Sranan Tongo Bible 2016 (STB16)
141

Gado, meki mi tan fara fu ogridu

1411Wan psalm fu David.

Tye MASRA, na Yu mi e kari,

kon es'esi kon yepi mi,

kaka Yu yesi te mi e kari Yu.

2Meki a begi fu mi de na Yu fesi leki wan ofrandi nanga wan switi smeri,

meki den anu fu mi di mi e opo,

de leki a ofrandi di e bron te neti.

3MASRA, yepi mi fu mi taki bun sani nanga mi mofo,

èn yepi mi fu mi hori en te a no de fanowdu fu taki.

4No meki a ati fu mi angri fu du ogri,

no meki mi go du ogri-ati sani,

nanga sma di e du kruktudu,

yepi mi fu mi no teki prati ini den fesa fu den.

5Efu wan sma di bun ini Yu ai naki mi,

mi e si en leki wan bun sani,

efu a piri ai gi mi,

dan dati de leki oli tapu mi ede.

Efu ogri-ati sma e pina mi, mi sa tan begi.

6Awinsi sma sa fringi den edeman fu den fu wan bergi kon na gron,

fu a mofo fu mi den no o yere no wan spotu.

7Leki fa sma e drai a doti èn panya en,

na so den bonyo fu wi didon na grebimofo.

8Ma MASRA Masra, mi e tan hori mi ai na Yu tapu,

no meki mi dede tapu wan ogri fasi,

bika na Yu mi e kibri.

9Kibri mi gi den sani di den seti fu fanga mi,

gi den olo di den sma di e du kruktudu diki,

fu mi fadon na ini.

10Meki den ogri-ati sma fadon ini den srefi olo di den diki,

den alamala,

ma meki mi kmopo ini den anu.

142

Wan begi gi yepi

1421Wan singi fu David di mus leri wi wan sani, di a ben de ini a bergi-olo. Wan begi.

2Trangatranga mi e kari MASRA,

trangatranga mi e begi MASRA.

3Mi e loktu mi ati na En fesi,

taigi En a benawtu ini san mi de.

4Te mi lasi ati srefsrefi,

Yu sabi a pasi di mi mus teki.

Den feyanti fu mi seti sani fu fanga mi

tapu a pasi di mi mus waka.

5Mi e luku na mi let'sei

ma mi no e si no wan sma fu yepi mi,

no wan presi de pe mi kan lon go kibri,

no wan sma e aksi fa a e go nanga mi,

6Na Yu mi e kari, MASRA,

mi e taigi Yu taki: “Na Yu na mi kibripresi,

na Yu na ala sani san mi abi dyaso na grontapu.”

7Arki te mi e tan begi,

bika mi kon swaki srefsrefi,

ferlusu mi fu den sma di de nomo na mi baka,

bika den tranga moro mi.

8Puru mi na ini a pina ini san mi de,

fu mi prijse Yu nen,

na mindri fu den sma di bun ini Yu ai

bika na wan bigi bun Yu du gi mi.

143

Wan begi gi yepi

1431Wan psalm fu David.

Tye MASRA, yere mi begi,

arki te mi e begi tangitangi,

piki mi, bika mi kan bow na Yu tapu

èn Yu e du sani nanga leti.

2No tyari Yu knekti go na krutu,

bika no wan libisma no de sondro fowtu ini Yu ai.

3Mi feyanti de nomonomo na mi baka,

a e traputrapu mi na gron,

a e meki mi tan ini dungru presi,

leki den sma di dede bun langa kba.

4Na dat' meki mi lasi ati so,

mi no sabi srefsrefi moro san fu du.

5Mi e prakseri fosten baka,

mi e prakseri den sani di Yu du,

mi e prakseri den bigi wroko fu Yu anu.

6Mi e opo den anu fu mi go na loktu gi Yu,

mi e angri fu Yu leki fa drei gron e angri fu watra. sela

7Piki mi es'esi, MASRA, bika mi e dede,

no kibri Yu fesi gi mi,

noso mi o de leki den sma di e dede go ini den grebi.

8Memre mi mamanten na a lobi fu Yu,

bika tapu Yu mi e fertrow,

sori mi a pasi di mi mus teki,

bika na Yu mi e kon nanga mi begi.

9Ferlusu mi fu den feyanti fu mi, MASRA,

na Yu mi e lon kon kibri.

10Leri mi fu du Yu wani, bika Yu na mi Gado,

meki a bun Yeye fu Yu tyari mi waka

tapu wan pasi sondro problema.

11Hori mi na libi, MASRA, fu Yu nen ede,

puru mi ini a benawtu ini san mi de,

bika Yu e du sani nanga leti.

12Puru ala den feyanti fu mi na pasi,

fu Yu lobi ede,

tyari wan kba kon na ala den sma di e pina mi,

bika mi na Yu knekti.