Sranan Tongo Bible 2016 (STB16)
116

Prijse Gado fu a ferlusu di A tyari

1161Mi lobi MASRA,

bika A e yere mi sten,

A e arki te mi e begi en tangitangi.

2A kaka En yesi fu arki mi,

na dat' meki mi sa kari En

mi heri libi langa.

3Mi ben fasi ini den titei di dede ben seti gi mi,

mi ben frede sote taki mi ben o dede,

mi ben de na ini benawtu nanga sari.

4Ne mi kari MASRA, mi taki:

“Tye MASRA, ferlusu mi fu mi no lasi mi libi!”

5MASRA abi bun-ati,

A e krutu sani na tapu wan leti fasi,

a Gado fu wi e sorgu gi wi.

6MASRA e kibri den sma di no man yepi densrefi,

mi ben kon swaki, ma A ferlusu mi.

7Mi sili, now yu kan de tiri fu yu baka,

bika MASRA ben bun gi yu.

8Yu kibri mi fu mi no dede,

Yu meki mi ai no lon watra moro,

Yu kibri mi fu mi no fadon.

9Mi sa tan waka na MASRA fesi,

ini a kondre pe sma de di e libi.

10Mi tan bribi, srefi di mi taki:

“Mi de ini hebi benawtu.”

11Ini mi benawtu mi taki:

“No wan sma de fu fertrow.”

12Fa mi sa pai MASRA baka

fu ala den bun di A du gi mi?

13Mi sa kanti win leki wan ofrandi,

mi sa opo a nen fu MASRA.

14Mi sa du san mi pramisi MASRA,

leti fesi a heri pipel fu En.

15Na wan tranga sani gi MASRA,

fu si te den wan di tan waka na En baka

e dede.

16Tye MASRA, mi na Yu knekti,

mi e dini Yu leki fa mi m'ma ben dini Yu,

Yu lusu den banti di ben tai mi.

17Mi sa tyari wan ofrandi fu gi Yu tangi,

èn mi sa opo a nen fu MASRA.

18Mi sa du san mi ben pramisi MASRA,

leti fesi a heri pipel fu En,

19tapu a dyari fu a oso fu MASRA,

leti na mindri fu Yerusalem.

Haleluya!

117

Heri grontapu mus gi Masra grani

1171Folku, un alamala, un prijse MASRA,

kondre, un alamala, un gi En grani,

2bika a lobi di A e sori wi bigi fu tru,

èn un kan bow na En tapu fu têgo.

Haleluya!

118

A lobi fu Masra na fu têgo

1181Prijse MASRA, bika A bun,

a lobi fu En na fu têgo.

2Meki Israel tak' now taki:

“A lobi fu En na fu têgo.”

3Meki den bakapikin fu Aaron tak' now taki:

“A lobi fu En na fu têgo.”

4Meki den sma di e lespeki MASRA tak' now taki:

“A lobi fu En na fu têgo.”

5Di mi ben de na ini benawtu mi kari MASRA,

MASRA piki mi èn A puru mi ini a benawtu.

6MASRA de nanga mi, dat' meki mi no e frede,

san libisma o man du mi?

7MASRA de na mi sei fu yepi mi,

dat' meki mi e si den feyanti fu mi leki noti.

8A moro betre fu kibri na MASRA

dan fu fertrow tapu libisma.

9A moro betre fu kibri na MASRA

dan fu fertrow tapu prenspari sma.

10Ala den folku ben lontu mi,

ma ini a nen fu MASRA mi puru den na pasi.

11Den ben lontu mi, tapu mi fu alasei,

ma ini a nen fu MASRA mi puru den na pasi.

12Leki waswasi den ben lontu mi,

ma den dede gwe es'esi leki te makamaka teki faya.

Ini a nen fu MASRA mi puru den na pasi.

13Un ben naki mi trowe,

pikinso moro un ben kiri mi,

ma MASRA yepi mi.

14MASRA na mi krakti, na En e meki mi e singi,

na En ferlusu mi.

15Arki! Babari fu prisiri nanga singi de fu yere

ini den tenti fu den sma di bun ini Gado ai:

A let'anu fu MASRA e du bigi sani,

16a let'anu fu MASRA e opo mi,

a let'anu fu MASRA e du bigi sani!

17Mi no sa dede, ma mi o libi,

èn mi o ferteri fu den sani di MASRA du.

18MASRA strafu mi hebi,

ma A no libi mi meki mi dede.

19Opo den doro fu a tempel gi mi,

fu mi go na inisei,

fu prijse MASRA.

20Disi na a doro fu go na MASRA,

den sma di bun ini Gado ai e psa drape kon na ini.

21Mi e taki Yu tangi fu di Yu piki mi,

èn Yu tyari ferlusu kon gi mi.

22A ston di den mesreman feni taki no bun,

na a srefi ston dati tron a moro prenspari ston

fu a heri oso.

23Disi na Masra wroko,

èn wi e ferwondru fu si dati.

24Disi na a dei di MASRA wini a feti,

meki wi prisiri, meki wi breiti fu dati.

25Tye MASRA, tyari wini gi wi,

tye MASRA, meki sani waka bun gi wi.

26A sma di e kon ini a nen fu MASRA,

na wan blesi sma.

Fu a oso fu MASRA wi e blesi yu.

27MASRA na Gado,

na En meki sani waka bun gi wi baka.

Tai den ofrandi nanga titei

na den tutu fu a altari.118:27 A Hebrewtekst fu a pisi disi no krin.

28Yu na mi Gado, na Yu mi e gi tangi

mi Gado, mi sa taki fa Yu bigi.

29Prijse MASRA, bika A bun,

a lobi fu En na fu têgo!