A begi fu wan sikisma

41¹Gi a tiriman fu a singigrupu fu a tempel. Wan Psalm fu David.

²A sma di e sorgu gi pôtisma,

na wan blesi sma,

te bigi problema miti en,

MASRA o ferlusu en.

³MASRA o kibri en èn hori en na libi,

den kondreman fu en o gi en grani.

Yu no o gi den feyanti fu en a okasi fu du en wan sani.

⁴MASRA o yepi en te a de na sikibedi.

Yu o meki taki a tnapu baka tapu en futu.

⁵Mi taki:

“MASRA, Mi sondu,

ma sori mi a bun-ati fu Yu, dresi mi.”

⁶Den feyanti fu mi e winsi fu ogri miti mi,

den e taki:

“Oten a o dede?

Oten a nen fu en o kmopo na grontapu?”

⁷Te wan sma kon luku mi, a e taki switi nanga mi,

ma en ati furu nanga ogri.

Te a de na strati a e taki san de ini en ati.

⁸Ala den sma di no man si mi na ai e taki safrisafri fu mi,

den e winsi fu a moro bigi ogri miti mi.

⁹Den e taki:

“A siki disi di a abi o kiri en.

Pe a didon a no o opo moro.”

¹⁰Srefi a moro bun mati fu mi,

mi mati tapu san mi ben e fertrow,

èn di ben e nyan nanga mi,

drai en baka gi mi.

¹¹Ma Yu, MASRA, sori mi a bun-ati fu Yu,

meki mi tnapu baka na tapu mi futu,

dan mi o pai den baka fu den sani di den du.

¹²Na so mi o sabi taki Yu abi prisiri nanga mi:

te den feyanti fu mi no man taki tak' den wini mi.

¹³Ma mi dati, Yu e kraka mi fu di mi no du ogri,

fu têgo Yu o gi mi wan presi krosbei fu Yu.

¹⁴Prijse MASRA, a Gado fu Israel,

fu têgo èn ala ten.

Amen, iya, na so a de.

A angri gi Gado

42¹Gi a tiriman fu a singigrupu fu a tempel. Wan singi fu den Korakitisma di mus leri wi wan sani.

²Tye Gado,

leki fa wan dia e angri fu watra,

na so mi e angri fu Yu nanga mi heri ati.

³Mi e angri trutru fu Gado,

fu a libi Gado.

Oten mi sa man go èn tnapu baka na En fesi?

⁴Na den watra-ai fu mi, mi e dringi,

dei nanga neti,

bika sma e aksi mi heri dei taki:

“Pe a Gado fu yu de?”

⁵Mi ati e broko te mi e prakseri

fa mi ben e waka na ini wan bigi grupu makandra nanga trawan,

fa mi ben e waka na den fesi go na a oso fu Gado,

fa un ben e bari fu prisiri

èn singi fu gi Gado tangi,

leki wan bigi grupu di e go na wan fesa.

⁶Fu sanede meki mi e sari so?

Fu sanede meki sani e dangra mi so?

Mi o poti mi howpu tapu Gado,

bika a ten e kon pe mi o prijse En baka,

a Ferlusuman èn Gado fu mi!

⁷Mi e sari sote,

dat' meki mi e prakseri Yu,

dyaso, ini a kondre fu a Yordanliba,

na a Hermonbergi nanga a Misarbergi.

⁸Leki fa a watra fu wan sula e lon nanga bigi babari,

na so den problema e wasi kon na mi tapu,

leki bigi skwala den e fadon na mi tapu.

⁹Deiten MASRA e meki mi si a bigi lobi fu En,

te neti mi e singi wan singi gi En,

leki wan begi gi a Gado di gi mi libi.

¹⁰Mi wani taigi Gado, a Trangawan pe mi e kibri, taki:

Fu sanede Yu fergiti mi so?

Fu sanede mi mus sari leki wan sma di e low,

fu di den feyanti fu mi de nomo na mi baka?

¹¹Mi e firi en te na ini mi bonyo,

te den sma di e feti mi e dreigi mi,

te den e aksi mi heri dei taki:

Pe a Gado fu yu de?

¹²Fu sanede meki mi e sari so?

Fu sanede meki sani e dangra mi so?

Mi o poti mi howpu tapu Gado,

bika a ten e kon pe mi o prijse En baka,

a Ferlusuman èn Gado fu mi!

43¹Tye mi Gado, meki mi kisi mi leti,

feti gi mi fesi krutu nanga a pipel di no e dini Yu.

Puru mi ini anu fu den di e bedrigi,

èn di e du kruktu.

²Bika Yu de a Gado pe mi kan go kibri,

fu sanede Yu no e luku mi moro?

Fu sanede mi mus sari leki wan sma di e low,

fu di den feyanti fu mi de nomo na mi baka?

³Seni a leti nanga a tru fu Yu,

fu den tiri mi,

fu den tyari mi go na a santa bergi fu Yu,

na a presi pe Yu e tan.

⁴Dan mi kan go baka na a altari fu Gado,

na Yu, Gado, di e meki mi prisiri srefsrefi,

èn prijse Yu nanga a citer,

tye Gado, mi Gado!

⁵Fu sanede meki mi e sari so?

Fu sanede meki sani e dangra mi so?

Mi o poti mi howpu tapu Gado,

bika a ten e kon pe mi o prijse En baka,

a Ferlusuman èn Gado fu mi!