Sranan Tongo Bible 2016 (STB16)
48

A foto fu Gado

481Wan Singi. Wan psalm fu den Korakitisma.

2MASRA bigi, A fiti fu kisi ala grani,

ini a foto fu wi Gado, tapu a santa bergi fu En.

3Sionbergi, farawe na noordsei,

a hei èn a moi sote,

wan prisiri gi heri grontapu,

a foto fu a bigi kownu.

4Na ini den tranga kibripresi fu a foto,

den sma sabi taki den no abi fu frede noti,

bika Gado srefi na den kibripresi.

5Bika luku, kownu kon na wan,

makandra den hari go drape fu feti.

6Ma di den si en, den skreki,

den bruya èn den lon panya.

7Frede naki den,

leki den krampu fu wan uma di e meki wan pikin,

8leki fa a tranga winti e naki den sipi fu Tarsis.

9Ini a foto fu MASRA fu ala sani,

ini a foto fu wi Gado, un si san wi ben yere,

taki Gado e hori a foto tnapu fu têgo. sela

10Gado, wi e memre a bigi lobi fu Yu

ini a tempel fu Yu.

11Gado, leki fa te na a kba fu grontapu

sma yere fu den bigi sani di Yu du,

na so a de tu nanga a grani di sma e gi Yu.

Yu e tiri na tapu wan leti fasi.

12Meki a pipel fu Sion prisiri,

meki den sma fu Yuda bari fu prisiri,

bika Yu e krutu sani na tapu wan leti fasi.

13Un waka lontu Sion,

un teri ala den toren fu en.

14Un luku den tranga skotu fu en bun,

un koiri psa ini den tranga kibripresi,

fu un kan ferteri den pikin di e kon na un baka taki:

15“Na so Gado de,

a Gado fu wi, fu têgo èn ala ten.

Na En e tiri wi, fu têgo.”

49

Moni a no ala sani

491Gi a tiriman fu a singigrupu fu a tempel. Fu den Korakitisma. Wan Psalm.

2Ala folku, un arki!

Ala sma fu grontapu, un kaka un yesi,

3pikinman nanga bigiman fu kondre,

guduman nanga pôtiwan.

4A mofo fu mi o taki koni sani,

den sani di mi e sidon prakseri na fu gi ferstan.

5Mi ben lobi arki koni leri,

nanga a poku fu wan citer

mi o tyari wan kibritori kon na krin.

6Fu sanede mi bo frede te sani no e go bun,

te den takru-ati sma di wani du mi ogri lontu mi?

7Den e bow na tapu a furu moni di den abi,

èn den e meki bigi fu a furu gudu fu den.

8Ma no wan sma kan pai gi wan trawan fu a tan na libi,

gi en eigi libi srefi a no o man pai Gado wan moni.

9A moni di wan sma mus pai gi a libi fu en furu tumsi.

En heri libi langa a no o man kba pai,

10fu a kan tan libi fu têgo,

fu a no dede.

11Un e si taki koni sma e dede,

taki don sma nanga sma di no abi ferstan e lasi den libi,

èn taki ala a moni fu den e tan na baka gi trawan.

12A grebi na den têgo tanpresi,

den oso fu alaten,

awinsi den ben abi furu gron na tapu den nen.

13Libisma nanga ala en gudu no tan fu têgo,

a o dede gwe leki den meti.

14Disi na san o miti den sma di e fertrow na tapu densrefi,

a kbapisi fu den di e prisiri nanga den sani di densrefi taki. sela

15Leki fa wan skapuman e tyari skapu go na wei,

na so dede o tyari den go na dedekondre.

Te dei opo den sma di e libi leki fa a fiti

e trapu den grebi,

den skin e pori gwe na ini dedekondre,

sondro fu feni rostu.49:15 A Hebrewtekst fu a pisi disi no krin.

16Ma Gado sa ferlusu mi ini a makti fu dedekondre,

A o opo mi puru drape. sela

17No meki a dangra yu te wan sma e kon gudu,

efu a abi wan moro bigi oso nanga moro gudu.

18Bika te a dede, noti fu den sani dati a e tyari gwe,

a gudu fu en no e go na en baka.

19Awinsi a e gi ensrefi grani fu a libi fu en,

awinsi sma e gi en grani tu fu a fasi fa sani e go bun nanga en,

20a o go na den bigisma fu en nomonomo,

drape pe den no e si faya noiti moro.

21Awinsi fa wan sma gudu,

ma efu a no abi ferstan,

na leki den meti a o dede gwe.

50

A tru fasi fu dini Gado

501Wan psalm fu Asaf.

A Gado fu ala gado, MASRA, e taki,

A e kari heri grontapu kon na wan,

fu a sei pe a son e opo go te pe a e saka.

2Fu Sion, a foto di moi psa marki,

Gado e kon ini wan krin faya.

3A Gado fu wi e kon èn A no o tan tiri.

Wan faya di e bron ala sani de na En fesi,

wan bun tranga winti e wai lontu En.

4Gado e kari heimel nanga grontapu kon,

fu luku fa A o krutu a pipel fu En.

5A taki: “Tyari den sma kon di tan waka na Mi baka,

den wan di meki wan ferbontu nanga Mi nanga wan ofrandi.”

6Heimel e taki fa Gado e du sani nanga leti,

bika Ensrefi na a krutubakra. sela

7“Mi pipel arki, bika Mi o taki,

Israel, Mi o taki sortu ogri yu du,

Mi na Gado, a Gado fu yu.

8Mi no e krutu unu fu den ofrandi fu unu,

bika dorodoro un e bron meti gi Mi leki ofrandi.

9Mi no abi den bulu fu a kawpen fu unu fanowdu,

noso den bokoboko fu den koi fu unu.

10Bika ala den meti fu a busi, na Mi abi den,

den meti tapu den dusundusun bergi.

11Mi sabi ala den fowru di e libi tapu den bergi,

ala san e beweigi ini den wei na fu Mi.

12Efu angri ben e kiri Mi, Mi no ben o taigi unu,

bika grontapu nanga ala san de na en tapu na fu Mi.

13Mi no e nyan a meti fu bulu

èn Mi no e dringi a brudu fu bokoboko.

14Gi Gado tangi leki wan ofrandi,

èn un du san un pramisi, a Moro Hei Gado.

15Un kari Mi te un de na ini benawtu,

dan Mi sa ferlusu unu èn un sa gi Mi grani.” sela

16Ma den ogri-ati sma Gado e taigi taki:

“Fu sanede un e taki fu den sani fu Mi nomo?

Fu sanede un e taki fu a ferbontu fu Mi?

17Un no lobi srefsrefi te Mi e sori un tapu un fowtu,

èn un e poti den sani di Mi komanderi unu na wan sei.

18Un e si fufuruman leki un mati,

èn un lobi teki waka nanga huruman.

19Un e taki takru fu trawan nanga un mofo,

a tongo fu unu e bedrigi go nanga langa.

20Un e sidon fesi krutu e taki tak' un brada du ogri,

un e broko a manpikin fu un eigi m'ma saka.

21Ala den sani disi un du, ma Mi no taki noti.

Kande un e prakseri taki Mi de leki unu.

Ma Mi e warskow unu èn Mi e sori unu tapu ala den sani di un du.

22Unu di no e teri Mi, un mus sabi disi,

noso Mi o priti unu,

èn no wan sma o man ferlusu unu:

23a sma di e gi Mi tangi leki wan ofrandi,

e gi Mi grani

èn a o opo pasi gi Mi fu Mi meki a si a yepi fu Gado.”