Sranan Tongo Bible 2016 (STB16)
39

A libi syatu

391Gi a tiriman fu a singigrupu fu a tempel. Gi Yedutun. Wan psalm fu David.

2Mi ben prakseri na misrefi taki:

Mi o luku fin'fini fa mi o tyari misrefi,

fu mi no sondu nanga mi mofo.

Mi o kwinsi mi mofo tapu,

solanga den ogri-ati sma tnapu na mi fesi.

3Mi hori mi mofo tu, no wan wortu mi no taki

mi tan tiri, wan bun sani srefi mi no taki.

Ma mi no ben e firi bun fu inisei.

4A ben e bron na mi inisei fu taki wan sani,

a gersi wan faya ben leti na mi inisei,

dan mi bigin taki:

5“MASRA, meki mi sabi oten a libi fu mi e kon na wan kba,

meki mi sabi olanga mi abi fu libi ete,

meki mi ferstan taki na psa a libi fu mi e psa gwe.

6Mi sabi taki na wan syatu ten Yu gi mi fu libi,

taki den yari fu mi no de not'noti gi Yu,

iya, a libi fu iniwan sma de leki wan bro, sela

7leki wan schaduw a e psa gwe.

Libisma e feti baka sani di abi no wan warti,

den e tyari gudu kon na wan sondro fu sabi gi suma.”

8We, dan san mi mus ferwakti MASRA?

Ala mi howpu de na Yu tapu.

9Fri mi fu ala mi sondu,

no meki don sma teki mi e meki spotu.

10Mi no man taki noti, mi e hori mi mofo,

bika Yu e du san fiti.

11Ma tapu fu fon mi so,

mi o dede efu Yu e tan naki mi so.

12Te Yu e piri ai gi wan sma èn strafu en fu en kruktudu,

Yu e pori ala sani di a lobi,

leki fa kakalaka e pori krosi.

Iya, libisma no de noti moro leki wan bro. sela

13MASRA, Yere mi begi,

arki te mi e kari Yu,

du wan sani te Yu e si fa mi e krei,

bika mi de leki wan doroseisma na Yu,

leki wan sma di drape fu wan syatu pisten nomo,

leki ala den afo fu mi.

14No luku mi nanga atibron moro,

dan mi kan prisiri baka,

fosi mi dede gwe,

fosi mi no de moro.