Na MASRA e kibri wi
1211Wan singi di den sma e singi te den e go na Yerusalem.
Mi e opo mi ede luku go na den bergi,
fu pe mi yepi sa kmopo?
2Mi yepi e kmopo fu MASRA
di meki heimel nanga grontapu.
3A no sa meki ongoloku miti yu,
a Wan di e kibri Yu no e dyonko.
4Luku, a Wan di e kibri Israel no e dyonko,
A no e fadon na sribi.
5MASRA, na a Wan di e kibri yu,
MASRA de skin-skin nanga yu fu kibri yu.
6A son no sa bron yu te deiten,
A munkenki no sa du yu noti te neti.
7MASRA o kibri yu gi ala ogri,
A o kibri a libi fu yu.
8MASRA o kibri yu te yu e go,
A o kibri yu te yu e kon,
now èn fu têgo.
Wan begi gi Yerusalem
1221Wan singi di den sma e singi te den e go na Yerusalem. Fu David.
Mi ben breiti sote di sma taigi mi taki:
“Meki wi go na a oso fu MASRA.”
2Yerusalem, wi tnapu now na ini yu.
3Yerusalem, wan foto di bow
nanga oso krosbei fu makandra.
4Na drape den lo e hari go,
den lo fu MASRA,
fu du san a wèt e taigi den fu du
fu prijse a nen fu MASRA.
5Na drape den kownu e sidon fu koti krutu,
drape a famiri fu David de makti.
6Un begi Gado fu A gi Yerusalem freide:
“Meki den sma di lobi yu abi freide,
7meki freide de ini a foto,
èn meki freide de ini den tranga kibri presi fu yu.”
8Fu di mi lobi den famiri nanga den mati fu mi
meki mi e taki:
“Meki freide de ini yu.”
9Fu a oso fu MASRA, wi Gado, ede
meki mi begi taki sani sa go bun nanga yu tu.
Masra, sori wi a sari-ati fu Yu
1231Wan singi di den sma e singi te den e go na Yerusalem.
Mi e opo mi ede luku Yu
di sidon tapu Yu kownusturu na heimel.
2Leki fa a knekti e hori ai tapu a anu fu en basi,
leki fa uma srafu e tan luku a anu fu en misi,
na so wi ai de na tapu MASRA, wi Gado,
te leki A sori wi En bun-ati.
3Sori wi a bun-ati fu Yu MASRA,
sori wi Yu bun-ati,
bika wi no man teki a afrontu moro
di sma e afrontu wi.
4A spotu di den gudusma e teki wi meki spotu,
a si di den heimemre sma e si wi leki noti,
furu moro leki wi man tyari.