Sranan Tongo Bible 2016 (STB16)
137

Yerusalem, mi no sa fergiti yu noiti

1371Na den liba fu Babel

wi ben sidon e krei,

te wi ben e prakseri Sion.

2Na den wilgenbon drape

wi ben anga den citer fu wi.

3Den wan di ben hori wi leki strafuman

ben wani fu wi singi gi den.

Den wan di ben e pina wi

ben wani fu wi meki prisiri. Den taki:

“Singi wan singi fu Sion gi wi.”

4Fa wi man singi wan singi fu MASRA,

na ini wan dorosei kondre?

5Tye Yerusalem, efu mi fergiti yu,

meki mi let'anu fergiti tu fa fu prei a citer.

6Meki mi tongo fasi ini mi mofo

efu mi fergiti yu,

efu mi no si yu leki a sani di e gi mi a moro bigi prisiri.

7MASRA, no fergiti san den Edomitisma du

a dei di feyanti ben teki Yerusalem abra,

fa den ben e bari: “Broko a foto, broko a foto,

broko en trowe na gron.”

8Babel, den o broko yu srefi trowe na gron tu.

A sma di o pai yu baka fu san yu du nanga wi,

na wan blesi sma.

9A sma di o grabu den pikin fu yu,

èn naki den kiri na den bergiston,

na wan blesi sma.

138

Wan singi fu gi tangi

1381Fu David.

Mi wani prijse Yu nanga mi heri ati,

mi sa singi gi Yu na fesi den gado.

2Mi sa boigi nanga mi fesi go na a santa tempel fu Yu,

èn prijse Yu fu a lobi fu Yu,

nanga a bow di mi kan bow na Yu tapu,

bika Yu pramisi bigi sani

fu Yu nen ede.

3Di mi ben kari Yu, Yu piki mi,

Yu ben gi mi howpu baka nanga nyun krakti.

4MASRA, ala den kownu fu grontapu sa prijse Yu,

te den yere fu den pramisi di Yu gi wi.

5Den sa singi fu den sani di MASRA e du. Den sa taki:

“A glori fu MASRA bigi!

6MASRA bigi moro ala sani!

A e luku fu den sma di abi sakafasi,

den sma di abi heimemre A si fu fara.”

7Te mi de ini bigi benawtu,

Yu e hori mi na libi,

Yu e tapu den feyanti fu mi

di e kon nanga atibron na mi tapu,

èn Yu e ferlusu mi nanga Yu krakti.

8MASRA sa du san A pramisi.

Tye MASRA, a lobi fu Yu na fu têgo.

No poti a wroko fu Yu anu na wan sei.

139

Gado sabi ala sani

1391Gi a tiriman fu a singigrupu fu a tempel. Fu David. Wan Psalm.

MASRA, Yu e ondrosuku mi èn Yu sabi mi,

2Yu sabi mi te mi e sidon,

Yu sabi mi te mi e opo,

fu fara Yu sabi den prakseri fu mi.

3Yu e luku te mi e wroko anga te mi e teki bro,

Yu sabi ala san mi e du.

4MASRA, no wan wortu no de ini mi mofo

di Yu no sabi.

5Yu lontu mi fu bakasei nanga fu fes'sei,

Yu poti Yu anu na mi tapu.

6Mi no man ferstan a fasi fa Yu sabi mi,

a dipi tumsi gi mi, mi no man grabu en.

7Pe mi ben o man go fu Yu no si mi?

Pe mi ben o man lowe go gi Yu?

8Efu mi kren go na heimel, Yu de drape,

efu mi saka go ini dedekondre, Yu de drape tu.

9Awinsi mi frei go te pe a son e opo,

noso mi go libi psa den moro fara se,

10drape srefi Yu ben o tiri mi,

drape srefi Yu let'anu ben o grabu mi hori.

11Efu mi taki: “Meki dungru tapu mi,

meki a faya lontu mi kon dungru,”

12dan a dungru srefi no man kibri mi gi Yu,

a neti ben o kon krin leki dei

a dungru ben o kon krin leki faya.

13Na Yu meki ala sani fu mi,

na Yu tyari ala pisi fu mi kon na wan

na ini mi m'ma bere.

14Mi e prijse Yu fu a ferwondru fasi fa Yu meki mi,

den sani di Yu e du bigi fu tru,

mi sabi dati bunbun.

15Den bonyo fu mi no ben kibri gi Yu,

di Yu ben e meki mi sondro fu wan sma sabi,

dipi na ondro gron.

16Den ai fu Yu ben si mi di mi skin ben gersi not'noti ete,

ala den dei fu mi ben skrifi poti kba ini a buku fu Yu,

aladi no wan fu den dei ben meki srefi ete.

17Gado, o dipi den prakseri fu Yu de,

ofuru den de.

18Mi no man teri den, den furu moro santi,

efu mi wiki mi de na Yu ete.

19Tye Gado, mi e winsi taki Yu puru den ogri-ati sma na pasi,

unu di e meki brudu lon,

un tan fara fu mi.

20Den e taki takru fu Yu,

den feyanti fu Yu e taki wan lo ogri fu Yu.

21MASRA, mi no lobi den sma di no lobi Yu,

mi no wani si den sma srefsrefi di no wani du Yu wani.

22Mi no man si den na ai srefsrefi,

mi e si den leki feyanti.

23Ondrosuku mi, mi Gado, fu Yu kan sabi mi ati,

tesi mi, fu Yu kan sabi den prakseri fu mi.

24Luku efu mi no teki wan kruktu pasi,

èn yepi mi fu teki a pasi di e tyari mi kon na Yu.