Sranan Tongo Bible 2016 (STB16)
2

A kownu di Gado o poti

21Fu sanede den folku e meki opruru?

Fu sanede den e sidon e prakseri sani di no abi no wan warti?

2Den kownu fu grontapu e meki densrefi klari fu feti,

tiriman e span anu fu feti nanga MASRA,

nanga a kownu di A salfu.

3Den e taki:

“Meki un koti den titei fu den,

meki un puru den keti fu den na un neki!”

4A Wan di sidon tapu en kownusturu ini heimel e lafu,

Masra e teki den meki spotu.

5Dan A e bari den na ini atibron,

den e skreki te fu dede fu a hebi atibron fu En.

6“Na Mi srefi poti a kownu fu Mi,

na Sion, a santa bergi fu Mi.”

7Mi wani taki fu a besroiti fu MASRA.

A ben taigi mi taki:

“Yu na mi manpikin.

Bigin fu tide Mi na yu P'pa.

8Aksi Mi nomo èn Mi o gi yu ala folku gi yusrefi,

heri grontapu o de fu yu.

9Yu o naki den broko nanga wan isri tiki,

broko den pis'pisi leki na kleipatu Yu e naki broko.”

10We dan, un kownu, un sori taki un koni,

tiriman fu grontapu, un teki a warskow disi.

11Un saka unsrefi gi MASRA nanga lespeki,

un gi En grani nanga lespeki.

12Bosi a manpikin,2:12 A Hebrewtekst fu a pisi disi no krin.

fu A no lusu a hebi atibron fu En,

noso yu o dede sondro fu yu sabi.

Bika a hebi atibron fu En no abi furu fanowdu.

Ala den sma di e kibri na En na blesi sma!

3

Wan mamanten begi

31Wan psalm fu David, baka di a ben lowe gi en manpikin Absalom.

2Tye MASRA, den feyanti fu mi furu sote,

furu sma e opo fu feti mi.

3Furu e taki:

“Gado no o yepi en.” sela3:3 A no krin san a wortu disi wan taki.

4Ma Yu, MASRA, na wan schild di e kibri mi.

Na Yu e gi mi grani,

na Yu e gi mi krakti fu tnapu.

5Te mi e kari MASRA trangatranga,

A e piki mi fu a santa bergi fu En. sela

6Mi e go didon, mi e fadon na sribi,

èn mi e wiki baka, bika MASRA e kibri mi.

7Dat' meki mi no e frede tu,

awinsi dusundusun kon lontu mi.

8Du wan sani, MASRA, ferlusu mi, mi Gado!

Naki ala den feyanti fu mi na den seifesi,

broko den tifi fu den ogri-ati sma.

9Na MASRA e gi wini,

meki a blesi fu Yu de tapu a pipel fu Yu. sela

4

Wan neti begi

41Gi a tiriman fu a singigrupu fu a tempel. A psalm disi mus singi nanga instrumenti di abi snaar. Wan psalm fu David.

2Gado di e meki mi kisi mi leti,

piki mi te mi e bari suku yepi na Yu!

Te sma e pina mi, Yu e gi mi pasi fu kmopo na ini.

Sori mi a sari-ati fu Yu èn du san mi e begi Yu.

3Un di abi makti,

olanga un o tan afrontu a grani fu mi?

olanga un o lobi den sani di no abi no wan warti,

olanga un o tan waka baka den lei? sela

4Un mus sabi taki MASRA e du bun gi den sma

di e tan waka na En baka.

MASRA e yere te mi e kari En.

5Beifi gi En, ma no sondu.4:5 Un kan puru a pisi disi so tu: Efu yu kisi atibron, sorgu tak' yu no sondu.

Te yu didon na tapu yu bedi, prakseri den sani di yu du,

èn tan tiri. sela

6Tyari yu ofrandi soleki fa a fiti,

èn fertrow na tapu MASRA.

7Furu sma e aksi taki:

“Suma o meki un si a bun?”

MASRA, luku wi nanga prisiri.

8A prisiri di Yu e gi mi

bigi moro a prisiri di den abi

te a karu nanga a droifi fu den gi bogobogo nyanyan.

9Ini freide mi e go didon èn fadon na sribi,

bika na Yu wawan MASRA, e meki taki noti no e miti mi.