Sranan Tongo Bible 2016 (STB16)
31

Wan begi fu fertrow

311Gi a tiriman fu a singigrupu fu a tempel. Wan Psalm fu David.

2MASRA, na Yu mi e kibri,

no meki mi kon na syen noiti.

Ferlusu mi, bika Yu e du sani nanga leti.

3Arki a begi fu mi,

kon yepi mi es'esi.

De leki a Trangawan gi mi, pe mi kan kibri,

leki wan tranga kibripresi pe noti no kan miti mi.

4Iya, Yu na a Trangawan pe mi kan kibri,

a tranga kibripresi fu mi,

fu Yu nen ede Yu o tiri mi èn Yu o tyari mi.

5Yu o sorgu taki a ogri di den seti fu miti mi no miti mi,

bika na Yu mi e kibri.

6Mi e poti misrefi na ini Yu anu,

MASRA, Gado di de fu fertrow, na Yu e ferlusu mi.

7Mi no lobi den sma srefsrefi di e dini kruktu gado,

di no man du not'noti,

mi dati e fertrow tapu MASRA.

8Mi breiti èn mi sa prisiri srefsrefi fu a bigi lobi fu Yu,

bika Yu si a pina di mi e nyan,

Yu sabi fu a benawtu ini san mi de.

9Yu no meki mi fadon ini anu fu mi feyanti,

Yu opo pasi baka gi mi.

10MASRA, sori mi a bun-ati fu Yu,

bika mi de na ini benawtu,

sari meki den ai fu mi sweri,

mi sili nanga mi skin e swaki e gwe.

11Mi e psa a libi fu mi ini sari,

den yari fu mi ini soktu,

kruktudu meki taki krakti e gwe libi mi,

den bonyo fu mi srefi e swaki.

12Den di e feti mi e teki mi meki spotu,

spesrutu den birtisma fu mi.

Den sma di sabi mi e skreki te den si mi,

te sma si mi na strati den e lon gwe gi mi.

13Ala sma fergiti mi,

leki fa den e fergiti dedesma,

mi kmopo na ini den prakseri,

leki wan broko prapi.

14Mi e yere fa sma e taki safrisafri fu mi,

ogri e luru na alasei,

den sidon e kenki prakseri san den o du nanga mi,

den e meki mofo fa den o kiri mi.

15Ma tapu Yu mi e fertrow MASRA,

mi e taki: Yu na mi Gado.

16A fasi fa mi libi e waka de na ini Yu anu,

ferlusu mi fu a makti fu mi feyanti,

fu den di de na mi baka.

17Luku Yu knekti nanga prisiri,

èn ferlusu mi nanga a bigi lobi fu Yu.

18MASRA, na Yu mi e kari,

no meki mi kon na syen,

ma meki den ogri-ati sma kon na syen,

tapu den mofo èn meki den go na dedekondre.

19Tapu a mofo fu den di e lei,

den di abi heimemre

èn di e si den sma di bun ini Yu ai leki noti

te den e taki fu den.

20Yu poti wan bigi bun na wan sei

gi den sma di e lespeki Yu.

Yu poti en klari gi den di e kibri na Yu,

fu heri grontapu si en.

21Te libisma e span anu fu feti den,

Yu e kibri den pe Yusrefi de.

Yu e kibri den ini a tenti fu Yu

gi a kos'kosi fu den feyanti.

22MASRA fiti fu kisi grani,

bika a sori mi a bigi lobi fu En tapu wan ferwondru fasi

di mi ben de ini benawtu

leki te feyanti lontu wan foto fu alasei.

23Di mi ben frede sote mi ben prakseri taki:

“Yu yagi mi gwe, Yu no e luku mi moro.”

Ma Yu yere di mi begi trangatranga,

Yu yere di mi kari Yu fu Yu yepi mi.

24Un di e waka na MASRA baka, un lobi En,

MASRA e kibri den wan di e fertrow na En tapu,

ma A e gi den heimemre sma a strafu di den fiti fu kisi.

25Un alamala di e howpu tapu MASRA,

un mus abi dek'ati èn un no mus lasi ati.

32

Gado e gi pardon

321Fu David. Wan singi di mus leri wi wan sani.

A sma di kisi pardon fu den fowtu di a meki,

a sma di sondu no de fu si moro,

na wan blesi sma.

2A sma di MASRA no strafu fu den kruktudu fu en,

a sma di no e bedrigi,

na wan blesi sma.

3Bika solanga mi no ben taigi Yu taki mi sondu,

den bonyo fu mi ben e swaki e gwe,

dyeme mi ben e dyeme nomo heri dei.

4Bika dei nanga neti Yu ben e strafu mi,

mi krakti ben e gwe libi mi,

leki te watra e drei gwe ini tranga son. sela

5Ne mi taigi Yu taki mi sondu,

mi no kibri den kruktudu fu mi moro langa.

Mi ben taigi misrefi taki:

“Mi sa ferteri MASRA den fowtu di mi meki.”

Èn Yu gi mi pardon fu mi sondu. sela

6Dat' meki ibriwan di e waka na Yu baka mus begi,

den mus begi te den si taki den sondu.32:6 A Hebrewtekst fu a pisi disi no krin. Un kan puru a pisi disi so tu: solanga Yu de fu feni ete.

Te ogri e kon na den tapu leki wan bigi frudu,

a no sa wasi den gwe.

7Yu na mi kibripresi,

Yu e kibri mi gi benawtu.

Yu e lontu mi nanga singi di e taki fu ferlusu. sela

8“Mi o sori yu èn Mi o leri yu a pasi di yu mus waka.

Mi o gi yu rai, Mi ai o de na yu tapu.

9Yu no mus de leki wan asi noso wan buriki di no abi ferstan,

di e go soso pe den basi wani,

te a isri nanga a titei de ini den mofo,

dan ogri no sa miti yu.”

10Furu problema e miti ogri-ati sma,

ma MASRA e lontu den sma di e fertrow na En tapu,

nanga a bigi lobi fu En.

11Unu di bun ini Gado ai,

un prisiri nanga den sani di MASRA du,

un mus breiti

un bari fu prisiri,

un di e du Gado wani.

33

A wortu nanga a wroko fu Gado

331Un di bun ini Gado ai,

un prisiri fu den sani di MASRA du.

A fiti taki den di e libi leki fa a fiti

e singi fu prijse En.

2Un prijse MASRA nanga citer,

un prei a harp nanga tin snaar

èn un singi gi En.

3Un singi wan nyun singi gi En,

un prei so bun leki un man

èn un bari tu fu prijse En.

4Bika MASRA e du ala ten san A taki,

ala den sani di A e du

e sori taki sma kan bow na En tapu.

5A lobi te sani e du na tapu wan leti fasi,

èn te sma e libi leki fa a fiti.

Grontapu furu nanga a lobi fu MASRA.

6MASRA meki a heimel nanga En wortu,

nanga a bro fu En mofo

A meki a munkenki, a son nanga den stari.

7A e tyari a watra fu a se kon na wan,

a no man go no wan sei moro,

A e kibri den bigi watra poti na ini maksin.

8Heri grontapu mus lespeki MASRA,

ala libisma na grontapu mus abi bigi lespeki gi En.

9Bika na taki A taki

èn grontapu ben de,

na komanderi A komanderi

èn ala sani ben tnapu.

10MASRA e meki den sani di den folku poti fu du no go doro.

A e tapu kondre fu du san den ben besroiti fu du.

11Ma san MASRA poti fu du e go doro ala ten,

den besroiti di A teki de fu têgo.

12A pipel di abi MASRA leki A Gado fu en,

na wan blesi pipel,

a folku di A teki gi Ensrefi.

13MASRA e luku fu heimel,

A e luku ala libisma fin'fini.

14A e luku ala sma fu grontapu,

A e luku den fu a tanpresi fu En.

15Na En meki a ati fu den alamala,

èn A sabi san den e du.

16A no wan bigi legre e meki wan kownu wini feti,

a no a bigi krakti fu wan dyadya fetiman e ferlusu en.

17A no asi na a dyaranti tu fu wini feti,

a no a bigi krakti fu den e tyari ferlusu.

18Luku, den ai fu MASRA de tapu den wan di e lespeki En,

den di poti den howpu tapu a bigi lobi fu En,

19fu A ferlusu den fu dede,

èn fu hori den na libi ini angriten.

20Wi e ferwakti MASRA nanga ala san de ini wi,

na En na wi yepi èn na En e kibri wi.

21Iya, fu En ede un e prisiri nanga un heri ati,

iya, na tapu a santa nen fu En un e fertrow.

22Sori wi a bigi lobi fu Yu MASRA,

na tapu Yu wi e howpu.