Sranan Tongo Bible 2016 (STB16)
90

Libisma swaki ma Gado tranga

901A begi fu Moses, a man fu Gado.

Masra, na Yu wi e kibri fu têgo.

2Yu na Gado fu têgo en alaten,

bifo Yu ben meki den bergi,

bifo Yu ben meki grontapu.

3Yu e meki libisma tron kleidoti baka,

na Yu e taki: “Libisma, tron baka san yu ben de.”

4Dusun yari de leki wan dei gi Yu,

leki a dei fu esde di psa gwe,

leki wan pikin pisi fu a neti.

5Yu e wai libisma puru na pasi,

leki fa wan dren e kon na wan kba

te wan sma e wiki mamanten.

Leki grasi di e gro kon,

6mamanten a e sproiti èn a e gro,

te neti a e dede èn a e drei gwe.

7A atibron fu Yu e meki wi dede gwe,

wi e frede trutru te Yu ati teki faya.

8Yu e poti den kruktudu fu wi na Yu fesi,

srefi den kibri sondu fu wi Yu e tyari kon na krin.

9A atibron fu Yu e tyari wan kba kon na a libi fu wi,

a e psa gwe leki wan soktu.

10Wi e libi seibitenti yari,

efu wi tranga wi kan doro aititenti,

a moro bigi pisi fu den yari dati na soso sari nanga problema,

a libi e psa gwe esesi èn wi no de moro.

11Suma sabi o hebi a atibron fu Yu de?

a atibron di fiti a lespeki di Yu mus kisi?

12Leri wi fu ferstan o syatu a libi fu wi de

fu wi kan libi nanga koni.

13Tye MASRA, olanga ete, fosi Yu drai kon na wi?

Sori den knekti fu Yu a sari-ati fu Yu.

14Sori wi te mamanten a bigi lobi fu Yu,

fu wi kan prisiri ala den dei fu wi libi.

15Meki wi prisiri now fu a ten di Yu ben pina wi,

fu den yari di wi ben abi soso problema.

16Meki den knekti fu Yu si den bigi wroko fu Yu,

èn meki den pikin fu wi si a glori fu Yu.

17Masra, Gado fu wi, meki wi si a bunfasi fu Yu,

meki ala san wi sa du, waka bun gi wi,

iya, meki ala san wi sa du waka bun.