Sranan Tongo Bible 2016 (STB16)
128

A blesi fu dini MASRA

1281Wan singi di den sma e singi te den e go na Yerusalem.

Iniwan sma di e lespeki MASRA,

èn di e libi leki fa En wani,

na wan blesi sma.

2Yu sa nyan fu san yu wroko,

yu sa de wan blesi sma,

sani o go yu bun.

3A uma fu yu o de leki wan droifibon ini yu oso,

di e meki furu froktu,

den manpikin fu yu o tnapu lontu yu tafra

leki fa yongu oleifbon e gro lontu a bigi oleifbon.

4Na so MASRA sa blesi a sma

di e lespeki En.

5Fu Sion MASRA sa blesi yu:

yu sa si fa sani e go bun ini Yerusalem,

yu heri libi langa.

6èn yu sa si den granpikin fu yu.

Meki freide de ini Israel!

129

Na MASRA e tyari ferlusu

1291Wan singi di den sma e singi te den e go na Yerusalem.

Den pina mi sote, sensi na a bigin,

na wan sani di Israel e tan taki.

2Den pina mi sote, sensi na a bigin,

ma den no ben man broko mi.

3Den priti mi baka opo,

leki fa wan gronman e drai a doti ini en gron.

4Ma MASRA di e krutu sani tapu wan leti fasi,

koti den titei fu den ogri-ati sma.

5Meki ibri feyanti di no wani sabi not'noti fu Sion,

kon na syen èn hari gwe nanga baka.

6Meki den de leki grasi di e gro na tapu den daki,

grasi di e drei gwe fosi wan sma hari en puru,

7grasi di no e furu a anu fu wan sma fu a mai en,

grasi di no warti fu sma tai na ini bosu.

8Den sma di e waka psa no o taki:

“Meki MASRA blesi yu.

Wi e blesi yu ini a nen fu MASRA.”

130

Wan begi gi yepi

1301Wan singi di den sma e singi te den e go na Yerusalem.

Tye MASRA, mi e kari Yu,

mi de na ini bigi problema.

2Masra, arki mi,

kaka Yu yesi te mi e begi yu tangitangi.

3MASRA, efu Yu e tan memre den kruktudu fu wi,

suma o tan na libi, Masra?

4Ma Yu e gi pardon,

Yu e du dati fu libisma kan lespeki Yu.

5Mi e ferwakti MASRA,

nanga ala san de ini mi, mi e ferwakti En,

èn mi e fertrow En wortu.

6Nanga ala san de ini mi, mi e luku fu Masra,

moro leki fa waktiman e luku fu a dei broko,

moro leki fa waktiman e luku fu a dei kon krin.

7Israel, fertrow tapu MASRA!

Na MASRA lobi de,

na En ferlusu de.

8Ensrefi sa ferlusu Israel

fu ala den kruktudu fu en.