Sranan Tongo Bible 2016 (STB16)
34

Masra e kibri den sma fu En

341Fu David, di a ben du na kownu Abimelek leki a law, fu a kownu ben kan yagi en gwe.

2Mi wani prijse MASRA, ala yuru fu a dei,

mi e gi En grani dorodoro.

3Nanga mi heri ati mi e prijse MASRA, fu den sani di A du,

meki den sma di trawan e si leki noti yere dati èn prisiri.

4Un gi MASRA grani nanga mi,

meki makandra un opo a nen fu En.

5Mi suku MASRA èn A piki mi,

A ferlusu mi fu ala sani di ben wani du mi ogri.

6Den sma di e poti den fertrow na En tapu,

e brenki fu prisiri,

syen no o de fu si tapu a fesi fu den.

7Mi, di de fu sari, kari MASRA,

A yere mi èn A ferlusu mi fu ala mi problema.

8A engel fu MASRA e kibri den sma di e lespeki MASRA,

èn A e ferlusu den.

9Pruberi en, dan yu o si taki MASRA bun,

a sma di e kibri na En na wan blesi sma.

10Un lespeki MASRA, unu di e dini En,

bika den di e lespeki En no e mankeri noti.

11Yongu lew e pina èn angri e kiri den,

Ma den sma di e suku MASRA,

abi ala san den abi fanowdu.

12Un kon, un di mi e gi leri,

mi o leri unu fa fu lespeki MASRA.

13Sortu wan fu unu no sa wani abi wan switi libi,

nanga wan langa libi?

14Dan un no mus taki takru nanga un mofo,

èn un no mus lei.

15Un no mus du ogri tu, ma un mus du bun,

èn un mus meki ala muiti fu sma libi ini freide nanga makandra.

16Den ai fu MASRA de na tapu den sma di bun ini En ai,

èn den yesi fu En de opo-opo te den e kari En.

17Ma nanga atibron MASRA e luku den sma di e du ogri,

A e luku den fu wai den puru na grontapu,

meki sma no memre den moro.

18Te den sma di bun ini MASRA ai e kari En,

A e yere,

èn A e ferlusu den ini ala den problema.

19MASRA de krosbei fu den sma di lasi ati,

èn A e ferlusu den sma di lasi ala howpu.

20Furu ogri e miti a sma di bun ini Gado ai,

ma MASRA e ferlusu en fu den alamala.

21Srefi den bonyo fu en A e kibri,

no wan fu den no e broko.

22Wan ogri-ati sma e dede fu a ogri di ensrefi e du,

èn den sma di no lobi den sma di bun ini Gado ai,

o kisi den strafu.

23Ma MASRA e ferlusu den knekti fu En,

no wan sma di e kibri na En o kisi strafu.

35

Wan begi gi yepi

351Fu David.

Taki gi mi MASRA, bika den wani fon mi nanga mofo,

feti den wan di e feti mi.

2Opo, grabu den schild fu Yu,

pikinwan nanga bigiwan,

kon ferlusu mi.

3Swai Yu lansri nanga a beiri fu Yu,

swai den go na den di de na mi baka,

gi mi a dyaranti taki Yu o ferlusu mi.

4Meki den sma di wani kiri mi kisi syen,

meki den fesi fadon,

meki den di wani du mi ogri hari go nanga baka,

den no mus man opo den ede fu syen.

5Meki den wai gwe leki aleisibuba nanga a winti,

te a engel fu MASRA naki den trowe.

6Meki a pasi fu den dungru èn grati,

te a engel fu MASRA e lon na den baka.

7Bika den seti wan ogri fu miti mi,

sondro taki mi du den wan sani,

den diki wan olo gi mi fu mi fadon na ini.

8Meki Masra puru den na pasi,

sondro fu den ferwakti en,

meki a ogri di den ben seti fu miti mi, miti densrefi,

meki densrefi fadon èn lasi den libi ini a olo di den diki.

9Mi e prisiri fu den sani di MASRA du,

mi breiti fu a ferlusu di A tyari.

10Kmoto fu a dipi fu mi ati mi e taki:

MASRA, suma de leki Yu?

Suma e ferlusu a mofinawan fu a wan di e pina en?

Suma e ferlusu a mofinawan nanga a pôtiwan,

fu a wan di e puru san den abi na den anu?

11Ogri-ati ketoigi e feti mi na krutu,

den e aksi mi sani di mi no sabi.

12Den e pai a bun di mi du den nanga ogri,

èn mi tnapu mi wawan.

13Ma mi fu mi sei, te den ben siki,

na mi lowkrosi mi ben weri,

mi ben e faste fu saka misrefi fesi Gado,

èn mi ben begi tapu mi kindi.

14Na so mi ben tyari misrefi,

leki den ben de mati nanga mi brada.

Na blaka mi ben e weri,

leki na gi mi m'ma mi ben e low,

èn mi ben saka mi ede te mi ben waka.

15Ma di mi ben suku fu fadon, den ben lafu,

dan den kon tnapu lontu mi,

èn den naki mi trowe sondro fu mi ben ferwakti en,

a gersi tak' na priti den ben wani priti mi.35:15 A Hebrewtekst fu a pisi disi no krin.

16Wan grupu ogri-ati sma di e teki mi meki spotu,

den ben e luku mi nanga atibron tapu den fesi.

17Masra, olanga Yu o luku ete sondro fu du wan sani?

Ferlusu mi fu a kiri di den wani kiri mi,

kibri a libi fu mi fu den lew dati.

18Dan mi sa gi Yu grani ini wan bigi konmakandra,

prijse Yu pe a heri folku fu Yu kon na wan.

19No meki den feyanti fu mi, den bedrigiman, prisiri fu mi ede,

no meki den di no man si mi na ai lafu mi.

20Bika den no sabi san wani taki freide,

den e sidon prakseri soso lei fu taigi den sma ini a kondre

di no de nanga dyugudyugu.

21Den e bari gi mi taki:

“Un si a ogri di yu du.”

22MASRA, Yu si san den du, no tan tiri,

tye MASRA, no tan fara fu mi.

23Mi Gado èn mi Masra, opo, du wan sani!

Feti a tori, fu mi fu mi kan kisi mi leti!

24MASRA, mi Gado, Yu di e du sani nanga leti,

meki mi kisi mi leti,

fu den no prisiri fu mi ede,

25fu den no kisi san den ati ben angri,

èn fu den no taki:

“Un puru en na pasi.”

26Meki den kisi syen,

den alamala di e prisiri nanga a ogri di miti mi,

den no mus man opo den ede fu syen.

Meki bigi syen naki den, meki den fesi fadon,

den di denki taki den betre moro mi.

27Ma den di ben angri fu si taki mi kisi mi leti,

meki den breiti, meki den prisiri.

Meki den tan taki:

“MASRA bigi,

èn A e prisiri te sani e go bun nanga En knekti.”

28Dan mi sa taki fu a du di Yu e du sani nanga leti,

èn heri dei mi sa prijse Yu.

36

A sondu fu libisma

361Gi a tiriman fu a singigrupu fu a tempel. Fu David, a knekti fu MASRA.

2Ogri-ati sma e arki san a sondu e taigi den dipi ini den ati.

den no e frede gi Gado srefsrefi.

3A sondu e meki taki den konsensi no e krutu den srefsrefi,

den no e si den kruktudu fu den,

èn den no abi no wan angri fu tapu nanga den.

4Na soso lei e kmopo na ini den mofo,

den sani di den e taki na fu poti trawan ini problema,

den no sabi moro san na koni nanga fu du bun.

5Tapu den bedi den e prakseri fa den o du ogri,

den e waka wan pasi di no bun,

den no wani tapu nanga a ogri.

6MASRA, a lobi fu Yu bigi moro leki wi kan ferstan,

a fertrow di sma kan fertrow na Yu tapu no de fu marki.

7Leki fa den moro hei bergi no e seki,

na so Yu e tan du sani nanga leti,

A fasi fa Yu e krutu sani dipi fu ferstan,

a dipi moro leki dipi se.

Yu e sorgu gi libisma nanga gi meti.

8Mi Gado, a bigi lobi fu Yu na wan diri sani,

libisma e kibri ondro den frei fu Yu.

9Yu e gi den fu nyan fu den bogobogo sani di de na ini Yu oso,

Yu e meki den dringi fu Yu liba di e gi prisiri.

10Bika na Yu e gi libi na ala sani di de,

ini a leti fu Yu wi e si a leti.

11Meki a bigi lobi fu Yu tan nanga den sma di sabi Yu,

meki a fasi fa Yu e du sani nanga leti

de nanga den sma di e du Yu wani.

12No meki heimemre sma waka abra mi,

no meki mi lon gi a anu fu ogri-ati sma.

13Drape den didon, den di e du kruktudu,

sma naki den trowe èn den no man opo baka.