Sranan Tongo Bible 2016 (STB16)
74

Tye Gado memre Yu pipel

741Wan singi fu Asaf di mus leri wi wan sani.

Tye Gado, fu sanede Yu poti wi fu têgo na wan sei?

Fu sanede Yu ati e bron nanga den skapu di Yu e tiri?

2Memre a pipel di Yu ben teki bun langa kba gi Yusrefi,

di Yu ben ferlusu fu de Yu eigi lo,

memre Sionbergi, a bergi pe Yu ben libi.

3Kon, kon luku fa sani broko didon na gron fu têgo,

fa a feyanti naki ala sani broko ini a santa presi.

4Feyanti fu Yu ben e bari ini a presi

pe wi nanga Yu ben e miti.

Den poti den fraga fu den drape tu.

5Leki fa wan sma e opo en beiri bun hei,

fu kapu bon,

6na so den ben opo den beiri nanga den owru

fu naki den sani broko,

tapu san moimoi prentyi ben tyerfi.

7Den bron a santa presi fu Yu te na gron,

den doti a oso pe wi ben anbegi Yu.

8Den ben taigi makandra taki:

“Un o broko den te na gron.”

Den bron ala den oso pe wi ben e anbegi Yu.

9Wi no e si marki fu Yu moro,

profeiti srefi no de moro,

no wan sma sabi tu olanga sani o tan so.

10Tye Gado, olanga a feyanti o tan teki wi meki spotu,

olanga den o tan afrontu a nen fu Yu.

11Fu sanede Yu no e yepi wi?

No fow Yu anu moro langa,

ma puru den na pasi!

12Ma Gado, Yu na mi Kownu,

dati de so bun langa kba.

Yu ferlusu wi leti dyaso pe wi e libi.

13Nanga a krakti fu Yu,

Yu prati a se na tu,

Yu masi den ede fu den bun bigi sneki fu a se.

14Na Yu ben masi den ede fu a Leviatan,

dan Yu gi en leki nyanyan na den meti fu a sabana.

15Na Yu meki a watra fu den watrabron nanga kriki bigin lon,

èn na Yu e meki liba nanga furu watra drei gwe.

16Na Yu meki dei, na Yu meki neti.

na Yu poti a munkenki nanga a son na den presi.

17Na Yu poti den kbapisi fu grontapu,

na Yu meki dreiten nanga alenten.

18MASRA, memre fa a feyanti e meki spotu,

fa wan don folku e afrontu a nen fu Yu.

19No gi a doifi fu Yu di Yu lobi,

abra na krasi meti.

No fergiti a libi fu den mofinawan fu têgo.

20Memre a ferbontu di Yu meki nanga wi,

bika furu dungru presi de ini a kondre,

kibripresi pe ogri e psa.

21No meki den di trawan e pina

drai gwe nanga syen,

ma meki den mofinawan,

nanga den pôtiwan

prijse Yu nen.

22Tye Gado, opo, du wan sani!

Taki fu wini a tori fu Yu!

Memre fa den don sma e afrontu Yu heri dei.

23No fergiti a babari fu den feyanti fu Yu,

a babari fu den di e kaka futu gi Yu,

a de fu yere dorodoro!