Sranan Tongo Bible 2016 (STB16)
27

Te Gado de nanga yu noti no kan miti yu

271Fu David.

Na MASRA e krin mi pasi, En na mi Ferlusuman,

mi no e frede gi no wan sma.

Na MASRA e kibri mi libi,

mi no e beifi gi no wan sma.

2Ogri-ati sma ben kon na mi tapu,

fu priti mi libilibi,

ma na den wan di e feti mi,

den feyanti fu mi,

na den misi den futu,

na den fadon.

3Awinsi wan legre e kon na mi tapu,

mi no e frede,

awinsi na bigi feti mi mus feti,

mi e tan fertrow.

4Wan sani nomo mi aksi MASRA,

èn na dati mi e suku:

fu kan de ini a oso fu MASRA ala dei fu mi libi,

fu kan prisiri nanga a bunfasi fu En,

èn fu miti nanga En ini a tempel fu En.

5Bika ini ogriten A e gi mi wan kibripresi,

wan bun kibripresi ini a tenti fu En,

A e opo mi poti hei na tapu wan bigi ston.

6Dat' meki mi kan opo mi ede now,

awinsi omeni feyanti tnapu lontu mi.

Na dat' meki mi wani tyari ofrandi nanga prisiri ini a tenti fu En.

Mi wani singi, singi nanga instrumenti gi MASRA.

7MASRA, arki fa mi e kari yu dorodoro,

sori mi a bun-ati fu Yu èn piki mi.

8Yu taki: “anbegi Mi.”

Mi anbegi Yu, MASRA.

9No drai Yu fesi gi mi,

no poti Yu knekti na wan sei na ini Yu atibron.

Na Yu na mi yepi.

Tye, Gado di e ferlusu mi, no drai Yu baka gi mi,

no gwe libi mi.

10Awinsi mi p'pa nanga mi m'ma gwe libi mi,

MASRA e sorgu gi mi.

11MASRA, leri mi fa mi mus tyari misrefi,

tyari mi waka tapu Yu pasi,

fu den feyanti fu mi ede.

12No gi mi abra na a wani fu den di e feti mi,

bika ketoigi e lei gi mi fesi krutubakra,

èn den de fayafaya fu di mi ogri.

13Mi e bribi taki mi o si a bunfasi fu MASRA

dyaso na grontapu.

14Ferwakti MASRA, abi dek'ati, no lasi ati,

iya, ferwakti MASRA.

28

Wan begi fu yepi

281Fu David.

MASRA, na Yu mi e kari,

a Trangawan pe mi e kibri,

no gi mi dofusei.

Bika efu Yu tan hori Yu mofo mi o dede.

2Arki fa mi e begi trangatranga te mi e bari suku yepi,

te mi e opo mi anu go na a moro santa presi fu Yu.

3No puru mi na pasi makandra nanga den ogri-ati sma,

nanga den sma di lobi kruktudu,

den e taki switi nanga trawan,

ma den ati furu nanga ogri.

4Gi den san den fiti fu kisi,

pai den fu a fasi fa den e libi,

meki den butu fu den ogri di den du,

nanga a fasi fa den ben tyari densrefi.

5Den no e si den sani di MASRA e du,

den e si den sani di A meki leki noti.

Strafu den, puru den na pasi fu têgo.

6Prijse MASRA,

bika A yere di mi begi trangatranga.

7MASRA na mi krakti nanga a wan di e kibri mi,

na tapu En mi ben fertrow èn A yepi mi.

Na dat' meki mi ati e prisiri,

èn mi e gi En grani nanga mi singi.

8MASRA na a krakti fu a pipel fu En

A de wan bun kibripresi gi a kownu di A salfu.

9We dan, ferlusu a pipel fu Yu,

blesi den wan di Yu teki gi Yusrefi,

sorgu gi den èn tyari den fu têgo tapu Yu anu.

29

A sten fu Gado

291Wan psalm fu David.

Un gado, un prijse MASRA

un gi MASRA a grani di fiti a glori nanga a krakti fu En.

2Gi MASRA a grani di fiti a nen fu En

Un boigi te a glori fu a santa MASRA de fu si.

3A sten fu MASRA de fu yere abra den watra,

te a Gado fu glori e taki a gersi leki na a dondru e bari.

A sten fu MASRA de fu yere abra den bigi watra.

4A sten fu MASRA krakti,

a sten fu MASRA furu nanga glori.

5A sten fu MASRA e broko sedrebon,

iya, MASRA e broko den sedrebon fu a Libanonbergi.

6A e meki den bergi dyompo leki pikin kaw,

a Libanonbergi nanga a Siryonbergi, leki yongu bofru.

7A sten fu MASRA e meki faya koti na loktu.

8A sten fu MASRA e meki a dreisabana beifi,

MASRA e meki a dreisabana fu Kades beifi.

9A sten fu MASRA e meki den dia meki pikin,

a e puru ala wiwiri na den bon fu a busi.29:9 A Hebrewtekst fu a pisi disi no krin. Un kan puru a pisi disi so tu: A e meki krabita kisi pikin.

Ma ini a tempel fu En ala sma e taki: “Grani.”

10MASRA e sidon tapu En kownusturu na loktu fu a bigi watra,

iya, MASRA e sidon leki kownu fu têgo.

11MASRA sa meki a folku fu En tron wan tranga folku,

MASRA sa blesi a folku fu En nanga freide.