Sranan Tongo Bible 2016 (STB16)
42

A angri gi Gado

421Gi a tiriman fu a singigrupu fu a tempel. Wan singi fu den Korakitisma di mus leri wi wan sani.

2Tye Gado,

leki fa wan dia e angri fu watra,

na so mi e angri fu Yu nanga mi heri ati.

3Mi e angri trutru fu Gado,

fu a libi Gado.

Oten mi sa man go èn tnapu baka na En fesi?

4Na den watra-ai fu mi, mi e dringi,

dei nanga neti,

bika sma e aksi mi heri dei taki:

“Pe a Gado fu yu de?”

5Mi ati e broko te mi e prakseri

fa mi ben e waka na ini wan bigi grupu makandra nanga trawan,

fa mi ben e waka na den fesi go na a oso fu Gado,

fa un ben e bari fu prisiri

èn singi fu gi Gado tangi,

leki wan bigi grupu di e go na wan fesa.

6Fu sanede meki mi e sari so?

Fu sanede meki sani e dangra mi so?

Mi o poti mi howpu tapu Gado,

bika a ten e kon pe mi o prijse En baka,

a Ferlusuman èn Gado fu mi!

7Mi e sari sote,

dat' meki mi e prakseri Yu,

dyaso, ini a kondre fu a Yordanliba,

na a Hermonbergi nanga a Misarbergi.

8Leki fa a watra fu wan sula e lon nanga bigi babari,

na so den problema e wasi kon na mi tapu,

leki bigi skwala den e fadon na mi tapu.

9Deiten MASRA e meki mi si a bigi lobi fu En,

te neti mi e singi wan singi gi En,

leki wan begi gi a Gado di gi mi libi.

10Mi wani taigi Gado, a Trangawan pe mi e kibri, taki:

Fu sanede Yu fergiti mi so?

Fu sanede mi mus sari leki wan sma di e low,

fu di den feyanti fu mi de nomo na mi baka?

11Mi e firi en te na ini mi bonyo,

te den sma di e feti mi e dreigi mi,

te den e aksi mi heri dei taki:

Pe a Gado fu yu de?

12Fu sanede meki mi e sari so?

Fu sanede meki sani e dangra mi so?

Mi o poti mi howpu tapu Gado,

bika a ten e kon pe mi o prijse En baka,

a Ferlusuman èn Gado fu mi!