Sranan Tongo Bible 2016 (STB16)
59

Kibri mi gi mi feyanti

591Gi a tiriman fu a singigrupu fu a tempel. A mus singi a srefi fasi leki: No meki mi go lasi. Fu David. Wan begi, di Saul ben seni sma go hori wakti na a oso fu David fu kiri en.

2Tye mi Gado, ferlusu mi fu mi feyanti,

kibri mi gi den di e feti mi.

3Ferlusu mi fu den di e du kruktudu,

puru mi ini a anu fu den kiriman.

4Bika luku, den e luru mi fu kiri mi,

den trangawan e kon na mi tapu fu feti mi,

sondro taki mi du ogri,

sondro taki mi sondu, MASRA.

5Den e lon kon na mi tapu fu feti mi,

sondro taki mi du kruktudu.

Opo Gado, kon yepi mi èn si fu Yusrefi.

6Yu, MASRA, Gado fu ala sani,

Gado fu Israel,

opo, kon strafu ala den folku

no sari den ogri sma di seri unu. sela

7Ala neti den e drai kon baka,

den e krei leki dagu,

den e waka lontu ini a foto.

8Arki, fa den e broko mi saka nanga den sani di den e taki,

den wortu fu den e koti leki nefi,

den e prakseri taki: no wan sma e yere san wi e taki.

9Ma Yu, MASRA, e lafu den,

Yu e teki den folku meki spotu.

10Yu na mi krakti,

na tapu Yu mi hori mi ai,

bika Yu na mi tranga kibripresi.

11Gado o kon yepi mi nanga a bigi lobi fu En,

Gado o meki taki nanga prisiri mi o luku den sma di e pina mi.

12No kiri den ete,

noso a pipel fu mi kan fergiti fa Yu e strafu Yu feyanti.

Meki den waka lontu nomo,

naki den trowe nanga Yu krakti,

Masra, Yu de leki wan schild gi wi.

13Den e sondu nanga den sani di den e taki,

nanga den wortu di e kmoto ini den mofo.

Meki den tan fasi ini a heimemre fu den,

fu a fluku di den e fluku,

nanga fu a lei di den e lei.

14Kiri den na ini Yu atibron,

kiri den alamala.

Dan den sa sabi taki Gado na kownu ini Yakob,

nanga heri grontapu. sela

15Ala neti den e drai kon baka,

den e krei leki dagu,

den e waka lontu ini a foto.

16Den e waka lontu e suku nyanyan,

den e knoru efu den no feni nofo fu nyan.

17Ma mi sa singi fu a krakti fu Yu,

te mamanten mi sa prisiri fu a bigi lobi fu Yu,

bika Yu de wan tranga kibripresi gi mi,

wan presi pe mi kan lon go

te mi de na ini benawtu.

18Yu na mi krakti, gi Yu mi e singi.

Gado na mi tranga kibripresi,

a Gado di e sori mi a bigi lobi fu En.

60

Wan begi fu ferlusu

601Gi a tiriman fu a singigrupu fu a tempel. A mus singi a srefi fasi leki: A leili fu a ferbontu. 2Wan begi fu David, di mus leri wi wan sani. David begi a begi disi di a ben feti nanga den sma fu Aram di ben kmoto fu Mesopotamia nanga Soba, nanga di Yoab ben kiri twarfu dusun Edomitiman ini a Sowtudal di a ben e drai kon baka.

3Tye Gado, Yu poti wi na wan sei,

Yu broko psa na wi mindri,

Yu ati ben bron na wi tapu.

Ma tye, drai kon baka na wi.

4Yu seki a kondre, a gron priti.

Meki a gron kon bun baka, bika ala sani e seki.

5Yu meki a pipel fu Yu psa tranga ten,

Yu gi wi win fu dringi di drai un ede.

6Yu gi wan marki na den sma di e lespeki Yu,

fu den kmoto gi den peiri fu den bo. sela

7Ferlusu den lobiwan fu Yu,

meki a krakti fu Yu gi wi a wini,

piki wi.

8Gado tak' na ini En santa presi taki:

“Mi o prisiri te Mi o prati a kontren fu Sikem,

te Mi o marki a Sukotdal.

9Gilead nanga Manase, na Mi abi den,

Efraim na a fet'ati di Mi weri tapu Mi ede,

Yuda a tiki nanga san Mi rigeri.

10Moab na a beki pe Mi e wasi,

tapu Edom mi fringi Mi susu,

Mi e bari fu di Mi wini Filistea.”

11Suma sa tyari mi go na a tranga foto?

Suma sa tyari mi go na Edom?

12Na Yu, Gado, di ben poti wi na wan sei,

Na Yu, Gado, o hari go nanga a legre fu wi?

13Yepi wi nanga den feyanti fu wi,

bika a yepi fu libisma na noti.

14Nanga Gado wi sa wini,

bika Ensrefi sa traputrapu den feyanti fu wi.

61

Gado na mi kibripresi

611Gi a tiriman fu a singigrupu fu a tempel. A Psalm disi mus singi nanga a instrumenti di abi snaar. Fu David.

2Tye Gado, yere a krei di mi e krei,

arki a begi fu mi.

3Mi e kari Yu fu wan fara kondre,

mi ati no man tyari en moro.

Tyari mi go poti tapu a bergiston,

di misrefi no man kren.

4Bika Yu na mi kibripresi,

a tranga toren gi a feyanti.

5Meki mi tan fu têgo ini a tenti fu Yu,

meki mi kibri drape ondro den frei fu Yu. sela

6Bika Yu, Gado, Yu yere den pramisi fu mi,

èn Yu meki mi teki prati ini den sani

di Yu e gi den sma di e lespeki Yu.

7Gi kownu wan langa libi,

meki a libi fu têgo.

8Meki Gado kibri en solanga a de na makti,

meki a bigi lobi fu Yu

nanga a de di Yu de fu fertrow

kibri en.

9Dan mi sa singi ala ten fu a nen fu Yu,

èn ala dei mi sa du sa mi ben pramisi.