Sranan Tongo Bible 2016 (STB16)
60

Wan begi fu ferlusu

601Gi a tiriman fu a singigrupu fu a tempel. A mus singi a srefi fasi leki: A leili fu a ferbontu. 2Wan begi fu David, di mus leri wi wan sani. David begi a begi disi di a ben feti nanga den sma fu Aram di ben kmoto fu Mesopotamia nanga Soba, nanga di Yoab ben kiri twarfu dusun Edomitiman ini a Sowtudal di a ben e drai kon baka.

3Tye Gado, Yu poti wi na wan sei,

Yu broko psa na wi mindri,

Yu ati ben bron na wi tapu.

Ma tye, drai kon baka na wi.

4Yu seki a kondre, a gron priti.

Meki a gron kon bun baka, bika ala sani e seki.

5Yu meki a pipel fu Yu psa tranga ten,

Yu gi wi win fu dringi di drai un ede.

6Yu gi wan marki na den sma di e lespeki Yu,

fu den kmoto gi den peiri fu den bo. sela

7Ferlusu den lobiwan fu Yu,

meki a krakti fu Yu gi wi a wini,

piki wi.

8Gado tak' na ini En santa presi taki:

“Mi o prisiri te Mi o prati a kontren fu Sikem,

te Mi o marki a Sukotdal.

9Gilead nanga Manase, na Mi abi den,

Efraim na a fet'ati di Mi weri tapu Mi ede,

Yuda a tiki nanga san Mi rigeri.

10Moab na a beki pe Mi e wasi,

tapu Edom mi fringi Mi susu,

Mi e bari fu di Mi wini Filistea.”

11Suma sa tyari mi go na a tranga foto?

Suma sa tyari mi go na Edom?

12Na Yu, Gado, di ben poti wi na wan sei,

Na Yu, Gado, o hari go nanga a legre fu wi?

13Yepi wi nanga den feyanti fu wi,

bika a yepi fu libisma na noti.

14Nanga Gado wi sa wini,

bika Ensrefi sa traputrapu den feyanti fu wi.

61

Gado na mi kibripresi

611Gi a tiriman fu a singigrupu fu a tempel. A Psalm disi mus singi nanga a instrumenti di abi snaar. Fu David.

2Tye Gado, yere a krei di mi e krei,

arki a begi fu mi.

3Mi e kari Yu fu wan fara kondre,

mi ati no man tyari en moro.

Tyari mi go poti tapu a bergiston,

di misrefi no man kren.

4Bika Yu na mi kibripresi,

a tranga toren gi a feyanti.

5Meki mi tan fu têgo ini a tenti fu Yu,

meki mi kibri drape ondro den frei fu Yu. sela

6Bika Yu, Gado, Yu yere den pramisi fu mi,

èn Yu meki mi teki prati ini den sani

di Yu e gi den sma di e lespeki Yu.

7Gi kownu wan langa libi,

meki a libi fu têgo.

8Meki Gado kibri en solanga a de na makti,

meki a bigi lobi fu Yu

nanga a de di Yu de fu fertrow

kibri en.

9Dan mi sa singi ala ten fu a nen fu Yu,

èn ala dei mi sa du sa mi ben pramisi.

62

Poti yu fertrow tapu Gado

621Gi a tiriman fu a singigrupu fu a tempel. A mus singi a srefi fasi leki: Yedutun. Wan psalm fu David.

2Fu tru, na Gado wawan a sili fu mi e feni bro,

na En e ferlusu mi.

3Fu tru, na En na a Trangawan pe mi e kibri,

na En e ferlusu mi,

a tranga kibripresi fu mi,

mi no sa seki.

4Olanga un o tan naki a wan sma nomo?

A de leki wan skotu di e kanti,

leki wan bergi di e broko fadon.

5Fu tru, den e kruderi fu puru mi fu a hei presi fu mi,

den lobi ferteri lei fu mi,

den e blesi nanga den mofo,

ma den e fluku na den inisei. sela

6Fu tru mi sili, suku bro na Gado,

bika na fu En mi e ferwakti ala sani.

7Fu tru, na En na a Trangawan pe mi e kibri,

na En e ferlusu mi,

a tranga kibripresi fu mi,

mi no sa seki.

8Na Gado e ferlusu mi, na En e gi mi grani,

a Trangawan pe mi e kibri,

na Gado na mi kibripresi.

9Mi pipel, poti yu fertrow na En tapu, fu alaten,

loktu yu ati na En,

Gado na wi kibripresi. sela

10Fu tru, libisma no de noti moro leki wan bro,

guduwan nanga pôtiwan no de noti moro leki wan lei,

te den go na tapu wan wegi, a wegi e opo den go na loktu,

makandra den lekti moro winti.

11No teki sma sani nanga tranga,

no fufuru sma sani teki,

Awinsi yu e kon gudu moro nanga moro,

yu no mus bow tapu gudu.

12Moro leki wan leisi mi yere Gado taki a sani disi:

“Na Gado abi ala krakti.”

13Iya Masra, na Yu abi bigi lobi,

bika Yu e pai ibri sma fu den sani di a du.