Sranan Tongo Bible 2016 (STB16)
91

Gado, a Wan di e kibri wi

911A sma di a Moro Hei Gado e kibri,

a sma gi san a Wan di abi ala makti e sorgu taki noti no miti en,

2kan taigi MASRA taki:

“Na Yu mi e kon kibri,

Yu na a tranga kibripresi fu mi,

Yu na mi Gado, tapu Yu mi e fertrow.”

3Na En na a wan di e ferlusu yu fu yu no kon ini problema,

leki fa wan fowru e fasi ini a net fu den sma di e fanga fowru,

na En na a wan di e kibri yu fu takru siki no kiri yu.

4A e kibri yu na ondro En frei,

ondro En frei yu e feni wan kibripresi,

a bow di yu kan bow na en tapu

de leki wan schild di lontu yu fu ala sei.

5Yu no abi fu frede gi den ogri di e waka te neti,

gi a peiri di sutu te deiten kon na yu tapu,

6gi a takru siki di e waka lontu na ini a dungru,

noso gi ogri di e pori sani bigibigi dei.

7Awinsi dusun e fadon dede na yu sei,

tin dusun na yu let'sei

not'noti sa miti yu.

8Teki yu ai luku nomo,

dan yu o si fa den ogri-ati sma o kisi den strafu.

9MASRA, na Yu na mi kibripresi.

Fu di yu teki a Moro Hei Gado leki yu kibripresi,

10dan no wan bigi ogri o miti yu,

no wan siki sa kon krosbei fu yu oso.

11A sa komanderi den engel fu En,

fu kibri yu alape pe yu e go.

12Tapu den anu den sa tyari yu,

fu yu no stotu yu futu na no wan ston.

13Yu sa waka psa tapu lew nanga takru sneki,

yongu lew nanga sneki yu o masi nanga yu futu.

14“Mi o ferlusu en, fu di a lobi Mi

Mi o kibri en fu di a sabi Mi.

15Mi o piki en efu a kari Mi,

Mi sa de nanga en te a de ini benawtu,

Mi sa ferlusu en fu a kisi grani.

16Mi o gi en langa libi,

èn Mi o ferlusu en.”