Sranan Tongo Bible 2016 (STB16)
106

A lobi fu Gado gi a pipel fu En

1061Haleluya! Prijse MASRA, bika A bun,

a lobi fu En na fu têgo.

2Suma sa man taki fu den bigi wroko fu MASRA?

Suma sa man gi En a grani di fiti En?

3Den sma di e libi bun,

den sma di e libi ala ten soleki fa a fiti,

na blesi sma.

4Tye MASRA, memre mi,

fu di Yu abi prisiri nanga a pipel fu Yu,

kon ferlusu mi tu.

5Dan mi sa si a bun di Yu abi

gi den wan di Yu teki gi Yusrefi,

mi sa prisiri makandra nanga Yu folku

èn meki bigi nanga den wan di Yu teki spesrutu gi Yu.

6Wi sondu, neleki den afo fu wi,

wi du sani di no bun, wi du ogri.

7Den afo fu wi no ben abi ai gi den wondru fu Yu

di den ben de na Egipte.

Den no memre a bigi lobi fu Yu,

prefu dati den kaka futu gi Yu na a se,

na a Riet Se.

8Ma A ferlusu den fu En nen ede,

fu sma ben kan si a krakti fu En.

9A bari a Riet Se èn a se drei gwe,

A meki den hari psa ini a dipi fu a se,

leki na ini a dreisabana den ben waka.

10A ferlusu den ini a makti fu den sma di no lobi den srefsrefi,

A puru den ini a makti fu a feyanti.

11A watra tapu den sma di ben feti den,

no wan fu den tan na libi.

12Dan fosi a pipel fu En bribi san A ben taki,

dan den singi fu gi En grani.

13Ma her'esi den fergiti den sani di A du,

èn den no wakti fu Gado taigi den san den mus du.

14Soso nyanyan ben de ini de ede ini a dreisabana,

èn den du sani fu luku san Gado ben o du.

15Dat' meki A gi den san den ben angri fu abi,

A gi den someni taki den ben e fuga fu en.

16Sowan fu den ben kon dyarusu tapu Moses,

ini a kampu fu den,

nanga tapu Aaron, a santa knekti fu MASRA.

17Ne a gron priti opo èn a swari Datan,

a tapu a heri grupu fu Abiram.

18Wan faya bron den wan di ben waka na den baka,

wan faya bron den ogri-ati sma.

19Den meki wan pikin kaw na Horeb,

dan den boigi gi a gowtu popki.

20Den kenki Gado, a glori fu den, gi wan popki,

gi wan popki fu wan kaw di e nyan grasi.

21Den fergiti Gado, a Ferlusuman fu den,

di ben du bigi sani ini Egipte,

22di ben du wondru ini a kondre fu Ham,

di ben du sani na a Riet Se di ben meki den tnapu nanga opo mofo.

23Ne Gado taki tak' A o puru den na pasi.

Ma Moses, di A ben teki spesrutu, dyompo gi den,

a begi gi den fu Gado no lusu a atibron fu En,

fu puru den na pasi.

24Den ben e si a bun kondre fu noti,

den no ben fertrow den sani di Gado ben taigi den.

25Prefu dati den ben krutu ini den tenti,

den no ben wani arki a sten fu MASRA.

26Ne Gado sweri trutru taki A o kiri den,

taki A no ben o meki den tan na libi ini a dreisabana,

27taki A ben o kiri den bakapikin fu den na mindri den tra folku,

èn taki A o panya den go na den tra kondre.

28Di den bigin dini Baal tapu a Peorbergi,

èn nyan sani di ben gi leki ofrandi na dedewan,

29di den bigin tanteri En nanga den sani di den ben e du,

wan takrusiki broko na den mindri.

30Ma Pinekas kon na mindri,

dan a siki tapu di ben e kiri den.

31Gado si dati leki wan bun sani,

fu têgo, fu alaten.

32Den meki Gado ati bron na den watra fu Meriba,

fu den ede sani no waka bun gi Moses.

33Bika di den kaka futu gi a Yeye fu Gado,

Moses taki sani ini atibron, di a no ben mus taki.

34Den no kiri den tra folku puru na pasi tu,

den folku di Gado ben taigi den fu puru na pasi,

35ma den go moksi nanga den,

èn den go libi leki fa den e libi.

36Den go dini den kruktu gado fu den,

di poti den ini bigi problema.

37Den gi den manpikin nanga den umapikin fu den

leki ofrandi na takruyeye.

38Den meki brudu lon fu soso,

a brudu fu den eigi manpikin nanga umapikin fu den,

di den tyari leki ofrandi na den kruktu gado fu Kanaan,

dan so den pori a kondre nanga a brudu di lon.

39Den doti densrefi tu nanga den sani di den du,

den huru gi Gado nanga den wroko fu den.

40Ne MASRA ati bron tapu a pipel fu En,

A si a pipel di A teki gi ensrefi leki wan groskin sani.

41A gi den abra ini a makti fu tra folku,

meki den sma di no ben lobi den srefsrefi

tiri den.

42Den feyanti fu den ben pina den,

èn den ben mus boigi gi a makti fu den.

43Furu leisi A ferlusu den,

ma den ben tan kaka den futu,

èn so den ben e sungu gwe moro nanga moro

ini a kruktudu fu den.

44Ma A ben e luku den ini den benawtu,

te A ben yere fa den ben e dyeme.

45Dan A ben e memre a ferbontu fu En fu den ede,

A bigi lobi fu En ben meki A sari den.

46Dan A ben meki taki den sma di tyari den gwe leki srafu

sori den sari-ati.

47Ferlusu wi MASRA, Gado fu wi,

tyari wi kon na wan baka fu mindri den tra folku,

fu wi prijse a santa nen fu Yu,

fu meki bigi gi a grani fu Yu.

48Prijse MASRA, a Gado fu Israel,

prijse En fu têgo èn ala ten.

Meki a heri pipel piki taki:

“Amen! Haleluya!”