Sranan Tongo Bible 2016 (STB16)
140

Kibri mi gi ogri-ati sma

1401Gi a tiriman fu a singigrupu fu a tempel. Wan psalm fu David.

2Tye MASRA, ferlusu mi fu den sma di e du ogri,

kibri mi gi den man di e du sani nanga tranga.

3Soso ogri den e prakseri fu du,

heri dei na soso trobi den e meki.

4A tongo fu den de leki di fu takru sneki

den sani di den e taki e kiri leki te takru sneki beti yu. sela

5Tye MASRA, no meki mi fadon ini anu fu ogri-ati sma,

kibri mi gi den man di e du sani nanga tranga,

den de nomonomo fu puru mi na pasi.

6Den heimemre sma seti sani fu fanga mi,

den hari titei span na tapu mi pasi,

diki olo gi mi fu mi fadon na ini. sela

7Mi taigi MASRA taki: “Na Yu na mi Gado

tye MASRA, arki mi te mi e begi Yu trangatranga.

8MASRA Masra, mi tranga Ferlusuman,

Yu e kibri mi te mi de ini bigi feti.

9Tye MASRA, no meki den ogri-ati sma kisi san den wani,

no meki den sani di den seti fu du psa trutru tu,

te den opo fu feti mi. sela

10Meki a ogri di den poti fu du nanga mi,

psa nanga densrefi.

11Meki faya krofaya fadon na den tapu,

meki faya bron den,

meki den fadon ini olo fu den no opo kon moro.

12Presi no mus de ini a kondre

gi den sma di e taki takru fu trawan,

meki ogri miti den sma di e du sani nanga tranga.”

13Mi sabi taki MASRA e feti gi den mofinawan te den de na krutu,

taki A e meki den pôtiwan kisi den leti.

14Fu tru, den sma di bun ini Yu ai sa prijse Yu,

den sma di e libi leki fa a fiti sa tan krosbei fu Yu.