Sranan Tongo Bible 2016 (STB16)
30

Wan begi fu gi tangi

301Wan psalm. Wan singi di singi di den ben e wei a tempel. Fu David.

2MASRA, mi o taki fa Yu bigi,

bika Yu ferlusu mi,

Yu no meki den feyanti fu mi prisiri fu mi ede.

3MASRA, mi Gado,

na Yu mi kari fu yepi mi,

èn Yu dresi mi.

4MASRA, Yu puru mi ini anu fu dede,

Yu hori mi na libi,

fu mi no go ini mi grebi.

5Un singi gi MASRA, un di e tan waka na En baka,

un prijse a santa nen fu En.

6A atibron fu En na fu wan momenti nomo,

ma a bunfasi fu En na fu un heri libi langa,

awinsi un e krei heri neti,

mamanten un e opo nanga prisiri.

7Di sani ben go mi bun mi ben prakseri taki:

Mi no o fadon.

8MASRA, a bunfasi fu Yu meki mi tnapu leki wan tranga bergi.

Ma di Yu drai Yu fesi gi mi,

mi bigin frede srefsrefi.

9Na dat' meki mi kari Yu MASRA,

begi Yu, Masra, fu Yu sori mi Yu bun-ati.

10Sortu wini Yu o abi efu mi dede,

efu mi saka go ini dedekondre?

Den dedewan no man prijse Yu,

den no man ferteri moro taki sma kan bow na Yu tapu.

11Arki mi, MASRA, èn sori mi a bun-ati fu Yu,

MASRA, ferlusu mi!

12Yu kenki a sari fu mi tron dansi,

Yu puru a lowkrosi na mi skin,

Yu weri krosi gi mi fu mi kan prisiri.

13Dat' meki mi e singi gi Yu,

mi no o tan tiri moro.

MASRA, mi Gado, fu têgo mi o prijse Yu.

31

Wan begi fu fertrow

311Gi a tiriman fu a singigrupu fu a tempel. Wan Psalm fu David.

2MASRA, na Yu mi e kibri,

no meki mi kon na syen noiti.

Ferlusu mi, bika Yu e du sani nanga leti.

3Arki a begi fu mi,

kon yepi mi es'esi.

De leki a Trangawan gi mi, pe mi kan kibri,

leki wan tranga kibripresi pe noti no kan miti mi.

4Iya, Yu na a Trangawan pe mi kan kibri,

a tranga kibripresi fu mi,

fu Yu nen ede Yu o tiri mi èn Yu o tyari mi.

5Yu o sorgu taki a ogri di den seti fu miti mi no miti mi,

bika na Yu mi e kibri.

6Mi e poti misrefi na ini Yu anu,

MASRA, Gado di de fu fertrow, na Yu e ferlusu mi.

7Mi no lobi den sma srefsrefi di e dini kruktu gado,

di no man du not'noti,

mi dati e fertrow tapu MASRA.

8Mi breiti èn mi sa prisiri srefsrefi fu a bigi lobi fu Yu,

bika Yu si a pina di mi e nyan,

Yu sabi fu a benawtu ini san mi de.

9Yu no meki mi fadon ini anu fu mi feyanti,

Yu opo pasi baka gi mi.

10MASRA, sori mi a bun-ati fu Yu,

bika mi de na ini benawtu,

sari meki den ai fu mi sweri,

mi sili nanga mi skin e swaki e gwe.

11Mi e psa a libi fu mi ini sari,

den yari fu mi ini soktu,

kruktudu meki taki krakti e gwe libi mi,

den bonyo fu mi srefi e swaki.

12Den di e feti mi e teki mi meki spotu,

spesrutu den birtisma fu mi.

Den sma di sabi mi e skreki te den si mi,

te sma si mi na strati den e lon gwe gi mi.

13Ala sma fergiti mi,

leki fa den e fergiti dedesma,

mi kmopo na ini den prakseri,

leki wan broko prapi.

14Mi e yere fa sma e taki safrisafri fu mi,

ogri e luru na alasei,

den sidon e kenki prakseri san den o du nanga mi,

den e meki mofo fa den o kiri mi.

15Ma tapu Yu mi e fertrow MASRA,

mi e taki: Yu na mi Gado.

16A fasi fa mi libi e waka de na ini Yu anu,

ferlusu mi fu a makti fu mi feyanti,

fu den di de na mi baka.

17Luku Yu knekti nanga prisiri,

èn ferlusu mi nanga a bigi lobi fu Yu.

18MASRA, na Yu mi e kari,

no meki mi kon na syen,

ma meki den ogri-ati sma kon na syen,

tapu den mofo èn meki den go na dedekondre.

19Tapu a mofo fu den di e lei,

den di abi heimemre

èn di e si den sma di bun ini Yu ai leki noti

te den e taki fu den.

20Yu poti wan bigi bun na wan sei

gi den sma di e lespeki Yu.

Yu poti en klari gi den di e kibri na Yu,

fu heri grontapu si en.

21Te libisma e span anu fu feti den,

Yu e kibri den pe Yusrefi de.

Yu e kibri den ini a tenti fu Yu

gi a kos'kosi fu den feyanti.

22MASRA fiti fu kisi grani,

bika a sori mi a bigi lobi fu En tapu wan ferwondru fasi

di mi ben de ini benawtu

leki te feyanti lontu wan foto fu alasei.

23Di mi ben frede sote mi ben prakseri taki:

“Yu yagi mi gwe, Yu no e luku mi moro.”

Ma Yu yere di mi begi trangatranga,

Yu yere di mi kari Yu fu Yu yepi mi.

24Un di e waka na MASRA baka, un lobi En,

MASRA e kibri den wan di e fertrow na En tapu,

ma A e gi den heimemre sma a strafu di den fiti fu kisi.

25Un alamala di e howpu tapu MASRA,

un mus abi dek'ati èn un no mus lasi ati.

32

Gado e gi pardon

321Fu David. Wan singi di mus leri wi wan sani.

A sma di kisi pardon fu den fowtu di a meki,

a sma di sondu no de fu si moro,

na wan blesi sma.

2A sma di MASRA no strafu fu den kruktudu fu en,

a sma di no e bedrigi,

na wan blesi sma.

3Bika solanga mi no ben taigi Yu taki mi sondu,

den bonyo fu mi ben e swaki e gwe,

dyeme mi ben e dyeme nomo heri dei.

4Bika dei nanga neti Yu ben e strafu mi,

mi krakti ben e gwe libi mi,

leki te watra e drei gwe ini tranga son. sela

5Ne mi taigi Yu taki mi sondu,

mi no kibri den kruktudu fu mi moro langa.

Mi ben taigi misrefi taki:

“Mi sa ferteri MASRA den fowtu di mi meki.”

Èn Yu gi mi pardon fu mi sondu. sela

6Dat' meki ibriwan di e waka na Yu baka mus begi,

den mus begi te den si taki den sondu.32:6 A Hebrewtekst fu a pisi disi no krin. Un kan puru a pisi disi so tu: solanga Yu de fu feni ete.

Te ogri e kon na den tapu leki wan bigi frudu,

a no sa wasi den gwe.

7Yu na mi kibripresi,

Yu e kibri mi gi benawtu.

Yu e lontu mi nanga singi di e taki fu ferlusu. sela

8“Mi o sori yu èn Mi o leri yu a pasi di yu mus waka.

Mi o gi yu rai, Mi ai o de na yu tapu.

9Yu no mus de leki wan asi noso wan buriki di no abi ferstan,

di e go soso pe den basi wani,

te a isri nanga a titei de ini den mofo,

dan ogri no sa miti yu.”

10Furu problema e miti ogri-ati sma,

ma MASRA e lontu den sma di e fertrow na En tapu,

nanga a bigi lobi fu En.

11Unu di bun ini Gado ai,

un prisiri nanga den sani di MASRA du,

un mus breiti

un bari fu prisiri,

un di e du Gado wani.