Sranan Tongo Bible 2016 (STB16)
51

Wan begi fu kisi pardon

511Gi a tiriman fu a singigrupu fu a tempel. Wan psalm fu David, 2baka di Natan ben kon na en, fu di a ben go na bedi nanga Batseba.

3Sori mi Yu bun-ati mi Gado, fu Yu lobi ede,

Sori mi Yu bigi sari-ati èn figi den ogri fu mi puru.

4Wasi mi kruktudu puru,

krin mi fu ala mi sondu.

5Bika mi sabi taki mi du ogri,

mi e si a sondu di mi du dorodoro na mi fesi.

6Na Yu fesi, na Yu fesi wawan mi sondu,

mi du san no bun ini Yu ai.

Yu krutu mi soleki fa a fiti,

Yu gi mi a yoisti strafu.

7Luku, di mi gebore kruktudu ben de ini mi kba,

sondu ben de ini mi kba di mi m'ma hori bere fu mi.

8Ma Yu wani taki tru mus de na ini mi,

Yu ben gi mi koni, dipi ini mi ati.

9Puru ala mi sondu, dan mi sa krin,

Wasi mi, dan mi sa weti moro katun.

10Meki mi prisiri en breiti baka,

meki den bonyo di Yu ben broko prisiri baka.

11No luku den sondu fu mi moro,

figi ala den kruktudu fu mi puru.

12Gi mi wan ati, Gado, di wani dini Yu wawan,

gi mi wan nyun yeye di e anbegi Yu wawan.

13No yagi mi puru na Yu fesi,

no puru Yu santa Yeye fu mi tu.

14Gi mi a prisiri baka di mi ben abi di Yu ferlusu mi,

kraka mi nanga wan tranga yeye.

15Dan mi sa leri den sma di e broko a wèt

fa Yu wani taki den mus libi,

fu sondusma kan drai kon dini Yu.

16Gado, Yu na a Gado di e ferlusu mi,

kibri mi fu mi no lasi mi libi na tapu wan ogri-ati fasi.

Dan mi sa prisiri èn ferteri fa Yu e du sani nanga leti.

17Masra, yepi mi fu mi kan opo mi mofo,

fu mi kan gi Yu grani.

18Bika a no den meti di mi e srakti gi Yu leki ofrandi Yu wani so,

Yu no abi prisiri nanga den meti di mi e bron leki ofrandi gi Yu.

19San Yu wani mi Gado na wan ati nanga sakafasi.

Gado, wan broko ati di e sari fu den sondu di a du,

Yu no e poti na wan sei.

20Sori Sion Yu bunfasi èn du en bun,

bow den skotu fu Yerusalem baka.

21Dan wi sa tyari den ofrandi leki fa a fiti,

di sa gi Yu prisiri baka,

meti di bron her'heri.

Dan sma sa tyari bulu leki ofrandi tapu Yu altari.

52

Gado o pai a sma baka di du mi ogri

521Gi a tiriman fu a singigrupu fu a tempel. Wan singi fu David di mus leri wi wan sani. 2A singi skrifi baka di Doweg, a Edomitiman, go taigi Saul taki: “David de ini a oso fu Akimelek.”

3Yu di e si yusrefi leki wan dyadyaman,

fu sanede yu e meki bigi fu a ogri di yu e du?

A lobi fu Gado e tan dei fu dei.

4Yu bedrigiman yu,

yu wroko na fu poti trawan na ini bigi problema,

a tongo fu yu gersi wan srapu nefi.

5Yu lobi ogri moro leki bun,

yu e si lei hei moro tru. sela

6Yu lobi taigi sma hat'hati sani,

yu lobi bedrigi tu.

7Ma Gado o broko yu fu têgo.

A o naki yu trowe èn srepi yu puru ini a tenti,

A o rutu yu puru tu fu a kondre fu den libiwan. sela

8Den wan di bun ini Gado ai o si dati,

den o ferwondru èn den o lafu taki:

9“Luku a dyadyaman,

a man di no ben si Gado leki en kibripresi,

ma di ben e fertrow na tapu a bigi gudu fu en.

Ma a sani tapu san a ben fertrow tron en ongoloku.”

10Ma mi dati de leki wan grun oleifbon,

di e gro na a oso fu Gado.

Bika mi e fertrow na tapu a lobi fu Gado,

fu têgo èn ala ten.

11Fu têgo mi sa gi Yu tangi fu san Yu du.

Mi sa tan howpu na Yu tapu

na mindri fu den sma di e tan waka na Yu baka,

bika Yu bun.

53

A ogri-ati fu libisma

531Gi a tiriman fu a singigrupu fu a tempel. A mus singi a srefi fasi leki: Makalat.

2Don sma e prakseri taki:

Gado no de.

Den e du soso ogri nanga groskin sani,

no wan fu den e libi leki fa a fiti.

3Gado e luku fu heimel tapu libisma.

A e luku fu si efu wan de di koni,

efu wan de di e suku Gado.

4Den alamala kmopo fu a leti pasi,

den ati pori srefsrefi.

No wan fu den e libi soleki fa a fiti, no wan.

5A gersi leki den sma di no e du Gado wani, no e ferstan sani.

Den e nyan a pipel fu mi leki na brede den e nyan.

Gado dati den no e begi srefsrefi.

6Pikinso ete, dan wan hebi frede o teki den,

noiti bifo den ben frede so.

Bika Gado o kiri den feyanti fu yu,

A o panya den bonyo fu den na ala sei.

Den o kisi syen, bika Gado poti den na wan sei.

7Tye, efu ferlusu ben kan kmopo ini Sion gi Israel.

Efu Gado kenki a fasi fa sani e go nanga en folku,

dan den bakapikin fu Yakob sa breiti, a pipel fu Israel sa prisiri.