Sranan Tongo Bible 2016 (STB16)
75

Gado na a bigi krutubakra

751Gi a tiriman fu a singigrupu fu a tempel. A mus singi a srefi fasi leki: No meki mi go lasi. Wan psalm fu Asaf. Wan singi.

2Wi e gi Yu tangi, Gado, wi e gi Yu tangi,

a nen fu Yu de ala ten na tapu wi tongo,

wi e taki fu den bigi sani di Yu du.

3“Na tapu a yoisti ten,

Mi sa krutu tapu wan leti fasi.

4Awinsi grontapu nanga ala san e libi na en tapu sa beifi,

na Mi ben poti en tnapu na tapu postu. sela

5Mi taigi den sma nanga heimemre taki:

No abi heimemre.

Den ogri-ati sma Mi taigi taki:

No opo yusrefi.

6No opo yusrefi gi Gado,

un no meki bigi te un e taki.”

7Bika bigi nen no e kmoto fu oostsei

noso fu westsei

a no e kmoto fu a sabana tu,

8ma na Gado na krutubakra,

na En e opo a wan,

na En e broko a trawan.

9MASRA hori wan kan nanga win ini En anu,

a moksi nanga spesrei

èn a e skuma

A e kanti en gi den ogri-ati sma fu grontapu,

den abi fu dringi en te leki a leigi.

10Ma mi dati, ala ten mi sa taki fu en,

mi sa singi gi a Gado fu Yakob.

11“Mi sa broko a krakti fu den ogri-ati sma,

ma Mi o meki a krakti fu den bun sma kon moro bigi.”