Sranan Tongo Bible 2016 (STB16)
1

Den tu pasi

11A sma di no e teki rai fu ogri-ati sma na wan blesi sma.

So wan sma no e du den srefi sani di sondusma e du,

a no e sidon tu nanga sma di lobi fu e meki spotu.

2Ma a lobi a wèt fu MASRA.

A e leisi en,

a e prakseri en go, a e prakseri en kon,

dei nanga neti.

3So wan sma de leki wan bon di prani sei wan kriki,

di e gi froktu tapu a yoisti ten,

en wiwiri no e flaw.

Ala sani di a e du e waka bun.

4Ma sani no e waka so gi ogri-ati sma.

den de leki karuwiwiri di a winti e wai gwe.

5Dat' meki ogri-ati sma o kisi den strafu nomonomo,

sondu sma no o man de makandra

nanga sma di bun ini Gado ai.

6Bika MASRA e tyari èn kibri den sma di bun ini En ai,

ma ogri-ati sma e lasi gwe.

2

A kownu di Gado o poti

21Fu sanede den folku e meki opruru?

Fu sanede den e sidon e prakseri sani di no abi no wan warti?

2Den kownu fu grontapu e meki densrefi klari fu feti,

tiriman e span anu fu feti nanga MASRA,

nanga a kownu di A salfu.

3Den e taki:

“Meki un koti den titei fu den,

meki un puru den keti fu den na un neki!”

4A Wan di sidon tapu en kownusturu ini heimel e lafu,

Masra e teki den meki spotu.

5Dan A e bari den na ini atibron,

den e skreki te fu dede fu a hebi atibron fu En.

6“Na Mi srefi poti a kownu fu Mi,

na Sion, a santa bergi fu Mi.”

7Mi wani taki fu a besroiti fu MASRA.

A ben taigi mi taki:

“Yu na mi manpikin.

Bigin fu tide Mi na yu P'pa.

8Aksi Mi nomo èn Mi o gi yu ala folku gi yusrefi,

heri grontapu o de fu yu.

9Yu o naki den broko nanga wan isri tiki,

broko den pis'pisi leki na kleipatu Yu e naki broko.”

10We dan, un kownu, un sori taki un koni,

tiriman fu grontapu, un teki a warskow disi.

11Un saka unsrefi gi MASRA nanga lespeki,

un gi En grani nanga lespeki.

12Bosi a manpikin,2:12 A Hebrewtekst fu a pisi disi no krin.

fu A no lusu a hebi atibron fu En,

noso yu o dede sondro fu yu sabi.

Bika a hebi atibron fu En no abi furu fanowdu.

Ala den sma di e kibri na En na blesi sma!

3

Wan mamanten begi

31Wan psalm fu David, baka di a ben lowe gi en manpikin Absalom.

2Tye MASRA, den feyanti fu mi furu sote,

furu sma e opo fu feti mi.

3Furu e taki:

“Gado no o yepi en.” sela3:3 A no krin san a wortu disi wan taki.

4Ma Yu, MASRA, na wan schild di e kibri mi.

Na Yu e gi mi grani,

na Yu e gi mi krakti fu tnapu.

5Te mi e kari MASRA trangatranga,

A e piki mi fu a santa bergi fu En. sela

6Mi e go didon, mi e fadon na sribi,

èn mi e wiki baka, bika MASRA e kibri mi.

7Dat' meki mi no e frede tu,

awinsi dusundusun kon lontu mi.

8Du wan sani, MASRA, ferlusu mi, mi Gado!

Naki ala den feyanti fu mi na den seifesi,

broko den tifi fu den ogri-ati sma.

9Na MASRA e gi wini,

meki a blesi fu Yu de tapu a pipel fu Yu. sela