Sranan Tongo Bible 2016 (STB16)
145

Wan singi fu prijse Gado

1451Wan singi fu David fu gi Gado grani.

Mi sa taki fa Yu bigi, mi Gado, Yu di de Kownu,

mi sa prijse a nen fu Yu fu têgo èn ala ten.

2Ala dei mi sa prijse Yu,

gi a nen fu Yu grani fu têgo èn ala ten:

3“MASRA bigi èn A fiti fu kisi grani trutru,

no wan sma man ferstan fa A bigi.”

4Fu têgo wi sa prijse den wroko fu Yu,

èn taki fu den bigi sani di Yu du.

5Mi sa taki fu a bigi glori fu Yu,

nanga den bigi wondru di Yu du.

6Sma o taki fu den bigi sani di Yu du,

èn mi o ferteri fa Yu bigi.

7Den sa ferteri fu a bigi bun fu Yu,

èn prisiri fu a fasi fa Yu e du sani nanga leti.

8“MASRA abi bun-ati nanga sari-ati,

A abi langa pasensi nanga bigi lobi.

9MASRA bun gi ala sma,

èn A abi sari-ati gi ala sani di A meki.”

10Ala den sani di Yu meki sa gi Yu grani, MASRA,

den sma di e tan waka na Yu baka sa prijse Yu.

11Den o taki fu a krakti fasi fa Yu e tiri leki kownu,

èn ferteri fu ala san Yu man du,

12dan so libisma sa yere fu den bigi sani di Yu du,

yere fu a krakti fasi fa Yu e tiri leki kownu.

13Yu na kownu fu têgo,

fu ala ten Yu o tiri libisma.

14MASRA e kraka ala sma di lasi ati,

A e yepi ala sma di de ini bigi problema.

15Ala sma e luku fu Yu nanga wan ferwakti,

èn Yu e gi den nyanyan a yuru di den abi en fanowdu.

16Yu e gi den moro leki san den abi fanowdu,

Yu e gi ala sani di e libi, san den e angri.

17Ini ala sani di A e du

MASRA e du sani na tapu wan leti fasi,

a lobi fu En de fu si ini ala san A e du.

18MASRA tnapu klari fu yepi ibriwan di e kari En,

ibriwan di e kari en nanga wan krin ati.

19A e gi den sma di e lespeki En san den e angri,

a e yere te den e bari suku yepi èn A e ferlusu den.

20MASRA e kibri ala sma di lobi En,

ma A e puru den ogri-ati sma na pasi.

21Mi sa gi MASRA grani nanga mi mofo,

èn meki ala sani di e libi prijse a santa nen fu En

fu têgo èn ala ten.

146

Fertrow tapu Gado wawan

1461Haleluya!

Prijse MASRA, mi sili!

2Mi sa prijse MASRA mi heri libi langa,

singi gi a Gado fu mi solanga mi de na libi.

3No poti yu fertrow tapu sma di abi makti,

tapu wan libisma di no man ferlusu.

4Te a bro fu en koti, na doti a e tron baka,

wan kba e kon tu na ala san a ben prakseri fu du.

5Ma a sma di abi a Gado fu Yakob leki en yepiman,

na wan blesi sma,

a sma di e poti en howpu tapu MASRA, a Gado fu en,

6di meki heimel nanga grontapu,

a se nanga ala san de na ini,

a Wan di de fu fertrow fu têgo.

7A e meki den sma di trawan e pina, kisi den leti,

A e gi nyanyan na den sma di angri e kiri.

MASRA e poti den sma fri di de na strafu,

8MASRA e opo den ai fu den breniwan,

MASRA e yepi den sma di de ini bigi problema,

MASRA lobi den sma di bun ini En ai,

9MASRA e kibri den doroseisma,

A e sorgu gi den pikin di no abi p'pa nanga m'ma moro,

nanga den uma di masra dede kba,

ma A e meki den ogri-ati sma go lasi.

10MASRA, na kownu fu têgo,

Sion, a Gado fu yu, de fu ala ten.

Haleluya!

147

Grani fiti Gado di abi ala marki

1471Prijse MASRA!

Na wan bun sani fu singi gi a Gado fu wi

na wan switi sani, èn a fiti fu wi singi gi En.

2MASRA e bow Yerusalem,

A e tyari den Israelitisma kon na wan

di feyanti ben tyari gwe nanga tranga.

3A e dresi den wan di lasi ati,

A e tai den soro fu den.

4Na En sabi omeni stari de,

A e kari den alamala na den nen.

5A MASRA fu wi bigi, a krakti fu En bigi fu tru

a ferstan fu En no de fu marki.

6MASRA e opo den sma di abi sakafasi,

ma A e broko ogri-ati sma saka.

7Un singi wan singi gi MASRA fu gi En grani,

un singi gi a Gado fu wi nanga citer,

8gi a Wan di e poti den wolku na heimel,

di e sorgu taki alen e fadon na grontapu,

di e meki grasi gro na tapu den bergi,

9di e gi den meti a nyanyan di den abi fanowdu,

di e gi den yongu fowru a nyanyan gi san den e bari.

10A no abi prisiri nanga a krakti fu asi

noso den esi futu fu srudati.

11MASRA abi prisiri nanga sma di e lespeki En,

di e bow na tapu a lobi fu En.

12Yerusalem, prijse MASRA!

Sion, gi a Gado fu yu grani!

13Bika na En poti tranga greni gi a bigi doro fu yu,

èn A blesi a folku di e libi ini yu.

14Na En e sorgu taki freide de ini a kondre

na En e gi un fatu tarwe fu nyan.

15A e seni den komanderi fu En kon na grontapu,

a wortu fu En kon es'esi.

16A e meki sneeuw fadon leki katun,

A e panya bun kowru dow na grontapu leki asisi.

17A e fringi pis'pisi ijs kon na gron,

suma man nanga a kowru fu En?

18Dan A e seni a wortu fu En, èn ala a ijs e tron watra,

A e meki a winti fu En wai, èn den liba e lon baka.

19A meki Yakob kon sabi a wani fu En

A meki Israel kon sabi den sani di wi mus tan du,

nanga den sani na san wi mus hori wisrefi.

20Nanga no wan tra folku A du dati,

den no sabi den sani fu En na san den mus hori densrefi.

Haleluya!