Sranan Tongo Bible 2016 (STB16)
37

A libi fu bun sma nanga ogri-ati sma

371Fu David.

Un no mus nyan un niri nanga sma di e du kruktudu,

no dyarusu tu tapu sma di e du trawan ogri.

2Bika den e dede gwe es'esi,

leki fa grasi e drei gwe es'esi,

leki fa sani di prani e flaw gwe es'esi

te den no feni watra.

3Ma un mus fertrow tapu MASRA èn un du san bun,

un libi ini a kondre pe ogri no sa kon na un pasi.

4Un suku un prisiri na MASRA,

dan A o gi un san un ati e angri.

5Poti yu libi ini a anu fu MASRA

èn fertrow na En tapu,

A o yepi unu.

6Leki fa a mamanten son de fu si gi ala sma te a e opo,

na so A o meki a de fu si tu gi ala sma taki un no du ogri,

èn leki fa a son e de krin fu si te bakadina,

na so A o meki a de krin fu si tu taki un abi leti.

7Un de tiri èn un wakti tapu MASRA,

un no nyan un niri nanga den sma di abi en bun ini a libi,

den di e du sani tapu wan ogri fasi.

8Un o kisi atibron gi den,

un no rigeri nanga den,

un no nyan un niri tu,

den sani dati e tyari soso problema.

9Bika sma di e du ogri o lasi den libi,

ma den di poti den howpu tapu MASRA,

o kisi a kondre.

10No langa moro,

dan den ogri-ati sma no o de moro,

un o luku fu den,

ma den no o de fu si moro.

11Ma den sma di trawan e si fu noti o kisi a kondre,

na den o libi switi, ini freide,

èn den o abi bogobogo fu ala san den abi fanowdu.

12Ogri-ati sma e sidon prakseri

fu du den sma ogri di bun ini Gado ai,

den e luku nanga atibron tapu den fesi.

13Ma Masra e lafu den,

A e si a dei kba pe den o lasi den libi.

14Ogri-ati sma e puru den deigri kon na doro,

den e hari den bo fu den span,

fu kiri den pôtiwan nanga den mofinawan,

èn fu srakti den di e libi leki fa a fiti.

15Ma a deigri fu den sa boro den eigi ati,

èn den bo fu den sa broko.

16A pikinso fu wan sma di bun ini Gado ai,

bun moro a gudu fu furu ogri-ati sma.

17bika a makti fu ogri-ati sma o broko,

ma MASRA e kraka den sma di bun ini En ai.

18MASRA e sorgu ala dei gi den sma tapu san trawan no man sori finga,

a kondre fu den o tan fu têgo.

19Ini tranga ten den no o kon na syen,

ini angriten den o abi nyanyan.

20Ma den ogri-ati sma o dede fosi den yuru kisi,

den feyanti fu MASRA de leki den bromki fu a wei

den o wai gwe leki smoko.

21Ogri-ati sma e leni èn den no e gi baka,

ma sma di bun ini Gado ai e gi fu di den abi sari-ati.

22Den sma di Masra blesi o kisi a kondre,

ma den di A fluku o lasi den libi.

23Te MASRA abi prisiri nanga a libi fu wan sma,

A e meki a sma dati tnapu tranga.

24Te sowan sma misi futu a no e fadon,

bika MASRA e hori en na en anu.

25Mi ben yongu, now mi kon owru,

ma mi no si ete pe Gado gwe libi wan sma di bun ini En ai,

noso taki den pikin nanga bakapikin fu en e pina nyanyan.

26Ala leisi baka a sma di bun ini Gado ai e gi

fu di a abi sari-ati,

a e tan leni sma di e aksi en

èn gi den pikin nanga bakapikin fu en a de wan blesi.

27Un no mus du ogri, ma un mus du bun,

dan un o tan libi fu têgo ini a kondre.

28Bika MASRA lobi te sani e psa na tapu wan leti fasi,

èn A no e gwe libi den sma di e tan waka na en baka.

Fu têgo A e kibri den,

ma A e puru den pikin nanga bakapikin fu ogri-ati sma na pasi.

29Na den sma di bun ini Gado ai o kisi a kondre,

na den o libi drape fu têgo.

30Wan sma di bun ini Gado ai e taki koni,

a e taki sani tapu wan leti fasi.

31A wèt fu Gado de ini en ati,

a no e misi futu.

32A ogri-ati sma e seti luru gi a sma di bun ini Gado ai,

a e suku wan okasi fu kiri en.

33Ma MASRA no e gi en abra ini en makti.

Te den go na fesi krutu,

A e sorgu taki a sma di bun ini En ai no e kisi strafu.

34Poti yu howpu tapu MASRA

èn tan tapu En pasi,

dan A o gi yu grani fu yu kan kisi a kondre,

èn nanga prisiri yu o luku fa A o puru den ogri-ati sma na pasi.

35Mi si wan ogri-ati sma,

wan di e du sani nanga tranga,

mi si fa a ben e gro kon,

leki wan bon ini bun doti.37:35 A Hebrewtekst fu a pisi disi no krin.

36Di mi psa wan tra leisi a no ben de moro,

mi suku en, ma a no ben de fu feni.

37Ma teki yu ten luku a sma di e tan waka baka gado,

hori ai na tapu a sma di e libi leki fa a fiti,

bika na sma di lobi freide o abi bakapikin.

38Ma den sma di e broko a wèt fu Gado,

o lasi den libi,

den bakapikin fu den ogri-ati sma

o dede gwe.

39Na MASRA e ferlusu den sma di bun ini En ai,

na En den e go kibri te den de na ini benawtu.

40MASRA e yepi den èn A e ferlusu den,

A e meki den kmopo ini a makti fu den ogri-ati sma,

A e ferlusu den,

bika na En den e kibri.