Sranan Tongo Bible 2016 (STB16)
6

Wan begi fu kmopo ini anu fu dede

61Gi a tiriman fu a singigrupu fu a tempel. A psalm disi mus singi nanga instrumenti di abi snaar. A mus singi a srefi fasi leki: A di fu aiti.6:1 A no de so krin san a wortu disi wan taki.

2MASRA, no strafu mi ini Yu atibron,

no fon mi ini a hebi atibron fu Yu.

3Sori mi a sari-ati fu Yu, MASRA,

bika mi e swaki e gwe.

Dresi mi, MASRA,

bika mi siki te ini mi bonyo.

4Mi e frede taki mi o dede.

Olanga, MASRA, Yu o meki mi wakti?

5Kenki Yu prakseri MASRA èn puru mi ini anu fu dede,

ferlusu mi fu a bigi lobi fu Yu.

6Bika te wan sma dede, a no kan prakseri Yu moro.

Suma o man gi Yu grani ini dedekondre?

7Mi weri sote fu a dyeme di mi e dyeme,

ala neti mi e krei e nati mi sribi presi,

den watra-ai fu mi e sungu a bedi fu mi.

8Mi ai kon dungru fu a krei di mi e krei,

na den feyanti fu mi meki den ai fu mi kon swaki so.

9Un kmopo na mi tapu, un alamala di e du ala sortu ogri!

Bika MASRA yere mi tranga krei.

10MASRA yere a begi di mi e begi En,

MASRA arki a begi fu mi.

11Ala den feyanti fu mi o kon na syen,

den o skreki te fu dede,

ini wan pingi fu wan ai den lon gwe fu soso syen.

7

Wan begi fu sani psa tapu wan leti fasi

71Wan sarisingi fu David di a singi gi MASRA, fu den sani di Kus, wan man fu a lo fu Benyamin, ben taigi en.

2MASRA, Mi Gado, na Yu mi e kon kibri.

Ferlusu mi fu den di de nomo na mi baka,

yepi mi,

3fu den no priti mi leki wan lew,

fu den no srepi mi tyari gwe,

sondro fu wan sma yepi mi.

4MASRA, Mi Gado, efu mi du wan sani di no bun

efu mi du wan sma ogri,

5efu mi pai mi mati ogri fu bun,

noso efu mi ben puru sani nanga tranga

na a anu fu den di de na mi baka,7:5 A Hebrewtekst fu a pisi disi no krin.

6dan meki den feyanti fu mi kon na mi baka èn grabu mi.

Den kan naki mi trowe na gron,

den kan kiri mi,

èn libi a dedeskin fu mi na gron. sela

7Du wan sani, MASRA, opo ini hebi atibron,

feti den feyanti fu mi di e pina mi nanga atibron.

Kon yepi mi,

Yu di wani taki sma mus libi leki fa a fiti.

8Tyari den folku kon sidon lontu Yu,

èn teki Yu presi tapu Yu kownusturu fu krutu den.

9MASRA e krutu den folku.

Meki a leti de na mi sei MASRA,

bika mi e libi soleki fa a fiti,

mi no du ogri.

10Gado, Yu di e du sani na tapu wan leti fasi,

Yu di e ondrosuku un ati nanga un firi,

meki den ogri-ati sma tapu fu du ogri,

ma blesi den sma di e du bun.

11Gado na a schild di e kibri mi,

a Wan di e ferlusu den sma di e du En wani.

12Gado na wan Krutubakra di e krutu sani na tapu wan leti fasi.

A de wan Gado tu di e strafu ogri ala dei.

13Efu wan sma no tapu nanga kruktudu,

dan A e srapu a deigri fu En,

A e hari a bo fu En span, dan A e marki na en tapu.

14A e marki na en tapu nanga En fetisani di e kiri,

A e sutu nanga En faya peiri.

15Leki fa wan umasma e hori bere,

na so a sma di e meki kruktudu kon ini en,

e furu nanga ogri tu,

èn san a e puru kon na doro na soso lei.

16A e diki wan dipi olo gi wan trawan,

ma ensrefi e fadon ini a peti di a diki.

17Den ogri di a du e drai kon tapu en eigi ede,

a ogri fu en o fadon leti na tapu en eigi mindri ede.

18Mi sa gi MASRA tangi fu di A e du sani nanga leti,

èn mi sa opo a nen fu MASRA, a Moro Hei Gado,

nanga psalmsingi.

8

Libisma bigi, ma Gado moro bigi

81Gi a tiriman fu a singigrupu fu a tempel. A mus singi a srefi fasi leki: A Gitit.8:1 A no krin san a wortu disi wan taki. Wan psalm fu David.

2O MASRA, wi Masra,

heri grontapu sabi fa Yu bigi.

Yu, di glori de fu si na heimel.

3Nanga a singi fu pikin nanga di fu nyunyun pikin

Yu e bow wan skotu fu tapu den feyanti fu Yu,

fu puru den wan di e feti Yu na pasi.

4Te mi e luku heimel, di Yu meki nanga Yu anu,

a mun nanga den stari, di Yu poti tapu den presi,

5mi e aksi misrefi taki:

san na libisma, taki Yu e prakseri en,

san na libisma, taki Yu e luku fu en?

6Ma toku di Yu meki en,

Yu meki en taki pikinso moro a ben de leki wan gado.

Yu meki en fu de leki kownu

èn Yu gi en glori nanga grani.

7Yu e meki a tiri den sani di Yu meki,

ala sani Yu poti ondro en makti:

8skapu, kaw, ala den meti,

srefi den krasi meti,

9den fowru di e frei na loktu,

den fisi fu a se,

ala den sani di e swen ini a se.

10O MASRA, wi Masra,

heri grontapu sabi fa Yu bigi.