,

dan ala den meti fu a busi e teki waka.

21Den yongu lew e bari te den e suku nyanyan,

den angri fu Gado gi wan sani fu nyan.

22Te a son e opo den e hari gwe baka,

den go kanti didon ini den olo.

23Ma dan libisma e kmopo fu den oso go na wroko,

èn den e wroko te neti.

24MASRA, den sani di Yu meki furu sote.

Yu meki alamala nanga koni,

grontapu furu nanga den sani di Yu meki.

25Luku a se fa a bigi èn fa a bradi,

den meti di e beweigi na ini no de fu teri,

pikinwan nanga bigiwan.

26Na tapu en den sipi de,

na ini en a Lefiatan de,

di Yu meki fu prei nanga en.

27Ala den sani e wakti na Yu tapu,

fu Yu gi den nyanyan na tapu a yoisti ten.

28Te Yu e gi den, den e nyan,

te Yu e opo Yu anu, den e abi nofo fu nyan.

29Efu Yu no e luku den moro, den e frede te fu dede,

efu Yu teki a libibro fu den, den e dede

èn den e tron doti baka.

30Ma te Yu seni a libibro fu Yu,

den e kon na libi,

Yu e meki a grontapu kisi nyun libi.

31Meki a glori fu MASRA tan fu têgo,

meki MASRA prisiri nanga En wroko.

32Te A e luku grontapu, grontapu e beifi,

efu a fasi den bergi, den e puru smoko.

33Mi sa singi gi MASRA solanga mi de na libi,

mi sa singi gi a Gado fu mi solanga mi de.

34Mi e howpu taki den prakseri fu mi sa gi En prisiri,

neleki fa mi e prisiri nanga En.

35Sondusma no sa de moro na grontapu,

ogri-ati sma no sa de fu feni moro.

Mi sili, prijse MASRA!

Haleluya.