Sranan Tongo Bible 2016 (STB16)
84

A angri fu de ini a oso fu Gado

841Gi a tiriman fu a singigrupu fu a tempel. A mus singi a srefi fasi leki: a Gitit. Fu den Korakitisma. Wan psalm.

2MASRA fu ala sani,

mi lobi a tempel fu Yu fu tru!

3Mi e angri, iya, mi e angri fu de ini a tempel fu MASRA,

nanga ala san de ini mi, mi e singi gi a libi Gado.

4MASRA fu ala sani, mi Kownu èn mi Gado,

srefi a pikinfowru e feni wan tanpe,

a zwaluw e meki en nesi fu a poti den pikinwan

na den altari fu Yu.

5Den sma di e libi ini Yu oso, na blesi sma,

den e prijse Yu dorodoro. sela

6Den sma di e kisi den krakti fu Yu, na blesi sma,

den di wan teki a pasi fu kon na Yu.

7Efu den e psa ini wan dal di drei srefsrefi,

a e tron wan presi nanga bogobogo watra gi den,

blesi e kon na den tapu leki alen.84:7 A Hebrewtekst fu a pisi disi no krin.

8O moro den e waka o moro den e kisi krakti,

te leki den doro fesi Gado ini Sion.

9MASRA, Gado fu ala sani, yere a begi fu mi,

tye Gado fu Yakob, arki! sela

10Tye Gado, Yu di e kibri wi leki wan schild,

luku èn sori a wan di Yu salfu Yu bunfasi.

11Bika wán dei ini Yu oso,

betre moro dusun dei na wan tra presi.

A moro bun fu tnapu tapu a stupu fu a oso fu a Gado fu mi,

dan fu de ini a oso fu ogri-ati sma.

12Bika MASRA Gado e krin wi pasi,

na En e kibri wi leki wan schild.

A no e hori a bun na baka

gi den sma tapu san trawan no man sori finga.

13MASRA fu ala sani,

a sma di e fertrow na Yu tapu, na wan blesi sma.

85

Wan begi gi a kondre

851Gi a tiriman fu a singigrupu fu a tempel. Fu den Korakitisma. Wan psalm.

2MASRA, Yu ben bun gi a kondre fu Yu,

Yu tyari wan kenki ini a fasi fa sani ben e go nanga Yakob.

3Yu gi a pipel fu Yu pardon fu den kruktudu,

nanga den sondu fu den. sela

4Yu meki a atibron fu Yu saka,

Yu no lusu a atibron fu Yu moro.

5Tye Gado, meki wi de baka leki fa wi ben de bifo,

meki wan kba kon na a wani di Yu no wani sabi noti moro fu wi!

6Na fu têgo Yu ati o tan bron na wi tapu?

a atibron fu Yu o de fu alaten?

7Tye, meki wi libi baka,

dan a pipel fu Yu sa prisiri fu Yu ede.

8Tye MASRA, sori wi a bigi lobi fu Yu

èn ferlusu wi.

9Mi wani arki san Gado, MASRA, sa taki,

bika A sa pramisi taki sani o waka bun baka gi a pipel fu En,

gi den di e tan waka na En baka,

efu den no drai go libi wan soso libi baka.

10Fu tru, es'esi A o kon ferlusu den sma di e lespeki En,

èn a glori fu En o de fu si ini wi kondre baka.

11Dan bigi lobi nanga a fertrow di Gado de fu fertrow

sa waka anu na anu,

fu du sani na tapu wan leti fasi nanga freide

o brasa densrefi.

12A bow di Gado o man bow tapu libisma

o de fu feni baka na grontapu,

èn Gado di e du sani nanga leti

o luku kmopo fu heimel.

13MASRA o meki sani waka bun gi wi,

èn den pranigron fu wi o gi nyanyan.

14A du di Gado e du sani nanga leti

o go na En fesi

fu meki pasi gi En.

86

Wan begi gi yepi

861Wan begi fu David.

Tye MASRA, arki mi èn piki mi,

bika mi na wan pôti èn mofina sma.

2Kibri mi, bika mi e lespeki Yu.

Yu na mi Gado, ferlusu Yu knekti,

tapu Yu mi e fertrow.

3Sori mi Yu bun-ati Masra,

bika na Yu mi e tan kari.

4Meki Yu knekti prisiri baka,

bika, Masra, na Yu mi e kon nanga mi begi.

5Masra, Yu bun èn Yu tnapu klar'klari fu gi pardon,

a lobi fu Yu bigi gi ibri sma di e kari Yu.

6Tye MASRA, arki a begi fu mi,

arki te mi e begi trangatranga.

7Te mi de ini benawtu mi e kari Yu

bika Yu e piki mi.

8No wan gado de leki Yu, Masra,

èn no wan du den wondru di Yu du.

9Masra, na Yu meki ala folku,

den alamala o kon boigi gi Yu èn gi a nen fu Yu grani,

10bika Yu bigi èn Yu e du wondru,

Yu, Gado, Yu wawan.

11MASRA, leri mi fa Yu wani taki mi mus libi,

fu mi kan tyari misrefi leki fa Yu wani.

Gi mi wan ati di e lespeki Yu.

12Masra, Gado fu mi, mi sa prijse Yu nanga mi heri ati,

mi sa gi Yu nen grani fu têgo,

13bika a lobi bigi di Yu abi gi mi,

na Yu ferlusu mi fu mi go ini a dipi dedekondre.

14Tye Gado, sma nanga bigifasi e meki densrefi klari

fu kon feti nanga mi,

wan grupu di e du sani nanga tranga

wani kiri mi,

den no e span nanga Yu.

15Ma Yu, Masra, na wan Gado di abi sari-ati nanga bun-ati,

Yu abi langa pasensi, Yu furu nanga lobi,

èn Yu de fu fertrow.

16Drai luku mi èn sori mi a bun-ati fu Yu,

gi a knekti fu Yu krakti,

ferlusu a manpikin fu a uma di e dini Yu.

17Gi mi wan marki fu a bunfasi fu Yu,

dan den feyanti fu mi sa si dati èn kon na syen,

te den si MASRA, fa Yu yepi mi èn trowstu mi.