Sranan Tongo Bible 2016 (STB16)
112

A blesi fu wan bun sma

1121Haleluya! A sma di e lespeki MASRA,

a sma di abi prisiri fu du san den gebod fu En e taki,

na wan blesi sma.

2Den pikin fu en sa abi makti ini a kondre,

Gado sa blesi den bakapikin fu den sma di e libi leki fa a fiti.

3Bogobogo gudu sa de ini a oso fu en,

a e du ala ten san bun ini Gado ai.

4A de leki wan faya ini a dungru

gi den sma di e libi leki fa a fiti,

a e sori den en bun-ati,

a e sori den sari-ati

èn a e libi bun nanga den.

5Sani sa go bun nanga a sma di abi sari-ati nanga trawan,

di e leni trawan moni,

èn di e wroko en moni na tapu wan leti fasi.

6Noti sa miti en,

fu têgo den sa memre a sma di bun ini Gado ai.

7Gi takru nyunsu a no sa frede,

en ati no o beifi,

bika a e tan fertrow tapu MASRA.

8En ati no o de na dyompo, a no e frede,

teleki a si fa den feyanti fu en fadon.

9A lobi prati san a abi,

a e gi mofinawan,

a e du ala ten san bun ini Gado ai,

a makti nanga a grani fu en sa kon bigi moro nanga moro.

10Ogri-ati sma e si dati èn den e nyan den niri,

den e kaw na tapu den tifi èn den e lasi ala howpu,

bika den ogri-ati sma no man du

san den ben abi na ini prakseri fu du.