Sranan Tongo Bible 2016 (STB16)
41

A begi fu wan sikisma

411Gi a tiriman fu a singigrupu fu a tempel. Wan Psalm fu David.

2A sma di e sorgu gi pôtisma,

na wan blesi sma,

te bigi problema miti en,

MASRA o ferlusu en.

3MASRA o kibri en èn hori en na libi,

den kondreman fu en o gi en grani.

Yu no o gi den feyanti fu en a okasi fu du en wan sani.

4MASRA o yepi en te a de na sikibedi.

Yu o meki taki a tnapu baka tapu en futu.

5Mi taki:

“MASRA, Mi sondu,

ma sori mi a bun-ati fu Yu, dresi mi.”

6Den feyanti fu mi e winsi fu ogri miti mi,

den e taki:

“Oten a o dede?

Oten a nen fu en o kmopo na grontapu?”

7Te wan sma kon luku mi, a e taki switi nanga mi,

ma en ati furu nanga ogri.

Te a de na strati a e taki san de ini en ati.

8Ala den sma di no man si mi na ai e taki safrisafri fu mi,

den e winsi fu a moro bigi ogri miti mi.

9Den e taki:

“A siki disi di a abi o kiri en.

Pe a didon a no o opo moro.”

10Srefi a moro bun mati fu mi,

mi mati tapu san mi ben e fertrow,

èn di ben e nyan nanga mi,

drai en baka gi mi.

11Ma Yu, MASRA, sori mi a bun-ati fu Yu,

meki mi tnapu baka na tapu mi futu,

dan mi o pai den baka fu den sani di den du.

12Na so mi o sabi taki Yu abi prisiri nanga mi:

te den feyanti fu mi no man taki tak' den wini mi.

13Ma mi dati, Yu e kraka mi fu di mi no du ogri,

fu têgo Yu o gi mi wan presi krosbei fu Yu.

14Prijse MASRA, a Gado fu Israel,

fu têgo èn ala ten.

Amen, iya, na so a de.